Missionary nasep kum 25 chinna

Lamka, June-22: Rev. Dalzakam Suantak-te nupa leh Rev. Thanghaulian Suantak-te nupa in Pathian nasem dia Missionary akipiak nung uh kum 25 chinna Silver Jubilee lopna tuni’n Thangkhal Bible Central Church, Tuibong ah nei in Pathian kiang ah kipahthu genna program nei uhi.

Huai ah Rev Dr. S. Nengzakhup, Director, NECTAR (North East Christian Training and Research) in Pathian thugen in Missionary te hanthawnna thugen hi.

Dr. H. Khamkhanpau, CMO/ Kangpokpi Christian Hospital; Liankhanpiang Secy. Chin Baptist Evangelical Mission, CBA; Rev. V. Thangkhangin, Director of Mission, EBC; Upa K. Sawngkhawtuan Honorary Promotional Secy, FMPB, CCpur; Tualkam, ZCF Delhi, Rev. Seiboi Lecturer, Disciples Training Seminary, K. Salbung te’n kipahpihna leh hanthawnna thugen uhi. Program ah Pastor/Rev., Upa leh Pathian thaunilh teltuam bik mi 25 te’n Jubilee uap in Jubilee dakpi (Zampi) tumna nei uhi.

Rev. Dalzakam Suantak leh Rev. Thanghaulian Suantak ahihleh 1980s hunlai in Grace Bible College, New Lamka ah Bible zil uhi. Huai zawh Thangkhal Saptuam sung ah Pathian nasem in om uh a, June, 22, 1992 kum in Friends Missionary Prayer Band (FMPB) nuai ah Missionary nasem ding in a nupa tuak un interview ah lawhching uh a, India gamsung mun tuamtuam ah sem uhi.

Amau agenna uah hichibang a Pathian nasep ginglou leh namdang te kiang ah aseptheihna uh ahihleh kum 1939 -1947 sung (late) Thawngluan ECC ( tulel a EBC) te Missionary in Thangkhal kual a T. Khazang pansan a Pathian Thu a hong gen ziak a Thangkhal mite’n Pathian Thu ana kizui pan ahihziak in Missionary (late) Thawngluan leh a adamlai Thawngkhongai @Nu Ngai, a innkuan pihte leh ECC/EBC te zahna lianpi pia uh hi’n gen uhi.

Courtesy: MANIPUR EXPRESS [23 June 2017]

Share: