Delhi Police leh NE Student ten Co-ordination cum Review Meeting nei

New Delhi, May 2, 2013: Tuni zinglam dah 10 apat nitah dah 1pm tan Robin Hibu (IPS), Joint Commissioner of Police, Delhi (AMGUT:1993) lamkaina nuoi ah Delhi Police leh North East Students te’n Coordination Cum Review Meeting, Arunachal House ah nei uh. Tuanah NE states – Assam, Arunachal Pradesh, Mizoram, Manipur, Meghalaya, Nagaland, Tripura and Sikkim a pat palai (representatives) ban ah student leader, social activist, pastor, church leader leh mi tawmngai bangzat hiam peikhawm uhi.

Tami meeting ah Delhi leh akimvel a um NE mite tunga hasatna tuomtuom tungte suhkiem theina dia panlah nei uh hi’n thu kiza hi. India khawpi (capital) Delhi ah NE mi tampi suhgenthei ban ah vuo-le-saat thuo tampi um a, tualeh NE numeite tungah kilawm lou tah a gamtatna atam zieh in IPS officer Robin Hibu in a ngai poimoh dan thu Zogam Today hil hi.

Robin Hibu ahileh Delhi a NE mi IPS 9 vel om lah tambang a NE mite hasatna ngai poimoh mama khat a thei ahi a, ama panlahna zal in Delhi Police for North East (www.dpfne.com) kichi dinkhiet in ana um a, tami ah NE state chin apat State Representative (Palai) lahlut in um hi. Tami representative-te ahileh Delhi Police toh kithuo in NE mite hasatna tuote panpih ding a um ahi uhi. Amaute khu I-Card bawlsah ahi uhi, chi’n Hibu in gen hi.

Agenbehna ah adiah in NE mi Call Centre/BPO a semte apat complaint (80%) kimu hi, chi. Tuazieh in Under 144 Cr.PC (Delhi Police) nuoi ah Call Centers/BPOs a sem numeite zaan chia a umna inn (room) tan security guard in a ha (drop) teitei din order khautah suo in ana um hi. Tami dan zuilou Call Centre/BPO-te khu danbang a gawt theih ahi ding uhi chi’n Hibu in gen hi.

Zogam Today kung a agenna ah NE numei hi’n pasal, koipou zaan a gari (auto/taxi) mu zoulou lampi ahei, heisung hinanleh Emergency No 100 call bawl ding in gen ding ahi, tuahileh Police te’n hing pick-up ding ua, na umna tan uh hing kha ding hi chi. Tami thu khu Delhi Police thupiah (directive) ahi, Police ten a zui ding uh ahi chi.

Tami meeting ah NE Helpline General Secretary Dr Alana Golmei in agennah a Delhi a hibiang a NE mi hizieh a hasatna a tunna tungah Delhi Solkal maw sah mama mai a, Indraprastha College (Women) Assistant Professor Lianboi Vaiphei in NE numeite chouh hilou in numei kichi teng tung ah bawlsiatna tung thei gige a, tuate kituatah a doudal ding dan ngaidan sung a, NTBC Delhi Pastor Khamkhosiam in JNU a MA a bawllai a Robin Hibu toh ana kithuo dan uleh Robin Hibu in hibang NE mite adia pan anglahna tungah a kipahthu genkom in hisang a ma lasem din chial a, tualeh Journalist Bruce K. Thangkhal (NE Helpline & Zogam Today) in Delhi Police in NE mite hasatna ngaisah ahilou dan mipi mai a gen khia uhi.  Robin Hibu in maban ah NE mite hasatna thu nasahtah a thuneitu (higher authority) ah ana tut sawn din NE mite kungah vai ha hi.

Tuni meeting ah student organisation telte: Arunachal Students’ Union Delhi, All Assamese Students’ Association New Delhi, All Bodo Students Union Delhi Unit, Naga Students’ Union Delhi, Kuki Students Organisation Delhi, Tripura Students Forum Delhi, Delhi Achik Youth Association), Sikkim Students Association Delhi, Manipur Student Association Delhi, Delhi Mizo Zirlai Pawl leh Zomi Students’ Federation Delhi Cell.

~ ZOGAM TODAY

Share: