PA LAWHCHING BANGCHI HITHEI DING? ✍️ S. Thangzakap

THUMAKAI: Amasa pen in eite damna hung pia leh tukum 2024 Pate Ni mel hung musak lai Pasian min ih phat masa uhi. Tualeh tuni Pate Ni ahitoh kiton in leitung mun khempeuh aom Pa teng teng kiang a Pate Ni chibai  ih pia masa uhi, ajiak amah ute  jiak in hih leitung a mukha te hi hang tualeh  ih pate jiak ma in hih leitung a kipiang khia hi. Tua ahiman in tuni Pate Ni ahitoh kiton in ih Pate chiat pahtawi in limtak in kem in enkol tou in  zabawl ni. 

PATE NI HUNG PIAN KHIAT DAN: Pate Ni ahileh US gam a Spokane khua, Washington State a teng Sonora Smart Dodd kici numei khat in hung pat khiat ahi. 1909 kum a kibawl Nute Ni kikhopna pan ah hung piang khia ahi hi. A pa William Jackson Smart in ta guk (6) nei hi, a ta gukna a suak khiat zaw in a zi in sih san hi. Tua chiang in amahpa’n loukhou in hamsa pipi in pa dinmun le nu dinmun a nih in la khawm in a tate 6 teng hamsapi’n ana enkol tou den hi. 

A tate a ding in gim leh tawl leh gentheih liangvaina tampi a thuak te Sonora in a ngaihsut chiang in a pa in a tate itna thupi sa hi, tuachin amahnu’n nute bek pahtawi ding hilou in, pate zong pahtawi di’n kilawm ahi chi’n ngaihsutna nei ahiman in a pa pian ni June 19, 1910 pen Spokane khua ah Pate Ni in ana zang uhi. US kumpi in zong thukimpih ahiman in kum simin June kha Nipini thumna pen Pate Ni ana zang uhi, tualeh leitung buppi ah tuni dong in kibawl paisuak den in Pate Ni chi in kichiamte in kizang denta hi. 

NA NGAIHSUN KHA NGAI EI

🚸 Leitung a naupang million 25 in pa neilou uhi.

🚸 Teenager khangdawng mahni kithat (suicide) bawl te 63% te  pa neilou te ahi uhi.

🚸 Suam hat leh migilou 80% te pa neilou te ahi uhi.

🚸 Khamthei guithei guktat laktat a kipei 75% te pa neilou te ahi uhi.

🚸 High school dropout 71% pa neilou te ahi uhi.

🚸 Khangdawng suangkul taang 85% pen pa neilou te mah ahi kik uhi. 

Pa omlou man in innsung khua sung society sung gamsung leh mun tampi tak pen nakpi’n tokbuai pha hi. Tua ahiman in Sanggam te aw hibang a pa omlouna leh  pa neilouna ziak a siatna tampi tak tuak a mi million tampi aom lai un  nang  tuni’n ‘pa’ neilai nahi leh mi hamphatak na hi. Tua ahiman in napa zatak inla napa thu dawng in, napa khasia sak het kei in. Tuni’n na it mel khollou na kepnop khollou mi mai lak a na houpi utlou leh kapa hi nachi nuamlou ‘napa’ pen mitampi te in a nei non lou ahihlam phawk in, tua ahiman in na vangphat lam thei inla akikhelma in napa it inla napa zabawl in tualeh napa kipak sak in, tua hileh Pasian thupha akop kop in nasa’ng ding hi. 

PATE POIMOHNA LEH MANPHATNA

πŸ’  Pa omlouna innsung pen khopi kulbang neilou toh kibang hi.

πŸ’  Pa omlouna innsung pen inntung bitlou gua leh dai lut thei toh kibang hi.

πŸ’  Pa omlouna innsung pen mihing khut leh keng bukimlou toh kibang hi.

πŸ’  Pa omlouna innsung pen ganta apu neilou toh kibang hi.

πŸ’  Pa omlouna innsung pen inn teng lak ah inn nuamlou pen ahi.

πŸ’  Pa omlou man in khangdawng tampi in siatloh uhi.

πŸ’  Pa omlou man in naupang tampi in genthei hinkhua zang in gilkial dantak thuak uhi.

πŸ’  Pa omlou man in khangdawng tampi a tunna di tan tung zoulou uhi.

πŸ’  Pa omlou man in tup mawng hilou in khangnou tampi in a nuntakna uh siatpi loh uhi.

πŸ’  Innsung a pa a om nonlou chiang in innsung nu zong aphel langkhat beitoh kibang ta hi.

PA LAWHCHING IHI THEHINA DING IN

a) IH TATE THUHIL NI: “Naupang khat a neu lai in lampi dik tuansak leh chin, a tek dongin a lam pial nawn kei ding hi.” (Paunakte 22:6) 

Khuasung vengsung a naupang ommaw, omdan theilou te mite’n amuh chiang un nang na min bang e chi masa lou in kua ta nahia chi masa uhi. Tua ahiman in anu apa zalak sak maizum sak masa uhi. Tua ahiman in hih dan te ih tuaklou nading un ih tate aneu tung ua kipat a limtak ah a om didan uh a gamtat didan uh thil bangkim pen ih hil tou den ding uleh ih na mapui tou den ding uh poimoh ahi dan hung musak hi. Nu leh pa pawlkhat in a skulpu te un ahikeileh a Sunday skul teacher te un ana hil na veh un chi thei lai uhi. Eima hil leh midang hil kibanglou hi, tuaahi man in ih tate thuhil ding pen thasia kei ni aziak ih hil thei hun sung pen tomnou khat sung bek ahi. Hih hun tomnou khat sung a lamdik a napui manleh pa lawhchingpa na hi ding hi, ahinla na pui mankei leh pa lawsampa leh pa hepih huai nahi kha ding hi.

b) BANGTHU BANGLAA HIL DING IH HIA: “Tate aw, na pate uh hung hil nate ngai unla, thu na tel theih na ding un lim takin ngaihsun un.” (Paunakte 4:1) 

Laisiangthou in na pate uh hung thuhil nate chi hi, tua in a gen nuam ahileh thil tuam tuam leh lam tuam tuam a thu hil nate ahi. Laisiangthou in hilam thu hualam thu a chi kei hi, tua ahiman ei mani hithei na zah zah toh ih tate khalam hi’n taksa lam hitaleh thil tuam tuam a ih na hil tou den ding uh ahi dan hung musak hi. Tua jiak in tate thuhilna pen adiak in Pasian in pate liangtung ah hung koisak hi. Tua jiak in hih a thupi leh a poimoh mah mah ih mopukna tate thuhil ding pen ih bawl keileh ta ih neiman jong thaman omlou toh kibang ding hi. Ajiak Pasian in ih kep ding ih hil ding a hung piak ih tate ahi, tualeh tate thuhil zohna in pa dinmun zohna namkhat ahi hi. 

c) BANG HUN A HILH DING AHIA: “Thu hung man theih lai in na ta thuhilh in, na hilh kei leh a siat na ding a deih na hi hi.” (Paunakte 19:18) 

Ih pu ih pate in sik asat laipet in sat in chi paunak ana nei uhi. Tuamah bang in ih tate zong a hil thei hun omhi, tualeh thuhil thei hun sung pen sawt lou hi. Kum thum aphak uapat kum sawmlehni aphak hun sung uh ahi tan’gpi hi. Tua ahiman in hih atom mah mah hun pen mansua lou in ih tate limtak in thuhil ditdet ni, aziak ahun sung pen tawl khatsung bek ahi, tualeh hih hun tom leh manpha mah mah sung a ih tate sung a khaichi manpha ih na tuh manleh pa lawhching kihi ding hi. Tua jiak in hih golden period a neu hun sung uh khasua lou in ih tate ahithei zah zah hil in ih tate toh kizopna hoih bawl sawm ni. Aziak hi hun a thuhil napat keileh khonung in hui nungdel leh sialsi nung a sialdai kai na bang lel ding hi. 

d) BANGZIAK A THUHIL DING IH HIA: i) Tate a thuhil nuam lou te in a tate a  mudah hi a, a ta a it te in lim takin thuhil hil uhi.” (Paunakte 13:24) 

Tate ih thuhilna in ih itna lak khiatna ahi, ahin eite ih tate pen neulai uh chi’n kiduat kha den hi. Khenkhat in a gol chiang un ki thuhil naven chi lai uhi. Ahinlah a hung pichin nung un thuhil in vau in phawk lei loi nuak leh loi kilak khial hung bang ta uhi. Eite’n ih tate it kisa in sat ngamlou leh phawk ngamlou a ih omkal un ih tate lam diklou lam a apui pui ana kihi khin ta hi. Tuajiak in ih tate pen ih iit tak tak leh thuhilna toh pan ni. 

ii) “Naupangte sat ding in khongai tadi kei in; satna hangin shi lou ding hi. Chiangduai tawh sat leh chin, a nuntak lawhzaw ding hi.” (Paunakte 23:13-14) 

Ih tate thuhil ding bek hilou in sat a ngaileh sat ding phawk a ngaileh phawk ding hi hang. Hidan a ih na mapui khak keileh hung let nung chiang un innpan in singkhua toh hung delpawt ding uhi, tua bek hilou in na tate lau in inn tung ngamlou ding na hi. Hibang teng a pianglou nang in aneu tung ua pat in thuhil ni. Tu hun in mi lawhching pawlkhat te in a lawhchinna uh thu agen chiang un ka neulai a kapa in hung it man a hung sat man a ana lampial khalou kahi, kapa thuhilna leh satna hang a misuak kahi chi bang jong tampi om hi. Tua jiak in tate thuhil ding pen neu ngaisut kei ni. 

iii) “Na ta thuhilh in phawk leh chin, amah hangin na kipak ding a, na lung hung kimsak ding hi.” (Paunakte 29:17) 

Tate thuhilna pen tate a ding a hamphatna bek hilou in ei a hiltu te a ding in zong hamphatna lianpi ahi hi. A tate a thuhil nuamlou te pen a tate hung pichin nung chiang un a tate uh hang in lungkham den ding uhi. Tua ahihman in tunin nang ma khutsung ah na mailam a kipak nang leh lungkham nang om hi, khoi pen na teel zaw dia, na kipak ut a na lungdam nopleh na tate thuhil kipan ngal in. 

e) BANGZIAK A ANEU UA PAT A THUHIL NGAI AHIA: “Naupang khat a neu lai in lampi dik tuansak leh chin, a tek dongin a lam pial nawn kei ding hi.” (Paunakte 22:6) 

Laisiangthou in a pichin nung in hil in chi lou in a neulai in chi seh seh hi, tua ahiman in aneu ua kipat thuhil ding ahi. Ajaik naupang pen piching toh teh in thuhil nop a, thu zong mangzaw uhi. Mihing hi’n ganta hitaleh a nu te un a neu tung pan un ana hil uhi, tua ahiman in hih a neu tung uh na angsung ah aom nuam sung teng leh na thugen a ngaih nuam sung teng in limtak in nate te thuhilna na piak ding kisam hi. Tua dan a na bawl leh pa lawhching khat na suak  pelmoh ding hi. 

THUKHITNA: Pasian in pa teng teng ih tate chiat thuhil zou sem ding leh thuhil zing zou ding in thupha hung pia ta hen. 

PATE NI ZAK NOP CHIAT NI! 

~ TBCD NEWSLETTER | 16-06-2024


Share:

No comments:

Post a Comment

Comments not related to the topic will be removed immediately.

Recent Posts

Popular Posts

Articles

SUBSCRIBE

Thangkhal Bible in Mobile

Mobile phone a Thangkhal NT Bible koih ding dan

Read Thangkhal NT Bible

JOIN KV fb

ZOMI FINS

PHOTO GALLERY

THANGKHAL COSTUMES
TBCWD TOUR 24-Sept-2022
Kulhvum Prayer

Blog Archive