KUKI-ZO CHATEN ITHUM’U IMU DIU HINAM? - Dr Sir H H Mate

INDIA vaipo ho kom mah gamtum’a kivai homna ithum uvin eimaho iki lung khat pouve. Kuki-Zo chate hi nomlou jong inam sung’uvah i-um nalai uvin ahi. Akibung khente, akitoh loute, apangkhom theilou ten ipi imu diu ham, sopite? Phaten Kukite kigel phaute. Imel mateu Songkoh ho le Ehsante chule Khamul sao ho jeng’in jong iki tolou jeh ule ipan khom theilou jeh uva einoise mong mong u ahitai. Ichen khom piu namdang te hin Mizo te eiti pove, Zomite eiti pouve, Chinte jong eiti pouvin ahi. Kukite ihi jeh uvin Kukite eiti jing uvin ahi. Athi jouse Kuki thia thi ngen ihiu hi kigel doh leohen phante.

Kuki hi Mizo, Zomi chule Chin a um kahi tihon Thadou speaking hoa dan in gel hiutin, pedoh jong leo hen ahithei deh poi. British record a hi Old & New Kuki a um soh kei ahin, Old & New Kuki chu Kukite ahiuve. Ijam doh kiguot nu hi eimaho political demand lolhin lou na ding bou ahin, miching te hiutin, nam khatna um na ding, pankhom na ding joh kiguon taute. Hitia hi i-um peh peh uva ahileh imacha imulou diu ahi. Geo-politics joh hi phaten chepi pan hiute. SoO group ho bou lam vetna ivet uleh ilolhin lou hel diu ahi. Mipite movement ahat ngai ahi. Tuni channa hi kavetna ahi leh mipite hin MHA toh gam thua talk nei SoO group hohi itosot nao um lou lai tithei ahi. Peaceful rally for SA/UT la akibol khapon, Sit-In-Protest for SA/UT la a-um pon, CSOs lamkai ho le Inpiho, haosa hon thip chet na KNO le UPF ho bou hi lamvet na vet ding natiu hitam?

India vaipoh na la tupet in UT policy or plan a-umpoi tin eidon but uvin, BJP te hin amaho sorkar bou semdoh kitna ding hi akingaito jing’u ahin, ipil lou uva, ichih theilou uleh eilhep chatvai deh diu ahi nalai jin ahi. Kacha-Naga ho alhep chatvai deh uva tol tana anei doh u ahitai. Muivah in gam tin sei henlang, peng peng jong leh akichai ahi tan ahi. Kukite jong namkhat hina Kuki minna SA/UT hi ithum lou uleh imacha imulou diu ahi. Inam sung’uva kibung khen na a-um ding hi sorkar kipana ahin, hiche hi ihet them diu, ipan khom diu ahi.

Politician kahipoi, socialist jong kahipoi, amavang educationist le scientist khat hina dolla 

SA/UT ithum dannu, ikalsuon dan nu, ithusei dan nu chule people’s/public movement umlouva KZC, KNO le UPF hohi ipum nganse uhi hung dih thei ponte. Atoson ding, atilkhou ding mipite ihiu vin, mipite, tichu CSOs lamkai hon mipi pang louva tua talk nei hohi ipum nganse uva, lamvet na ivet laiseu vin mi hi poute kanam mite. Koiman political movement hitia abol kahe kha behseh poi. Sorkar vaipo mopohna neiho toh kihou mai maija gam imu diu vang ka tahsan poi.

Nam lamkai achung’a ho hihen, anuoija ho hijong leo chun phaten planning A-E chan kiguon masat uvin, strategy ding jong guonsan kikoi uvin, BJP sorkar hi delay tactics a hung kichem teitei diu ahije. Inner Manipur a mi tamjo Ehsante ahou kibah pi ho lung joh ahol tei diu ahi. Chule Songkoh te lung jong ahollu ahi. Eiho Kukiten MP jong inei pouve, Outer le Inner a MP teni jong eiho ding’a thu asei lhon lou hel ding ahi. Amipite ding bouva thusei ahi lhon ihet soh keiju ahitai.

Kukite hi UT/State peh thei te ihiu hi India gam vaipo hon amah mo u ahipoi, ajeh chu gam neite ihiuve. India chamlhat na ding’a pan nasatah a late ihiujong ahet nu ahi. Ama bou Kukite sung’a MP ana kaidoh hon UT/State thum ding ana gelkhoh louvu, chule politics kabolle ana ti hon jong inchen doh na ding, min than na ding le let le lalna ding’a lunggel ana nei khah jeh uva kum hijat gamtum ithum vang’uva koiman ihet pih lou, iamcha-a eigellou vu ahije.

Ahileh tua hi Kuki-Zo chate hin SA/UT hi kimu tei nante itiu ham? Ahilou leh ipi lunggel inei uvem? Kum sottah lutna lai inte itiu ham? Mu le mulou ding’a lung thoina nei ding ahipoi. Kum sot le sotlou va boi boi ding jong ahipoi. Muvah ding le mu gei ding chu eimaho Unity le movement a kingam ahi bouvin ahi. Not thapma iki koi diuva ahileh kipat ngai ahi. Meichang lengdoh louva gamtum akimu ding leh aphan, akimulou ding’a ahileh kapdoh tho ding hi hung ngai ding ahi. Hiti ahi jeh a lamkai hon tohguon phatea nanei masat diu, alampi umpen na chaloh ngai ahi.

Read more, click Dr Sir H H Mate 

Share: