KHOVEL AH MI HEHPIHHUAI KITAM LUA HI ✍️ Mawi Tawmbing

Pathian in thupitak leh manpha takin hon bawl a, a thilsiam teng teng lak a hoih a sak pen leh manpha pen mihingte ihi. Khovel ah manpha takin i hong piangkhia a, Pathian pina leh kepna toh i nu leh pa te'n deihthohtak leh ittak in hon na kem piching ua, tuisik i hih a hon phankhomtu nu gilsung a i om a mihing hon suahtu Pathian bang i mangngilh hial maimah ua, hon suangtu nu leh pa lungkham saktu leh khasetak a koih tu in i om mai mah uh hi. Pathian in hon bawlna san, i manphatna leh i thupina teng bangmahlou i suah mok uh hi. Amah deihna banga hinkhua zang di leh amah hon it banga i mihinpihte it ding a panpihngaite panpih a, tagah meithaite, daikilkal a chimoh mangbang tasamte kianga itna thu gen a, panpihtu hi ding a Toupa hon seh te ihi. I mihinpihte itna nakpitak a ki ta sam ihi. Poilua!! Toupa itna koppih a ki-it a ki hehpihtuah a, insak - inkhang teng khom dite ihi uhi. I khotang hi in insung hita leh i gam in itna ki tasam lua hi. Na mi leh sa te it lechin vualjawlna na mu ding hi.

Tuchiang in a neizou leh anei zoulou kal ki gamla mahmah mai hi. A haute lah muhthei a hau hulhul mai, a zawngte lah zawng dedeuh mai hichibang khovel a teng ihi. Mi sanga pil zaw leh siam zawte leh a chetheite mah panpihna, itna thilpiakte amu tu a pang hizel. A nei zouloute leh a pau zouloute, a chetheilou te a din khosakna nakpitak in haksa hi. I maban tu dan ngen a hongpai touh zel leh maban lah lungkham huai mahmah ding hi. Khovel ah kihehpihna lah omnonlou, ken ka nek a ka neihnak leh hun chi a om na khovel hita. A chetheilou te leh tanau neilou ten tulai in kilohna di bang le mu zou nonlou, tanau paita, tanau deihsaktu neiloute adin kilohna di le muhzoh louh ahi ta. Genthei leh khosak haksate adin thil bang peuh ah kong bing lua hi. A haksa leh a chetheilou tanau neiloute a di le khualsam le maw!! Pathian in a ki bang a hon siam te ihi ua, kuamah kikhen tuam leh ki deidanna omlou a leitung a khosa dia Toupa hon bol te lah ihi ngal ua. Na nuai a mi di zong le chin nak tam lua hi. Huaite tung a hon om sak a amau te it thei leh panpih thei dia na om lai in panpih na tha sial het ken aw Unau.

Daikil kala kuamah phok phak louh a nawlkhin a om te, nek-leh-tak di neilou a kilohna di muzouloute, silhleten gina neizouloute, etmai a le simmoh huaite nelhsiah in tai san mai kei ni. Pawl tuamtuam ten le amaute tung ah vai diktakin hawmsak ni. Tua ding a Pathian hon bawlte ihi uh. Mihinpihte itna nei theilou tuh chikmah a na muhngeillouh Pathian tuh na it thei kei ding hi. Gamlapi a om te tunga Missonary nna nasep sangin na mi leh sa, na insak-inkhang panpih ngai te panpih in itna toh panpih thei le Missionary nna thupitak a ihi ding hi. I mihinpihte lak ah genthei leh tasam panpih ngai tamlua hi. Lungsim a mang theilou tagah kemtu mumallou te tunga na nnasep Toupa'n a thawn a hon koih lou ding ahi. Pia unla hileh piak na hi ding uh. Itna na nnasep nang adin vualzawl nanak hong hi ding hi. Nang tana beilou ding hi, na insung na zi na tate adin na tu- khang na ta - khang tan a vualzawlna hi ding na hi . Tua dingin Toupa hon deihna bang in iki it di ua i kipanpih ding ua,hileh Toupan hon bawl nasan tawndik in hon thupiakte zui a manphatak a hon bawlna zang manpha hih i sawm chiat di uh aw. Gamsung ah genthei panpih ngai tamlua hi..

Mihing lungtang sia in i mi hinna nakpitak in susia hi. Mi melhoih pi zong hon mel sesak a, mi hoih tampi te siatna lam ah honpi hi. I lungtang siatna a kipan in Setan in panlak na mun in zang hi. Setan in nna thupitakin hon sem a, i lungtang ah ki itna te hon lakmangsak a, ki hehpihna ten i lungtang ah mun nei nonlou in hon taisan ta hi. Huai apat in kingaihsiatna thupitak in hon tuam in, zi-le-ta itna leh hehpihna om nonlou - innsung kidouna leh kinakna phual hongsuak maimah hi. I khosakna te lah niam hiaihiai, zawng hiaihiai, khosa zou nonlou, inn-tum le suang zoulou i gam ah pumdim ta hi. I manphatna leh I hinna thupitak a bawlkhiat te ihihman in, i manphat na te imi hinpih te tung ah,zang thei chiat din Toupan hon vualjawl chiat hen aw.🙏🙏 

~ KV

Share: