ZOGAL DAY 2012 ~ Suanlyan Tungnung

"Tuizum mangkang kiilbang hing khang, Zouta kual zilbang liing e Pianna kagam lei hie, phal sing e. Piangam lei leh I Zogam nuam Lal kanaw sansi’n zel e, Ngalliam vontawi ka laulou lai e".

APAISA March 17, 2012, in Zogal Memorial Hall Complex, Pu Zo suan-le-haahte’n ZOGAL DAY thupitah in akimang hi. Mun tuamtuam apat mipi zatam hingpei khawm, UZO Lamkaite lunggeelsiemna toh tambang hun thupi akimang thei khat asuoh hi. Mi tampitahte’n Zoutate simmawbawl a nuoinet asawmlai un, tam bang nipoimaw thupitah imanthei tah un, "Ki maimai nonsih e" chi lungsim ah hing kilang a, hamuonhuoi leh kiletsah huoi kasa mama hi.

GS Haupu, President UZO leh Zou nam in I kisahtheipi uh Singngat AC MLA in Day honna aneijou in, mipi ding in, Pu Haumang, leh Ronald Lalpu lamkaina in UZO LAPI sahna akinei hi. Tam lasahlaitah in ka-daah koikoi a, ka silmu khat in kalungtang teipi a sutbang in anasah hi.

Zogam a upa chingkam, lamkai pil leh siem, solkal a officer lienpipi, MDC leh social worker tamjatpi’n a-awnei tengteng uh suo a UZO LAPI chitahtah a ahing sahkhawm uleh "PANGKHAWM TAHTAH hita hai e maw" kachi hi.

Ipu leh pate’n Zogal ana saatlai un be-le-phung, nei-le-lam in mi ana khensih ua, Zou nampi hatnading, suoh-le-sal a umlou nading in lungkituoh tah in ana pankhawm dingdan uh ka mith in amu hi.

UZO Adviser Pu Liankap in nouneeltah leh chiengtah in Zogal tanchin ahing suut a, mipite hitui pawtlou giap in aki um hi. Tambang a ipu leh pate ana pandan loptah maimai hilou in, aki thutuohna, chiitahna leh kipumpieh zawnate uh zuitah nalai hilou ama chibang lungsung ah ahing lang hi.

ZOU NAMLAM KIDEMNA Pu Vumchinkhup lamkaina nuoi ah akibawl hi. Kidemna maimai hilou in, asiem penpen 3 natan nuomman piehding achi nalai uhi.

BOAT, Imphal a ZOMI NAMNI 2012 kibawllai ahing langtha kia hi. Zomi Namni lopna ah nam tuomtuom in eima namlam chiet mipi mai ah laana akinei hi.

Zou Cultural Troupe painading ahing tuongkha tasih hi. Bangzieh a tambang um ata diei, Zou tate hing kimangngil ata maw, chibang kalungsim ah ahing pawt moh a, Zomite kikhaikhawmna lienpen:

Zomi Council a secretary – Pu KG Tungnung
ZYA a secretary – Pu Thangzamang
ZSF a lamkai leh Zomi Namni lopna a organizer, ZSF secretary – Pu Malsawm
Journalist lam MHJU a secretary – Pu Lun Samte

Sugnu ZYO ten mipi mai a ahingbawl ua, Zouthau ahing kap tah un, mipite kipah sengseng in khutbeh ging leh mipi thawm gamlapi apat jahthei ding khop in aging hi.

Contestant 2na – Zogam Leidi Party ahing lutkia uhi. Zou ngainatna lam ah ei akhangdawnglai kichite sangin ahat in amuonhuoizaw bang in akilang uhi. Lamtuol ahing kaai ua, alai ah khutjaah in mi khat hinglam jel, khat in hengjel in, ama uh leenlai a abawldan mama uh bang in ahing lam uhi.

Pu Liantung inn, Zoveng ah lam kai in, ama uh leenlai late sa in sawtpi khat hunnuom amangden nalai uhi.

Muollum area apatsa’n Zoutumtai kichite ahing kuankia uhi. Nidanglai in guollui mite lou akuon chieng un SUNSIE/SUN ANN a pawjel uhi. Izawn-leh-ngau jieh atadiei mah sunsie nasan zong busi (rice) hilou in buchiim, gatuichiim, vaimiimchiim, taangchiim chivel ahi tuoh hi. Apuoh nading in UUM (gourd) liente ana mang uhi.

Chief Guest Pu Ginsuanhau, Honble MLA, Singngat AC leh President, UZO in ahun ahingla hi. Aman nam lamkai tuomtuom leh Zou sung a mipoimaw tuomtuomte a dinsah ban ah, tambang hun a hingpang manlou, Zounam ngaina kichi hotel lahvel a migensethei maimaite amawsah thu zong agen hi.

ZOGAL MEMORIAL CEMETERY bawl teitei ding chinzong mipite mai ah atangkoupi hi.

MLA ahina toh kisai a maban panlahnading tampi a umdan, Zou khuo adieh a Singngat AC puotha kia, solkal nasemte asepna mun a a umding, solkal sangsiete zong skul akai ding leh akailou a umleh akituohpi action lahding ahidan zong sieng sitset in agen hi.

Chief Guestpa’ zi Pi Luaithianching in Zogal Day organizerte panpina ding in India dangka 50,000 (Siing nga) apia hi.

Mipi kipah in KALAISAI samna thupitah akinei hi. Tua thamlou in, Chief Guest in NIGHT PROGRAM toh kisai in mipite ngaidan ahing dong a, mipi paikhawm teng in NIGHT PROGRAM a umding akidei zieh in ‘A UMDING HI’ chi’n pulahna ahing nei ngal hi.