EC IN GALVAN NAKPI TAK A UPGRADE KUL

TUTUNG Tonzang khuapi banghang kila zo lo mawk hiam cih leh, ei sang in CNA te Galvan themkhat in na update zaw uh cih kimu khia hi.

Pasian lemsak pihna om hi ding hiven mazang tak in kinawk suak zo in awl tak in Tonzang khuapi kitung suak pha hi. Tonzang ih tun ciang in thakhat thu in hawlkhia mang ding ih cih himah leh   ih lamet bang leh i geelna bang in hong piang thei lo hong suak phot hi.

CNA lam te in Fire House leh Covid shelter ah mun la in tua Huang sungah bucip uh a hong pusuak ngam vet lo uh hi. A omna mun uh bawlpha in thautang in zong a pai let zo lo ding zah dong in sik khong tawh uum pha in, kilimgin mah mah uh cih va kimu khia hi. Tua banah drone (bomb) jammer tawh na pang uh ahihman in ih drone te kizang thei lo, bomb ih khiat hang in hong piak thei lo mawk hi. Tua bang ahihman in va kiluh thei non lo hong suak phot a, dam tak a kithawi phat kik ding in ki nusia phot hi 

Note

Hi mun ah ZRA-EC makaite in limtak i ngaihsut phat ding thu lianpi hong om ta hi. Ih budget khat (increase) kul, man power khat kul hong hi ta hi. Ei bek tha tawh piang lo cih ih kimuhkhiat theih kisam mah mah ta hi. Minam buai na, minam vai hong hi ta ahihman in, Zomi khempeuh tawh maitang kituah a ih geelkhop, ih pankhop loh phamawh ta hi. ZPCC bek cih teltal hong hi thei non lo hi. ZPCC, ZDF, ZDCI, WE LOVE, ZOMI INKUAN, SUPPORTERS, etc... te tawh sepkhop kul lua mah mah ta hi. Ih pil theih kei a, ko bek ih cih det leh bangmah sem zo lo kisual thei ding hi. Ih maban sah mah mah hi guai aw. Hun sawtblua ta hi. Ih gam mi khutnuai ah a om ding ih phal kei hi. Hong kingaihsun pha un makaite aw. Ei kisiat hun, kilangpan hun hi dih dih lo hi. Khut kilet hun hi🙏🙏🙏

~ Zogam News

Share: