NAMPI PONLAP UMDOH DAN CHOMCHA HILCHETNA

[9 Sept.2023 - 19th Feb.2026)

[ Inset: Indian National Flag & Kuki-Zo Flag ]

Background:

2023 September date 3 a, Peace Ground a KCLF makaina a Joint Fellowship "MIPI TAOKHOMNA" kingon a VV hokhat Gl. Ginjamang Misao in Flag thu anaseina chungchang Social Media a nasatah a ki-oimona leh kidemtona ana um in ahi. Hicheni  jankhang kimlai-  11:40 Pm vel in Lamka langa Gollhang Chapang 20-30 vel Ginjamang te Inn halding in Pangjol langah akikoukhom uve tin thulhut ana kimun ahi. Lungkham tah a aki umjing laiyin KSO leh ZSF ho akihetsah in amahon ahin boipi un boina umlouvin ana sutoh un ahi.

Hijehchun September, date 9, 2023 nikho every Saturday Fasting Prayer na mun ah Nam Pumpi hopding Ponlap Pathen kom a thum ding in ngehna ana kineiyin ahi.

Lhathum lhinding kon chan a donbutna kichehtah Pakaiya kon a ana umlou chu, lung opkaina nasatah ana kineiyin ahi. Hinla 9th December 2023, Saturday nikho Every Saturday Fasting Prayer kimanna ah Prayer Warrior akinganse hon Report anoiya bang hin ahin peuve;

1. Akhatna a Kuki-Zo Nam mite hi Millennium thah a Vannoiya Gospel thupha lhangsap ding mopohna chanding ahiutoh kilhon a, amasa pen a CROSS hiding ahi.

2. Anina a Manmasi chilhah nahiu kihetna a Manma Ahsi @ David Star hiding ahi.

3. Athumna a, nunnemna leh kitahna a Vannoimi ngaisang leh ngailut nachan nadiuva VAPHOL (Hornbill) hi nanam u kihetna leh melchihna hiding ahi.

4. Alina a Nampi Ponlap chu akimkhat avom (black) hiding chuleh akimkhat akang (White) hiding ahi.

Hiche hi lha 3 vingveng nisim-niseh a TAONA a kon a Chin-Kuki-Mizo/Zomi kiti jouse hopsoh keidinga Pakai Kom a kithumdoh chu ahi.

A design ding dan chu hahsa ana kisalheh in ahi. Lhakhat lhingdeh sung a Gl. Francis Ngamgunhao avel vel a design anakibolsah ahi. Ajona in office mun a, tua kimu design hi WKZIC member Khangthah mi 6/7 hon avelvet kit uva, tua hung kiboldoh hi hung sohdoh ahi.

*'NAMPI PONLAP LHANDOHNA'*

* Nikho: 28th December, 2023,

* Amun: WKZIC-GHQ Office, Tuibong, Lamka, Songpi,

* Thempu: Pr. Kamboi Haokip, IBMC

Hiti a chu kilomtah a kouding a lom jouse kikou a achesa 28th December, 2023 nikho a Pakai-Pathen min a lhandohna ana kinei ahitai.


# NAMPI PONLAP UMDAN HILCHETNA

Nampi Ponlap kuple-kaiho (Ingredient Symbols) leh avetsah ho hilchetna anoiya hi ahi.

1. CROSS: Christa thupha phongjal dinga ngansena kipe. Asan (red) in avetsah hi Christa thisan bouva Nampi kitungdoh ding ahi.

2. MANMA  AHSI (David Star): Abraham chapa, Joseph chapa lenjo pa Juda upa Manasseh (Manmasi) chilhah nahiuve/ kahiuve tina ahi.

3. VAPHOL (Hornbill): Vaphol hi vacha lah a, nunnem leh kitah, iham tia aji in thina aneikhah jongleh jidang neichom louva, athichan a ajipuul douva kitah tah a umjing ahi. Kuki/Zo te Nampi Vacha (National Bird) hiding, mipi jong Vaphol bang a nunnem a kitah ding vetsahna ahi.

4. AVOM (Black): Ponlap kimkhat a Avom in avetsah chu Kuki/Zo Nam miten genthei athohna Millenium vetsahna ahi. Zalenna gam lhunphat jong leh achesa phat a Nampi jal a gentheina leh thina anatoh jouse geldohna leh melchihna ahi.

5. AKANG (White): Ponlap a Akang in avetsah chu Zalenna Millennium melchihna hijing ding, ijakaiya thenna hinkho (nehguh-chahguh leh akiselguh umlouva) Zalenna Gam a kivaihop ding vetsahna ahi.

# *Ponlap Jemkoi (Flag Design) Hilchetna*

1. Ponlap a Cross avai a kikoihi Zomi Ponlap a kon a kilason ahi.

2. Cross lailunga tah a Manma AHSI (David Star) kikoihi Kuki leh Chin minam leh Sepai hangsan jouse melchihna dinga kilason ahi.

3. Manmasi thucheng kimanghi Hmar minam leh Tuipisen (red sea) melchihna a kimang ahi.

4. Ponlap a avom leh akang hi bolthu hilou (original) Kuki/Zo Nampi hi Khurmi (old Kuki) ho jaolou a bulhing lou ahi tina ahi.

~ World Kuki-Zo Intellectual Council (WKZIC) ~ 

Share: