MARY WINCHESTER: Pu N. Lhungdim

- Ngainom um leh lungset um thusim

Asun: N.Lhungdim

Thangting House 

Molnom-West

27th June 2022

Mizo hon Mizo pao a ZOLUTI Mizo a ahunglut jeh a Zoluti ana ti uchu Scottish chapang ahi in chuphat lai a Lushei haosa hon Cachar a tea garden nei James Winchester kiti leh garden a natong Meilhei numei khat toh acha chu kum 6 ahi a ana mat uh thusim ngainom umtah leh lungset umtah khat ahi. Athusim hi hiti ahi Assam Cachar gam a tea garden Alexandrapur kiti a tea garden manager James Winchester Assam a aum nahi kum 12 ahitan ahi. Achanu Mary chu tea garden a natong Meilhei numei khat toh ana nei ahin kum 6 alhin phat in apa chun England a asol a lekha simsah ding ti ana lunggel ahi. Ahinla January 23rd chun Alexnadrapur Garden apa golpa George Seller toh aum pet uvin a garden achun aga vahle lhon in ahi. Ahinla photlot in thu ahung boi in aloipa chu sakol in atou in alhei le le in Mary chu a nurse nutoh bungalow langah achephei in apa chutoh lampi a akimutopi uvin mun kijen khat a koidoh ding ana got ahi. Ahinla Lushei galhang hochun an man uvin alol atanpeh uvin ahi. Hiti chun athikon apa koma kon chun achanu ana puidoh un hiche a apa thusei chu ipi ham, "Dear only, God knows your faith" ana kitin ahi. Garden neipa thiding a adalhah jou uvin achanu Mary chu apuimang uvin amat hou phabep khatjong chu Lushai Hill alhun masang uvin athiden jong atam in ahi. 

Mary Winchester chu jatni kigom mihem ahi. Amat vang uvin phatah in ajen uvin amanho kimkhat in kithatdoh leh phading tin thu hungboi ding ahi ti aheuvin ahi. Hijeh chun Sailam kho haosa pa Bengkhuaia in ah akoi uvin chuche phatlai achu Bengkhuaia achu haosa lentah leh thunei tah ana hi. Mary Winchester akho uva ahung chu akipana in ju le sa adon uvin haosapi in ana lamkai in ahi. Apao ahetlou jeh uchun Mizo hon Mizo a hunglut tin Zoluta ana sah uvin ahi. Haosapu in tahsan umtah numei akho uva upa khat Vansuakthanga jinu Pi Tluangi ana vengtup dingin ana pe in hijehchun Pi Tluangi in jong lengte chate bangin ana jen in ana imutpi in chuleh sil leh chen kichepna jong ana bolpeh ji in ahi. 

Ahinla British Colonial Govt. in phulah ding ti lungput anei jehin Lushei Expedition kiti khat 8th October 1871 in bulu gal ahinbol uvin Lushei ho kho aban ban in ahinla uvin achaina in Sailam kho chu January 21st 1872 in ahunglhung uvin jingkah 8:30 in akipan uvin meithal akap uleh Lushei hochun amaho thinglhangmi manchah nei leh amaho sanga manchah pha neijo sapte toh kidou dingchu phachomlou ding ahijehin submit ana bol uvin ahi. Hiche sapte chun achangsal uleh alou hou asuhset jou uvin Mary Winchester chu rescue ana bol uvin ahi. 

T.H Lewin expedition lamkaipa seidungjui in Mary Winchester chu haosap in a konin apuidoh uvin hiche pet chun ama chu a in uva thingtum chungkhat ah ana dingin akong ah pondum khat akive in chukit leh tuiboh jong ana chep in ahi. Ama chun pasal chapang hochu order ana bolle in kum khat lhinglou akihen sungchun anu pao English jong ana hai in kihoupi nadingin mithai pou ana peuvin ahi. Sailam kho a chengho sei dungjui in haosapi ama chu phatah in apedoh in Mary Winchester chun English te chu Foreigners jong ati in avengnu Pi Tluangi in gammang ah thingpo dingin ana puidoh jui in ahi. 

Achaina in Mary Winchester chu Calcutta a kon in direct in Scotland ah apui uvin api leh apu Elgin, Moray kom ah achengin Royal Moray College ah B.A chan ana sim in hiche va chun Harry Innes Howie toh akimuto in chuleh akichenglhon in Headmistress kham khat amu in London ah akichon 1955 in kum 90 lhingin ana thitan ahi.

Share: