Missionary Kamzathang Tanchin ~ Pastor M. Thangboi Zou

MISSIONARY DAY, 7th MAY

MISSIOANRY KAMZATHANG HANGSING (1952-1983) TANCHIN  

~ Pastor M. Thangboi Zou

THUMAPUI: 

Tuni May 7th ei Southern Manipur a teng Zou suonte dinga Missionary Day ahi toh kitua in Burma gam a Makuri Nagate lah a Khantanhoi zal a ahinna ana tan Missionary Kamzathang Hangsing tanchin enkhawm vai chin ka laibu gel Pasian Mizat Mi-20te Tanchin (20th Missionary Biography) apat ka hing lakhiet ahia, simtu zousie Missionarypu Tanchin akipat Pasian gam nasepna lunglut semsem din hing guolzawl chiet tahen, chi ka thumna ahi hi.

A HINKHUO MASA:
Missionary Kamzathang Hangsing apeisa 2nd March, 1952 in Mizogam North East Tangnuom khuo a Pa Tunkhokam Hangsing leh Nu Gouching goutan ta lite lah ah a 2na din ana pieng hi. Aman unau pasal 3 leh numei khat anei hi. A U tapen pa min ahileh Pumkhanlian Hangsing leh Mr Pumshong Hangsing ahia, a sanggam numei nun anadampi non sih hi. Apa ahileh mi kingaingiem, mi polnuom leh Pasian thu a lunglut mama mi ahi hi. Tualeh anu zong, innsung hamsa apan khanglien hinanleh, alungkhamna, abuoina leh beidawnna zousie Pasian kunga tutzing mi ahi a, a upa Pumkhanlian Hangsing ahileh VVF a pangin anaupa Kamzathang Hangsing abangsie, Pasian thu alunglut sih hi. Tualeh anaupa Pumsongin Hangsing ahileh a up Kamzathang Hangsing Missionary akuon in Tan Sawm (Cl- X) azounai sih hi. Tualeh a nau neupen ahileh tahsa leh lungsim a mibang senglou khat ahi. Innsung hamsahta apan khanglien ahiman un, Kamzathang in nasep silbawl leh loukuon ah anu leh pa akithuopi zing hi.

Tangnuom kho mite gendan in, Kamzathang in a U tate khat anuolang a puo in, khat aban a kaiin, ann neh ding suiin kholai ah akizawt ua, tualeh a upa zi adamlou chiengin naupuo kawmin, Ann asuzel a, a U tate giepi in akem hi. Ama lungsim sie neilou, mi lungsimhoi ahia, innsung khosah ngaikhoh mi ahi, achi uhi.

Kamzathang leh a innkuonte kum 1959 in Tangnuom khuo apat in Bungpilawn ah apemlut ua, tuana Kamzathang in lai Tan li (Cl-IV) tan asim a, tuana patin 1973 in Songtal khuo ah ahing pemlut kie uhi. A innsung mite Hagau lam ah aveina a, hundamna toh kisai ahoupi zing a zong azousieng hi (a innsung mite apiengtha sah hi). Ama mimal in a khuo ua Hattuom memberte kunga chielpi akibawl hi. Missionary akuon masangin akhuo ua hattuom Upa (Elder) khat kunga, “I kho sunga innchin alutin, chielpina bawlsuo zou ka himan in, i khote sisan apat ka siengta hi” chin ana gen hi. Ama ahileh Khawmpi man leh Na tangkuon (social work) athanuom mama hi. Ahinkhuo a Pasian nasep tup zing mi ahiman in Kum 1974-77 sunga eilam Khanglai tampi Teddim lam a Missioanry akuonlai un, ama zong athanuom mama a, nanleh innsung hamsatnate ziehin ana kuon thei tasih hi. Missionary lunglut ahiman in alupna (Bed) gei a Baang (wall) ah Missionaryte Lim (photo) taah in, amaute din athumpi zing hi.

HATTUOM A AHING KIZATDAN:
Bungpilawn a aumlai in Naupang Nipi Sang a Bigener apat Senior tan a “Honors Certificats” kum chin in ana sang hi. Dt. 27th April 1970 in Tuiphumna (Baptisma) atang a, kum 1974-83 sungteng Songtal khuo a Naupang Nipi Sangah Superindentent in apang a, kum 1979 in akhuo ua “Naupang Thum Pawl” kichi aphut khie hi. Kum 1978-80 tan in EBC Thanlon District a Khanglai pawl a committee member khat hidin telching ahia, kum 1981 in Songtal ah Mission Committee Secretary in apang hi. Kum 1978-80 sungma in Songtal Area a Naupang Nipi Sang ah Superindent in apang a, tualeh Missionary akuon matan in Chairman in apang hi.

MISSIONARY NNA ASEPDAN:
Innsung leh Hattuom mite dia mi poimaw tah ahizing laiin, Pasian hatna tangin Missionary din Songtal khuo a kipan in Dt. 8th Feruary, 1983 in Lamka lam zuonin ang kipan khie a, Dt. 10th February, 1983 in Dorcas Hall angtung hi. Tuahun lai tahin Mission Director ahileh Rev Dr Luiachinthang ahia, nitengin thum khawm in akikum uhi. Akhen chieng bangin Dorcas Hall ahilou leh Directorpu inn ah akikum khawm zing uhi. Missionary lunglut seng ahiman in Directorpu kungah, “Syepa aw, Pasian in Missionary dia ang hatna kaza a, 3vei hita ahimanin kuonlou theilou kahi” chin agen hi. Apeisa 1975 in Unaupa T. Pumzathang leh khanglai bangzat ahieite Missionary din ana kuon ua, nanleh ken innsung buoina kana nei zieh ka kuon thei sih hi. Tualeh ning kum 1982 in ka upa Pumkhanlian pen Eastar Sunday ni’n ahing piengtha a, aman ka innsung uh ahing enkawl a, tunin kei ka kuon utna pen ahileh Burma gam a Makuri Naga Namte lah ahia, mundangte pen hithei lou ding ka china vang hilou ahi, chin agen hi. Directorpu’n Thang na tup thupi kasa a zong kang kipahpi mama hi, hinanleh I Hattuom ten Missionary alah ding teng akila zouta a, tualeh akuon ding te zong akisawl zouta hi, chia adawng leh, Kamzathang in, “Syepa aw, Kei ka hingkuon danin, Hattuom ten Missionary din hingla henlen, Ha law (pay) pia in hingsawl hen chia, a ngen dia hing kuon kahi sih a, Burma gam a Makuri Naga Namte kunga ka tun thei ding dan hing kawmu thei lechin, amun va tung himhim vangin, ann-ngawl a ka shita zong in ka shi mai dinga, ka shi zong leh ka kipah mama hi” chin Directorpu thugen adawng hi. 

Tangmi dang khat a Missionary akuon dingdan akigen dan ahileh, Missionary din lamkai lamten aphal sih uhi, aziehte ahileh: Dohna ahileh:
(i) Thang, nang Burma ham na theiloupi, bangchin Makuri Naga namte kunga Pasian thu nagen thei diei? chia adoh uleh, aman, “Ka umdan in Pasian thu kagen ding hi” chin adawng hi.
(ii) Burma nava tun chiengin Burma Sepaiten hing man uh henlen, Burma Thonginn (Jail) ah hingkoi uleh bang chita diing? chia adoh kia uleh, aman, “Burma Sipaiten ahingmat ua Thong a ahingkoi uleh, Thonginn sunga Burma haam ka zil mai diing hi” chin adawng kia hi.
(iii) Burma gama vashi talehchin la? Chie adoh uleh, aman, “Martal a shi kahi mai diing hi” chin adawng hi, chin akigiel hi. 

Tua hun laiin EBC Hattuom in Burma gam a Makuri Naga Nam mite kunga Missionary nasem mi-10vel anei ua, tuate zilsahna neidin Hattuom in Mission Directorpu Rev Luiachinthang asawl ua, tuana Kamzathang leh Upa Laivung ten zong anua azui uhi. Missionary Training na mun ding ahileh, “Namihan, Moreh apat gamla lou, Keng azong kiletheina Burma gam sung ahi”. Tua Training hun sung ahileh Zingkal nai 6 akipat nitalam nai 8 tan hun azang zel ua, vaiguon azawh un Rev Luiachinthang in Kamzathang leh Upa Laivung leh Makuri Naga mite kunga Missionary sem lamkaite toh Moreh ah kinuo le ua, tuanah kihouna anei khawm uhi. Directorpun lamkaite kunga, tamna ka hingzawpi mi-2 tegel nazawpi ding uai, ken ka nuo puikia diei? chin dohna abawl hi. Missionary lamkaiten Upa Laivung pen kapui thei diing ua, nanleh Kamzathang in Burma haam atheilou ziehin ka pui thei sih diing uhi, chin adawnta uhi. Kamzathang in tami thu azahin, tami pen Pasian lemguot hilou in, mi hingte lemgtuot hibou chin anuom tasih hi.  Tuachin Moreh aum sung un Kamzathang in Burma haam zil theitawp in azil a, Pasian in lampi hingbawl in, ni bangzat nuo ahiei in, Missionary lamkaiten Directorpu kungah Upa pa pui ding ka chipen uh, ka henglam dang ua Kamzathang kipui jawh hen chin agenta uhi. Tuachin Kamzathang leh lamkaite khu Mission Field lam zuon din ahing kipan kheta uhi. Mission lamkaiten Kamzathang khu Kawlnih atengsah ua, tualeh Lukhu pal khat akhu sah uhi. Tuachia lampi ahingpei lai un (Gary toh) Burma Policeten atuonna gary matsawm ahichin Kamzathang in anagel a, nanleh Policeten tua gary khu Homalin tan apui ua, buoina bangma umlou in apeisuoh thei ua, Homalin akipan in Keng in Chindwin Lui zuitou in ni bangzat ahiei apei nuo un Makuri Naga namte tenna New Moldum ahing tungta uhi. 

New Moldum a Kamzathang in theitawp suoin Mang nna ahingsem panta a, naupang ninte, himapon adimte leh Chithah toh kidimte a silsiengthou a, sun leh zan chi umlou phielin abuoipi mama hi. Naupangte khu Pasian la leh Laisiengthou Thute ahil a, Paite haam in zong la leh Laisiengthoute zong ahilzel hi. Tuabang ah naupangte toh akipawl khawm chieng naupangten ngaina in akung bangah avagieh zel uhi. Hinanleh adohuoi mama khat ahileh, tuamun a Kamzathang atun masangin Khristian kichiten Laiziel tep, zu leh silchin hoiloute ana ching ua, Kamzathang in tuabang hinkhuo zatpen hangsantah in anuol/ adou hi. Ama tuamun avatun nia kipan miten _“Azipa Chuvachu” (Syepa, hangsantah a tangvalpa, china ahi) achi ua, khamna thei/ silchin hoilou zousie tawpsan theita uhi.

A HINKHUO TAWPLAM:
Dt. 25th June, 1983 in Vongpeh kichi khuo a Khantanhoi thugen pawl khat (Gospel Team khat) avapei ua, tuana Kamzathang, Thangkhankham, Lalkhosei, Ngamsei leh Missionary bangzat ahieite avateel khawm uhi. Tam vaiguon azat zou un, a innlam chiet ua (a field chiet ua) akinuo leh ua, Kamzathang ahileh Khosih san inn atung a, adamsieng masie na gumseng asemsah sih ua, nanleh amapen naupangte kem, amaute toh Lui a kisil, puonsawp, Thumkhawm, Lasa khawm chite pen abawl veve hi. Anatna pan ahingdam siengta in Uisa adugaw a khat hingthat unlen kou huondan in ka hing huon ding hi, chin angen hi. Tam gam atunnia kipan agen thupipen ahileh, “Kei tangval dehdeh kahi tahi” chi ahi hi. Uisa anekhawm zou un, a giehna mun lamzuon in apeita, inn atun masangin akikou a Luoh (vomit) toh thuo in aum ngal a, inn neipan adelphei leh inn neipa kunga hing thumpia in chin ana ngen hi. Inn neipan zong athumpi a, tuazou in ama zong Paite ham in thumna aneita hi, “Mangpa Pasian aw, Na khut a ka haugau, ka hinna, ka pumpi, ka bangkim ka hingpe khie hi” chin athum a, tuazou akipan anah nonta sih hi. Tuania New Moldum khosung a kaa-le-mau in akithawngsuo a, tua hunlaitahin Evan. Lalkhosei Biel ve a kuonpan tam thawmging azatah in bangthu um ahiei chie New Moldum khuo ahingdel leh Mang gam nna asepkhawmpi Missionary Kamzathang Hangsing shi avamu a, amapen Missionary Kamzathang Hangsing shi vamupa leh aluong vuipa zong asuotah hi. Tuami ni ahileh 9th July, 1983 ahia atahsa kum 31 achin kum zong ahi hi.

Unaupa Kamzathang shi thu khu Homalin khuo a EFCB Chairman Rev Paokhothang in Moreh a EBC Skul Principal a um V. Jamkhanthang siakhauzat (Telegraph) tungton in anghil a, tuami ni khu 25th July, Seppatni 6Am in Moreh ahingtung pan hi. Nitahin Moreh EBC Hattuom Department joint meeting hingnei un, sil bangkim innlam (Lamka) hinghil ua, ei vapei Leila Thong tanthei ahi chia abuoi lai un, Kamzathang shina mun vapha din V. Jamkhanthang leh Lalzuilian kisa ua, alampei man ding ua Sum ahing dawnkhawm uleh Dangka 550/- apha a, tuateng toh New Moldum zuon in Dt. 26th July in kipankhie ua, Dt. 2nd August suun kimvel in avatung uhi. 

Missionary Kamzathang Hangsing luong damsa mu ding ana umnon sih a, muthei umsun ahileh (Kivui jouta ahiman in), a Haan (Grave) ahiman in tuona Pape avakoi uhi. V. Jamkhanthang leh Lalzuilian New Moldum avatun in Kamzathang in naupang ana etkawlten anavaidawn ua Paite haam in Laisiengthou leh La toh anavaidawn uhi (Kamzathang hil Thu leh late toh). Tuamun a sawt umtheilou ahiman un angpei ua Dt. 10th August nin Kamzathang luong puotheilou ahiman un a Laisiengthou leh apuonna Thungpi (Bag) hingpuo in Moreh ahing tung ua, tuana kipan in Lamka a Dt. 13th August, ahing tungkia ua, tuachin a pienna Khuo Songtal a Dt 19-20th August, 1983 nin khela tahin a luong damsah thakhel in a ni-le-vonte vuikhietna vaiguon thupitah a nei ahi hi.
Ⓜ️issions Ⓜ️essenger

Share: