Dress Code: Zou Traditional Dress

Tunai a Dress Code: Zou Traditional Dress kibawl khia khu a hoina um hi. Tami dress code khu tukhang adia silhoi ahia, ahun leh amun dungzui in a poimawna hing um touzel ding chi a gintat huoi hi. Tambang ang pieng khiet pen i society in poimaw mama hi chi a ensah a, khantouna lam ah kal khat kisuon beh chia zong ngaisut thei ahi. A bawltu te’n a sialam ding sang in a hoilam ding ana ngim zaw ding uh chi a gintat huoi. Tami dress code ahileh nopni-dahni a sil thei ding deina toh hing kibawl khia hing a kilang a, a hoilam chu ahiphot mai hi.

 

Shini-manni chieng ZYO ma ahi lusunna tuo innsung mite leh mipite adia nna sem pen. Tambang hun ah nungah-tangval ten dress code khu sil teitei ding chi hisih nanleh a siltu te’n i nampuon uh hing suhlang ding ua, i nampuon suh laartu in ang pang zaw ding uhi. Tua thamlou in tami dress khu zap zaangkhai khat ang suo ding a, a diehin khangnou te’n bang sil ut deuta ding uh hileh a kilawm hi. Shini manni a smart tah a coat-suit toh kichei saang in tambang dress in kivon lei etlawm zaw ding hi. Mi tengteng in sil chiet ding chi a hituon sih hi. Tami khu shini chauh a sil thei ding ahi sese sih a, hun-le-mun tampi ah zong zatthei hizaw bawn ding chi gintat huoi hi.

 

Tami Dress Code in i Zou Traditional Dress uh suhsia kha sih chilei i khiel sih ding uhi. Kumkhat ah Zou Traditional Dress bangzat vei i sil ngai uoi -- nihvei thumvei kaan a sil hun um lou hi. A kisilni deute ahileh Chavang Kut leh Zomi Nam Ni chauh ahi. Tuabang hun chieng Cultural Troupe (a laam pawl) te'n a tangpi’n sil giep lai uhi. A dang a sil mu ding a tam khawl sih hi. I nampuon uh kisil ngai senglou china akhu! Tutunga nopni-dahni a sil thei dia ang um khu a saitute pahtat a huoi a, tha-le-zung banah sum-le-pai tampi a seeng ngei ding uhi. A hoilouna gen ding chilei a bei tuon sih ding a bangma kiphattuompi tuonlou ding hi. Tua saang bangchi ‘popular’ sah diing chi ngaituo khiet a khantou huoi zaw hi. Shina i chi khu michin tung a tung ahi. Tam hun chieng a dress code nei khu sil kilawm mama khat ang hithei ding hi.

 

I cultural/traditional dress uh i maw sil ngai vateh sih uhi, a sil munte a changkang lou mimawl dan a ngaisutna i nei zieh uh khat eh! Dopni-dah ni’n Lamka khosung ah nampuon toh kivon mu di’ng vaang mama mai. A taangpi’n nampuon uh tulai khang toh kituo a sil thei dia a umlou zieh hikha ding hi. Tunai a dress code hing um khu michin aneu alien in sil theita ding a, kichei kizepna lam ah masawnna chi khat ahi chi thei ahi. Tua khu a hoina khat zong ahi.

 

Khanglui dan a kicheina hun kichi khu a tawm deudeu a bangta a, tuazieh in tu’a dress code khu khat-le-nih in hing sil maimai leu zong a hoina umleh kilawm zaw bawn hi.  Tami kibawl zieh a i traditional dress uh mansuo lampang a pei ihi sih ua, a kembit lam kihi zaw hi. Khenkhat te’n zong shini-manni a sil ding dress nei uhi.  Tami dress in traditional dress suh daau ahilouleh ngiemsah tuom lou ahi chi a mu thei hi. Nopni-dahni a tami dress code a kivon teitei ding chi lungsim i neikha ding uh zong a zauhuoi hi. A nei leh aneilou kikal zong theisiem a ngai ding hi.

Editorial, ZOGAM TODAY

 

-:(28-01-2013):-

Share: