Mary’s Christmas: Pasian in Na Lianpi I Tungah Hung Sem Ut Hi ~ Dr. Kammuanmung Thangniang

Adam leh Evi khelhna ziak a Pasian leh mihingte kimelmatna kilemsak kik ding in, Pasian in a Tapa tang neihsun Jesu Kirst leitung a hung sawl hi. Pasian ahi i Toupa Jesu Krist in, a Pasian hihna kisuanpihlou in, kingiamkhiat tak in mihing in nungak siangthou Mary sung pan in a hung piang hi. Tua chi’n Mary pen Pasian nasep thupi tak a van zak poimoh tak a hung hihta hi. Pasian hilhial painna ding a tel a um Mary pen leitung a numeite lak ah hamphanu chia chiamteh in a um ta hi. Pasian in Mary tung a na thupi tak a sep mahbang in nang leh kei tung a zong hung sem ut lai hi.

Mathai 1: 21 na in Jesu hung paina ziak hibang in gen hi, “… Aman a mite a khelhna apan a hutdam ding ziak in”. Bul sut deuh ta lei, Christmas in a tup thupi pen ahihleh Pasian kiang a pan ngaihdamna ngah ding ahi. Bethlehem daidam a hasatna chiteng Jesu’n a hung thuakna banah sing kross ah hung sihna pen leitung mihingte leh Pasian in kizawpna i neih kik theihna ding lieuliau ahi. I kumpi ding a hung pai i Toupa Jesu Krist in a kumpi hihna pawm ding in hung sap zing hi. Aman i lak a naa lianpi a hung sem ut hi. I semsak ut na ding uh hiam? I lungsim tawng a Jesu Krist i pawm chiang in, Pasian in sil thupi tak hung bawl ding hi. I khelhnate hung ngaidam in, hundamna hung pe ding hi.

Gingtu hinkhua i zak zing lai un, haksatna tampi i tuak uhi. Na gingtu hinkhua ah lohsam na kisa ngai hiam? Na gingtu hinkhua chingzou lou kisa na bangbang a um a? Hibang dinmun a um hi a na kitheih leh, ngaihsut thak in.  “Lauken” chia hung khamuan zing Jesu Krist a zui gingtute ihi uhi. Joseph (Mathai 1: 20), Mary (Luka 1: 30) leh belampute kiang a ‘lauken’ a chih bang in (Luka 2: 10), eite kiangah zong ‘lauken’ a hung chi lai hi. Jesu Krist in i hatlouhnate hung thei a, hung panpih ut hi. Pan i la thak ut uh hiam? Pasian in na lianpi i tung a hung sem ut hi. Aman hung zohpih zou ding hi.

Gingtu hinkhua i zak zing lai un, genthoh hiam septhoh hiam in Jesu Krist vak (light) ihi khata uh hiam? I sepihte kiangah, i saptuamte kiangah, i innsung mite kiang mahmah ah zong Jesu Krist vak ihi ding uh Pasian lametna ahi. Pan i la thak ut uh hiam? Pasian in na liampi i tung a hung sem ut hi. Pasian hatna toh i zou ngei ding uhi.

Tu kum Christmas zang ding a iki sak kholh zing laitak un, Mary tung mahbang in Pasian in i tungah sil thupi tak hung sem ut hi. Mary toh kibang theih ihi chi i ngaihsutna hileh iki deihsak uhi. Mathai 12: 50 na ah Jesu hibang in gen hi, “Van a um ka Pa deihlam bawlte ka sanggampa, ka sanggamnu leh ka nu ahi,” a chi hi. Pasian deihlam bawlna in Mary toh hung kibang sak theih hi. Pasian kiang a i lungsim i hon chiang in Pasian in i tungah sil thupi tak hung bawl ding hi.  

***11122022***

Share: