24/11/2025 (Mon): Sangai Festival a kipat akiphinna un maban sawn zel in, tuni in leng IDPs @Talpakte'n Dolaithabi, Kangpokpi, Talpakte toh gamgi (Saikul area)/ buffer zone kaan/ lut dia hong kisak ziak un, CF leh SF/ Police te'n ana nang uhi. Himahleh, Talpakte Dolaithabi khosung lut man pawl om uhi. CF leh SF te'n leng pan' nasatak in la ua, Talpakte hawldalhna di'n teargas tanpha zang ua, liamna tuak bangzahhiam om uhi. Akibuai sung un, security te' gari glass ana suksiat sak man pawl om ua, huaite leng mat hingal bok uhi.
Thudondan in, tuni a hichibang thiltung toh kisai in Eilam CSO, Central Force, State Force/ Police leh SDC tel in Talpakte'n hong phaakna mun uah kihouna ana om a, CSO lam in dotna khenkhat bawl hi. *"Bangziak a Talpakte'n buffer zone hon peel thei uh ahia? Noute ka hon muan ziak ua, ka hon ngensiah uh ahi; bangziak a hon lutsak na hi ua? Huchia nang zoulou ding na hih uh leh hon lutsak lel un, kou toh ka kinawk na ding uh"* chihte dotna luikhia uhi.
CF/ SF/ Police lam in adawnna uh ahihleh: *"Tuni mi tamlou uh hidan in ka mu uh a, himahleh anung ah mi tamtak hong pai beh2 uhi. Numei ngen hong pai masak ziak ua nang zouloukha ka hi uh. Ban ah, Sangai Festival ziak a Numei Sepaih te ka lak ua tellou uh ahihman in deih bang in kigamtaang theilou hi. Nou hong kisalah kei phot un, kap angaih lehleng kou ka kap na ding uh. Tuban, hiai bang in ahong om thei nawn kei ding uh"* chihte adawnna uh hitaangpi deuh hi.
©️𝐙𝐨𝐠𝐚𝐦 𝐈𝐧𝐬𝐢𝐠𝐡𝐭
.jpg)
.jpeg)
No comments:
Post a Comment
Comments not related to the topic will be removed immediately.