PASIAN KIPAHSAH IN | December-3

Thupi: PASIAN KIPAHSAH IN

*Tangtel*: _Tuaziehin ka itttahte aw, ka um pet chieng guoh hilouin, tua ka umlou lai a zong thu na man zel mabangun, zau leh chitun pumin na hundamna chiet uh siemkhie un. Ama deilam bawl dinga noute hing utsahpa leh hing semsahpa khu Pasian ahi_ (Philipi 2: 12-13).

Mihingte khu Jesu Khrist ah Pasian kipahsah ding a siem ihi uhi. Ginna ah, silpiehna ah, Pasian thu zuina, nasepnate tungtawn a Pasian i kipahsahna ding un Bible in ahing hilchien mama hi. Tuabang a hing theisah dingin mihing ina ama bouin Pasian a kipahsah thei sih a, nanleh Pasian in ahing thei chien mama a, tuachin A Tapa tangkhat neisun Jesu Khrist Pasian kipahsah theitu dingin eite din ahing pekhie ta hi. Tuami ahileh ahing itna zieh ahia, tuami ziehin gingtuten a thupia azawp ngei uleh tuamin Pasian akiphasah mama ding hi.

Pasian toh ikichimatna (kilawmtatna) in Ama akipahsah mama a, kichimatna kipan in Abraham zong _"Pasian lawmpa"_ chin minlaw in aum hi. Lawm-le-guol kichimatna (kilawmtatna) leh Innsung khat a tengkhawm aikichimatna in Pasian leh a mite kikal ahi ding ahi. Tuama bangin, Pasian kipahsahna umthei lampi umsun khu Pasian deidan, lungtup banga hinkhuo zatna leh hunting a Ama adia ikipumpia zawna in Ama akipahsah mama hi.

Pasian kipahna din nang bang lunggel na nei ei? nang apat piengkhe theite zangkhe ngam lou a phuoldap mai ding maw. Pasian in nan gang it seng man a A Tata Jesu Khrist ahingpia leh, nang zong na hitheina tan a Pasian kipahna dinga hinkhuo zang lou ding maw? Pasian na kipahsah leh ahampha ding khu nang ma hi veve na hi.

*HINNA TANGHOU*

*Pastor M. Thangboi Zou*

_Devotional Message, 2024_

Share: