1st YMA President: Rev Lewis Evans

 YMA PRESIDENT HMASA BER REV. LEWIS EVANS (PU NIARA)

(YMA Day Pualin aw)

Pu Niara hi a hming tak chu Lewis Evans a ni a. Amah hi Engineer a nih avângin Mizovin Pu Injiniara kan ti a, a tawi zawngin Pu Niara tiin kan ko ta a ni.

A tawi zâwngin; Mizorama a lo chhuah chhan ber chu Welsh Mission-in amah engineer a lo ni sa nen, Mizorama in sak tûr eng emaw zât an neihte sak pui tûrin an rawn dah a ni ber. Pu Niara hi Wales-a piang mah nisela; America-a pêm leh a ni a. Mizoten engkim hriain an ring! 

 A nupui Catherene Evans kha nu hlim thei tak a ni a, Mizoten Pi Hlimi an ti hial reng a. Vânduaithlâk takin Pi Hlimi chu October 11, 1933 khân a boral ta hlauh mai a. Pu Sandy-a thlân bul, Durtlâng Biak In sîrah an phûm ve ta a. 

Nimin khan a thlan lunga thu an ziak (original) chu thla han laktir ka tum a, inkharkhipna (quarantine) hmun atan an lo siam ve avangin ka duh a hlawhtling thei ta lo.   

 Durtlâng Damdawi in bakah; Synod Bangla pui, Senior Executive Secretary apiangin an luah ṭhin leh P.C. Girls’ School bula Executive Secretary Bangla te hi ama kutchhuak an la ni a. Dâwrpui Biak In hlui saknaah pawh a kuthnu eng emaw zât a awm bawkin an sawi.

 June ni 15, 1935 zânah Sikulpuikâwn bula Nepali School-ah Vântlâng inkhâwm ropui tak an ko va. Kan mi hmasate khan Bati chhit chu an lo hlau vak lo pawh a ni ang; puithu takin Mizo tlangvâl lehkhathiam ṭhenkhatten sathau khawnvâr (candle) chhiin YLA (Young Lushai Association) din a ni tih an entîr a. 

Kum 1935–36 hruaitu tûr an thlang a, an thlante chu hêngte hi an ni–

 President : Rev. Lewis Evans (Pu Niara)

 Vice President : Miss. K. Hughes (Pi Zaii)

 Gen. Secretary : Pu Ch. Pasena

 Asst. Secretary : Pu Vankhuma

 Treasurer : Rev. David Edwards (Zorema Pa)

YLA tih hi a hnuah YMA tia thlak leh a ni a. YMA President hmasa ber chuan kum 1936 September thlaah an ramah min hawsan ta a. Kum 1947, October ni 19 khân ama in Llanbedr, Merionethshire-ah kum 66 mi niin Lalpa hnênah a châwl ta a ni.

Thu lakna: 

- Prof JV Hluna, “Mizoram Welsh Missionary te chanchin” revised&enlarged, 2016.

- Rev Dr C Chawnghmingliana, “Khawvel Sunday School Ni Thupui Lakkhawm 1949-2017” SL&PB, 2018.

Copy paste

Share: