ZAN CHIANG EIMI ROOM AH MIVOM UM ZEL

(Investigation By Zogam Today)

 

DELHI a um eimi numei khat umdan lam dang mama mai. Ama khu kum 40-50 kikal nupi khat ahi. Delhi a eimite tamna mun khat ah numei teirawl thum toh um khawm hi.  Amanu khu siemna pilna a neilou ziehin inn ngah, anhuon leh puonsawp chi vel bawl in um hi. Sil lamdang mama um. Nupi nu’n eimi nungah teirawl thum tah umpi a, tua teirawl te’n zaan chieng office tuomtuom ah nna sem in um vevaw uh hi. Night Shift a sem ahih chieng un, innluo uh room nih khu zanchieng free gige suo hi. Hinanleh a ong man ngai shi. Mi tuomtuom, namdang pasal tuomtuom tami room ah kimu kha zel hi. Monday apat Saturday zan dah 7/8/9 lahah meltheilou pasal toh eimi numei tami room ah umkhawm kimu gige hi. Khat veivei a theiloute di’n a umpite uh kisahthei thamtham hi. Tuobang ana hiteuh sih a, sil khat chu um!

 

Tam numei khangnoute sep kaal chieng eimi numei khat kolvom toh kingai a kigen, khatvei leilah Tibetan pute mihausa khat puilut zel thei khat, hing va zelzel hi. Tambang mite khu tuo nupi nu’n ana vaitun sepsop a, neh-le-dawn ding ana bawlpiah semsom in akipei khu vengvung hi. Tuabang a bawl khiet chieng, nupinu khu kitchen ahilouleh a room khat pen ah a umsan zel a, tua a kop a hing kholai lengte khu tua room khat ah umsah hieu zel hi.  Nupinu in room ni nei ahichieng ana ngainatu ana tam dan akhu! Tua eimi numei nu (eimi film bang’e khat a zong pang kha dan in kigen lai) in a ut banbang in pasal niteng phiel in tami room ah hing zawpi zel hi. Pasal tuomtuom toh valut zel uhi. Bang bawl uh ata diei, kithei zou talouh! Theilou kaal in Delhi ah Eimi Hotel (amin phuo tawm) ana um khiinkhien dan akhu.

 

Tami hotel (room) ah ju-le-sa toh nuam tahin au zuozuo uhi. Tami sungah kol pasal banah mivom (negrote) a kimu a, tualeh Tibetan puteeh mihausa mama khat zong vah lut gige hi. Innsah innhang apat bangma theikhiet ding dan a um theisih. Nupinu (hotel manager chi mai vai) khu vangsiet huoitah mai in Lamka buoilai in a pasal singnuoimi dia gingmaw pawl khutah ana muolliem hi’n gen a. A pasal shi zaw apat in hinkhuo hasah tah mai in ana um a, a tate a vah zouna di’n business neuneu nou ana bawl ngai hi’n zong gen. Tu’a Delhi mun ah bawlthei septhei a um khahleh chi’a lametna lienpi toh hing kalsuon dan ahi. Kum 40-50 kikal mi ahi. A tate Manipur ah um ua, amaute zong thagum a nek-le-dawn sui tawm ahi dan uhi.

 

Eimi numei khat mah, a mel apat nupi sa hidi’a gintat huoi. Hinanleh a mel hoi mama a, a duong chieng hethot, feet 5 leh inchi 3 vel a sang, mi tha ching mama khat zong hinkhuo pamai tah in zang. Ama’n a lompa a chipa khu hing puilut gige dan hi’n gen. Ta numei tegel a meel ua pat bangma gingmaw theina ding mawngmawng um lou, kamsiam dan uh, a fel dan uleh mi um chitchet ahi uhi. Apulam apat bangma theizaw guol ahisih hi. Tambang a eimi numeite a um khu lamdang nasa ei? A beisa kha thum sung vingveng Zogam Today in a khap uh ana sui hi. Min, khuo leh a sepna uh thup ahi.

*This is exclusive for Zogam Today. Publication in other media is strictly prohibited.

- INVESTIGATION TEAM | ZOGAM TODAY

...

Share: