Lamka Exam Centre

Tutung Staff Selection Commission (SSC) nuoi a Lower Division Clerk (LDC) leh Data Entry Operator (DEO) Exam result ah Churachandpur Exam Centre (5502) in North Eastern Region sung a Centre teng lah ah bawl hoi pen in pang a, kipahpi huoi mama hi. Tami SSC Combined Higher Secondary Level (10+2) Examination 2012 ah Lamka (CCpur) Exam Centre a pat mi 3500 vel lah ah 52 in lawchinna mu ua, maban ah ang lawching sem ding uh Zogam Today in deisah mama mai hi. CCpur Exam Centre ah ningkum Oct 28 ni’n a masapen ding tami exam um hi. Tutung result a mi 52 lawching khu a tawm a bang a, hinanleh Centre dang toh teeh in tawm tuonlou hi.

 

North East sung a Exam Centre-te result enzuol vai. CCpur (Lamka) Exam Centre 52 (LDC-33, DEO-19), Imphal 36 (18, 18), Shillong 30 (21, 9),  Guwahati/Dispur 25 (17, 8), Kohima 18 (10, 8), Jorhat 10 (4, 6), Dibrugarh 9 (6, 3), Aizawl 8 (6, 2), Silchar leh Tezpur 4 (3, 1) tuo, Agartala 3 (2,1), Lakhimpur 2 (1,1), Goalpara 1 (1,0), Itanagar leh Tura Exam Centre ‘Zero' tuotuo dan uhi.  Manipur toh teeh a Assam leh Meghalaya State khu siemzilna mun hoi leh khangtou zaw a thei ahi a, hinanleh SSC Exam 10+2 Level ah Manipur nuoi lam ah um pha ua, tuoleh i State Capital uh sa’ng nasan in zong bawl hoizaw nalai hi.

 

Tami Centre ziehin mitampi’n Government Service adiehin Central Service ang mu semsem ding uh a kinep huoita hi. Hasah pipi a mundang gamdang a exam dia kuon ngai nawnlou a i innmun ua pat SSC 10+2 Level Exam thei ahita chi khu hamphatna lienpi khat ahi chi ang geeldaw sah hi. Tutung a lawsamte din beidawng ding ahisih a, maban ah hing um zel ding a, tuami adia ana kisahkhol zaw ding ahi. A hamphat huoi dan i theisiem uh a poimaw hi. Nu-le-pate hing kinepna uh suhpiching sah ding tate mawpuohna ahi chi thei kawm in tami exam tup tinten a muolsuo teitei ding chi manghil lou ding ahi. I gam uah State Service kinep huoi senglou in a kigen a, tuaziehin i innmun i loumun ua pat exam thei teng khu a zaal zou sawm ding uhi.   

 

Tunia tambang exam kibawl thei dia pan ana late tungah a lungdam huoi hi. Tami 10+2 Level Exam chauh adia Exam Centre hilou a adang tampi exam theina dia kituotah a panlah tou zel ding a dei huoi. Azieh ei singtangmite din Imphal, Guwahati, Bangalore, New Delhi leh mun dangdang a exam pe dia kuon zoulou zong tampi ki-um thei hi. Tuaziehin Lamka khu Exam Centre poimaw teng tun sah ding chi khu tu dinmun adia i poimaw pen uh khat ahi. Exam tuomtuom banah College/University Admission-te Entrance Test/Exam Centre khat zong suo zou lai lei i maban uh a limchi deudeu ding a gintat huoi hi.  

 

Hunbeisa a Churachandpur District Students Union (CDSU) pawl leh mi tawmngai pawl in Exam Centre umtheina ding a pan nasatah a ana la uh tua aga hing ki-at panpan ding chi muh thei in um a, ana buoipite pahtat huoi mama mai hi. Lawching atam atawm thu hizaw lou a mipite hasatna suhkiemtu banah mipite maa khuoltu hi khu a poimaw mama mai hi. Exam dia mun tuomtuom zawt ngailou ah i khawpi ma uh Exam Centre khat suo ding chi khu tunin a dei huoi hi. Tunia sangnaupangte adia lampi hawn sah phawtlei bangzat hiei khat chu mangthang lou ding hi. Tualeh maban a exam pe dingte zong nasah tah mai a kising sah a, a tamzaw sem a lawching tou zel ding chi tup a hoi ding hi. Lamka Exam Centre poimaw tah khat suo ding a dei huoi a, tam khu sawm theilei hoi va ei.

Editorial, Zogam Today

 

-:(29-01-2013):-

Share: