Kukiland Map

 "He thil hi chu ka sawi lo ang ka ti zet na a, " tih ang category kha ka ni. Mahse, sawi teh ang

Kan social Media hmang hi a buaithlak ṭhin ka tia! Dawt hi a darh nasa em em mai a. Hengte hi tute emaw siam chawp/phuah chawp a ni. Awih tawk hi kan awm ṭhup zel a. Lalmanga thlalak tihte thleng khan a ni...ha ha

1. 1904-a British MAP siam angin an sawi a.  Bangladesh an dah a. Barak Valley an sawn dawrh a.  Meghalaya an dah a. Arunachal Pradesh an dah a. Myanmar an dah kulh a. Kachin an dah hrang a, Shan an dah hrang a etc...

1972-ah Bangladesh hi a ding a. 1947 hmalamah India ram a ni a. 1904 phei chuan un-partitioned Bengal a ni a, British-Bengal Province a ni.

Arunachal Pradesh hi Mizoram ruala state ni a ni a. India Indan bawrah phei chuan NEFA tih a nih kha. 1904 chuan Abhor ram a la ni a, 1912-ah Abhor run hnu khan British empire-ah a lut ve. Mi hausa Pu Pachhunga te dinchhuahna bul a nih kha.

Meghalaya hi 1972 hmalamah a awm lo a. British-Assam Province chhungah a awm a. 1971 kum tawp thlengin Assam Capital a ni. British hunlai chuan Khasi-jaintia Hills tih a ni.

Kukiland tia a hranpaa sawi a awm ngai lo bawk.

Bakah he MAP-ah hian Hill Tipperah (Tripura Hills) an dah bo daih bawk a. 1871 khan Dharmaganagar velah British Border outpost kha a awm daih tawh. 'To stop the Lushai Marauders' tiin an ziak.

2. Kingdom of Manipur hi 1824 aṭangin British East India company nen Subsidiary Alliance tia kan zir ṭhin ang khan an inzawm a, 1891-ah princely state a ni.

3. British Empire hnuaiah Myanmar a awm lo a. Burma a ni. 

Sawi tur a tam mai. A map-a dik lo hi  Sawi fiah vek lo mai ila.  Google hmang miah loa kan lehkha lo zir tawhna aṭanga kan knowledge neih tawhsa pawhin heng hi chu a dik lo e tia min hrilh turah pawh kan awih leh zel ṭhin.

Social Mediaa mi hi chu awih tur chin thliar thiam ila, kan follow tur leh kan awmna group tur thlenga uluk a ṭha! Lehkha hi chhiar ang u, hriatna tak tak awmna a ni.

~ Mizo News

Share: