B’lore ZPYF in Youth Day cum Seminar Nei

“Tuni'n Khantanhoi midangte kunga phuangkhia thei ding in Khanglate ikisah uh hunta hi. I hindan un, i hinkhua un, i omdante un Pasian mai ah gimnamtui sah va ui. I umna chin ah Pasian adia gimnamtui hidin Pasian in nang leh kei ang dei hi.”

BENGALURU — Tuni, 26 Aug 2018 (Sunday), zinglam nai 11am in Zou Presbyterian Youth Fellowship (ZPYF) in Youth Day cum Seminar hun nuom tah mai in Zou Presbyterian Church Synod (ZPCS) Biehinn, Kammanhalli ah zangh uhi.

Tami program pen hun nih Worship Service leh Seminar in kikhen hi. Praise & Worship Team makaai in laa ngai tah tah toh mipi te'n Pasian kiphat zieh zieh hi. ZPYF lapi kisah zaw in Lia Zou Mary in LATE (Psalms) 40:5 [Aw Mangpa ka Pasian, na nasep lamdang tahte leh, koute dinga na lunggeelte atam mama a, tuate na masanga suhlat seng guol ahi sih hi. Tuate phuongzah a gen ding hita leng, simseng guol ahisih ding hi.] simin thumna toh hun latna Pasian kungah neih in hun patin um.

Vaidawn thugen ah tangval Lawmthang, Assistant Secretary, ZPYF, Bengaluru in Pasian kungah kipahthu tut kawmin mipite tungah lungdamthu tun hi. Tawikhawm latna Upa Kaiminlun in nei a, tualeh mipi thumkhawmna zong um hi.

Tunia Speaker a kiguat, Pastor Mc Ginlianthang in Bible mun nih -- 2 KORINTH 2:14 [Hinanleh Khrist a guolzawna hing pe zelpa leh koute zang a mun chin a Ama theina gimnamtui theisahpa Pasian kungah kipah thu umta heh.] leh EPHESA 5: 1-2 [Tuaziehin ta deinoute bangin Pasian umdan zuite hi un. Khrist in eite ahing it a Pasian kunga sillat leh kithoina namtui dinga akipieh bangin itna ah um un.] simin, “KHANGLAI KHRIST ADIA GIMNAMTUI” chi thupi a zangh in Khanglaite thumawpna nei hi. Khanglaite khu Pasian mai a siangthou ding ahihdan a thupi in nei hi.

Pastor Mc Thang in Tulai ei Khristiante i saptuam sunguah khanglai Pasian adia 'gimnamtui' kitawm ta ma ma chi a puahnat dan leh a ngai poimoh dan thu gen. "Khanglaite tuni'n Mission leh Evangelism bawl ding kisam ma ma ihi uhi. Mangpa'n i mimal chin uah tami bawl ding ang han hi," chi. Khristian ihileh 'tangthupha' (Pasian thu) gen ding khu ei mimal ah mohpuahna Pasian in ang piah ahi hi chi. Piantha hingal hingal a, midangte kunga 'tangthupha' gentehilou ihi uleh va'ng iki etthakia uh a poimaw hi.

"Tuni'n Khantanhoi midangte kunga phuangkhia thei ding in Khanglate ikisah uh hunta hi. I hindan un, i hinkhua un, i omdante un Pasian mai ah gimnamtui sah va ui. I umna chin ah Pasian adia gimnamtui hidin Pasian in nang leh kei ang dei hi".

I tenna Lamka khawpi i chieng, Hundamna Camp-te ah Pastor-te, Upate pang mong mong ta lou, zukham, khamthei bawl, mihoih louh chia igente chauh ikhumkhawm ua, Pasian thu ngaikhiet khu i poimoh ngai sih uhi chi'n gen.

I kingaisut ding ua hoi khen khat - (1) Pasian ading ka gimnamtui ei? (2) Saptuam adia pan ilahnate uh, i biehdan te uh, i lasah dante uh, Pasian mai ah gimnamtui ahi nadiei?  Hundamna thu na lawmte kunga na hilthei sihleh na kingaituah tha ding ahi.

Speaker thugez zaw in khanglai te'n thu-le-laa kidemna nei ua, khanglai phabeppi thanuom tah in kidem neinai uhi.

Tuzaw in tawpna leh annkuang thumna Pa Soson, advisor, ZPYF in nei a, tuachi'n mipi te'n ann-le-meh tuitah mai a kihuan givah kingkeng in kineh hi. Tami lunch hun in khat-le-khat kimeltheituah na zong a hing um a, nuam tuam ma ma mai.

Lunch zaw in baakhat zaw in Seminar hunpat na’n Lia L. Esther in 2 KORINTH 5:17-18 [Tuazieh in mi koizong Khrist a a um leh, sil siemtha ahita hi, sil luite abeita a, ngai un ahing thata hi. Tualeh sil zousie Pasian a kipat ahi a, Aman Jesu Khrist ah Ama toh kilem in ahing bawl a, ka kung uah kilemna nasep ahing peta hi.] simin Pasian kunga thumna toh hun laan hi.

Seminar thupi ahileh “Khanglai leh Siangthouna” chih ahi a, Pastor Mc Ginlianthang mahin 2 TIMOTHI 2:22 [Khangdawng utna giloute zong taisan inlen, hinanleh lungtang siengtah a Mangpa min loute toh, dihtatna, ginna, itna leh kilemnate delzaw in.] simin seminar pan hi.

Khanglaite adia poimaw ma ma 'Siangthouna' thu presentation mu nuam huai tah mai mipite muthei din Projector ah kikap hi.

Tulai in tam Siangthouna khu khanglaite lah ah tasam ahidan gen a, Pasian thu a dettah a kibulphu ding ahi chi'n khanglaite hanthawn hi.

Tami Seminar khu a ngainop huai leh a munop huai mai mai ahikei a, thei ding tampi taalat in um hi. Numei leh pasal kichi taphot adia poimaw ahi. Speaker-pu in athu-ala-alim toh kithuah in khanglaite thuhilna guntah nei hi.

Tulai a ei singtangmi, adiah a Lamka mi lah ah tambang thu tangkoupi ding a hoi ahi. Tunia Khanglaite kithuhilna ah "Sex, Virginity, Romance, Relationship leh a tuam tuam banah “True Love Awaits” chihte Pastor Mc Thang tungtawn in ngaikhiat in um a, kiphattuampih ma ma mai hi.

Theiding a poimaw, zahkhalou leh mukhalou tampi, thu manpha ma ma tuni'n Khanglai te'n kithei belap a, lungsim a thaamzing hi. "The measure of love is when love without measure".

Tami seminar in khanglaite nasahtah in hing 'challenge' (hanthawn) ma ma mai. Koipou siangthouna lam ah kidem chiat ding in ikideihsah uhi.

Tuni Khanglai Day hun ah Tv Paul Hauthang, Tv David, Nh Naomi (Thangkhal), Pa Joseph Kapminlun leh Tv Kaisangthang (MDiv-I Yr, GETS) te'n Pasian phatna zaila ngaih tah tah toh mipite awi uhi.

Bible leh Laa kidemna kiphuang a, Bible kidemna ah 1na – Tv David, 2na – Lia Naomi (Thangkhal) leh Lia Olivia, 3na- Lia Naukim, tualeh Laa kidemna ah 1na – Lia Moite, 2na – Tv Muanlian leh 3na – Tv David.

Lungdamthu tutna Tv Pau Hauthang in anei zaw’n Tv Lawmthang in prize hawmna nei hi. Tuni Conductor ah Tv Max Thangminlam ahi a, recording secretary ah Tv Henry Hausuanthang pang uhi.

Pastor Mc Ginlianthang ahileh kum sawtpi Gilead Evangelical Theological Seminary, Hunnur Cross, Bengaluru ah ana sem a, tun zong sem lai, Bible sangsie ban ah Librarian-cum-Warden toh thuo in, azi atate gel toh um uhi. Gilead Seminary (GETS) a dia Pasian mizat mipoimoh khat ahi hi. Ama thugen ngaai din a sangnaupang tangval thum in zong hing zui uhi.

Khatvei kikhopna ahi a, gintat sa’ng a nuam ma ma mai a, lamkaite hin minauta’ng hin a felthei ua, mi vaidawn zong fel. Adiehin kou mi thum a kikhawm kha ngailou teng, St Pious Church mai ka tun un, ka khawl ua, tuana’h ZPYF General Secretary-pu Lulun in a hing pick-up hi. Lungdam huai ma ma. Pasian in ZPYF Gualzawl tou zel ta hen!

~ Bruce K. Thangkhal

GETS, Hunnur Cross,

Bengaluru : 27 Aug 2018

Share: