2nd PRIZE WINNER ESSAY COMPETITION - MR. THANGZAKAP

DIKTATNA IN NAM A TAWISANG

Proverb:14:34.

Amasa pen in hibang hun hoih leh hun manpha hung piatu ibiak Pa Pasian kiang ah kipak thu katun Masa hi. I tenna leitung hih COVID-19 natna ziak in buai vengvunga a om Lai in eite’n hibang hun manpha leh hun hoih imuhthei laipen hamphat huai isa mahmah uhi. Tualeh hih kawmkal a khalvontawi admin te’n hibang essay kidemna nung sai theih pen uh hoih kasa mah mah a, tualeh kei jong pangthei kahihman in hampha kaki sa mahmah hi. Siam leh siamlouh, pil leh pil louh thu hilou in, ka lunglut man in ken jong ka theih khamkham in kung gelhsuk ding hi.

DIKTATNA ICHIH BANG AHIA.

Diktatna ichih pen aneu alian in itheihsa thumal ahi. Hilehjong itheihdan uh kibang kim lou ding hi. Kei muh dan leh kei theihdan in diktatna ichih pen juou panglou a gamtatna, aki gen bangbang leh aki hilh bangbang a gamtatna ahi. Tualeh diktatna pen chi tampi in kikhen thei lai hi. Etsakna'n sum-leh-pai thu a diktatna, nu-leh-pa tung a diktatna, Pasian tung a diktatna, siate tung a diktatna, lawmte tung a diktatna. Hihdan deuh in diktatna pen tampi in ki khen thei lailai hi.

DIKTATNA POIMOH DAN

Tuhun in itenna khovel a diktatna pen om nonlou hileh kilawm tahi. Saptuam vai hi in politics vai hitaleh jong diktatna pen om nonlou hileh kilom tahi. Mi’n hung muh kei nak leh khok kei e, achithei mi kitam ta mahmah hi. Tua ahihman in diktatna pen nakpi in ki poimoh ta mahmah hi. I niteng hindan leh gamtat dante ah diktatna pen muh ding vangta mahmah hi. Pastor khat in pulpit tung a guktat louh ding thu agen gen a, tualeh diktat un chi’n mipite hilh hi. Hinanleh jong ama’n a inn a mi aak khat guksa in koih khin hi. Tualeh kikhop tawp in azi in guktat hoihlou dan theita ahih man in a pasal aak guk pen ana khahkhe tahi. Tualeh a pasal hung tun in i aak la ka mu non kei in ahung chi a, azi in nathu gen guktat ahoih louh man a kana kha khiat hita hi chi hi. Tua leh a pasal in mimaw, bang di’a na khah la, kathugen pen ei a ding hilou mi a ding chihsan hi. Tuadan mah in tulai khovel ah jong mitampi om tamawk hi. Tua ahihman in igam inam damthei lou in khang jong khangtou theilou hi. Ei Thangkhal minam mawlpen leh tawmpente sung ah jong tuabang mi om ahihman in ki machal thei lou hi. Bang ziak a diktatna igam leh inam sung in poimoh ahia nachi maithei hi. Diktatna pen igam leh inam sung in poimoh mahmah hi, aziak diktatna omlouh na mun ah thuman-thutak jong omlou hi. Tualeh midiktat jong omlou hi. Tua ahiman in diktatna neilou mi leh namte pen khopi kulh baang neilou bang ahi uhi. Leitung a gam thupi leh gam nuam ichihte pen diktat tak a vai kihomna gam leh mi diktat tamna gamte ahi. A dahhuai mahmah khat chuh tulai khovel a politiciante maimai mi diktatloute hinonlou in saptuam sung a jong mi diktat lou hunkhop khat ki omta hi. Tualeh Pasian min suang a zuou gen leh mi khem chihte jong khoksalou mi hunkhop khat jong om khin ta hi. Tua ahihman in dahhuai isa mahmah uhi. Aziak hih bang mite in pawlpi suminsia in vang jong hung beisak thei hi. Tua ahihman in hibang te ei sung ah omdah leh ichi ngutngut uhi. A dahhuai kik khat chuh thuman-thutak theinapi a gum ngam lou, gen ngam lou, tualeh thutak lou ahi chih theinapi a gum teitei mi hunkhop khat jong ki om khin hi. C. K Khai in athu genna khat a hichi’n gen hi, thuman-thutak nagen leh mitawh kisel in, ki buai niteh chi hi, dik mah hi, tua ahihman in thudiklou khat gup a mitawh kisel kinial sang in thutak dinpih ngam in thuakpi ngam lei bang ziak in Toupa’n hung guawlzawl lou ding ahia. Tua ahihman in, ana dinpih ngam photphot lei hun asak chiang in Toupa’n hung lamsang in hung domtou veve ding hi. Tua ahihman in thutak dinpih ngam di’n naki mantai? I kiman naknak a ahihleh maban ah Toupa’n hung mawk koih maimai lou ding hi chi ngam ing.

Diktatna apoimoh dan leh ahoih dan hihbang in Bible sung a jong kimu lai hi. Noah pen leitung bup a midiktat omsun ahihman in tuizin pan in suakta hi( Genesis:6:9). Diktatna pen khalam a ding maimai in phatuamlou a salam a ding in jong phatuam hi, Joseph pen Jesu pa ahihthei na di’n chitna khat aneih ngai ahi, a chitna ahihleh apil man, asiam man, ahauh man hilou in adiktat man hijaw hi( Matthai 1:19). Tuamah bang in ei THANGKHAL te zong mi nam dang tengteng sang in mawlpen in, zawng pen in, tawmpen lei zong Toupa masang ah na diktat photphot lei Aman hung taisanlou ding hi. Aziak Pasian pen mi zuou theite Pasian hilou in mi diktat te Pasian hijaw hi. Bible sung a mihingte khansau theih na’ng, kei theihdan in chi thum om hi, tuate ahihleh Pasian zahtatna, nu-leh-pa zahtatna leh thuman-thutak leh diktak a gamtatna ahi. Diktatna jong khansau nadi’n lampi khat ahihman in diktat ding pen hanchiam zing ni, inam, ipawlpi akhansau ding ideih leh tuni apa’n in diktatna lampi pen jui jing jou ding in kisa ni.

DIKTATNA IN NAM A TAWISANG DA'N

Israelte khangthu a Leng hoih leh ginom Pasian jahdan siam leh adaan thupiakte lim tak a juikim sipsep pen kumpi David ahi. Tua ahihman in Pasian in kalung tang bang pua hialpa chi hi. David in mawhna khat vei maimai bawl kha hi( 1King:15:5).Uriah tung leh azi tung a akhelhna chih louh ngal khelhna dang neilou hi. David in( Samuel Nihna 22:21) na a hi chi’n gen lai hi, Sildik kabawl man in Toupa’n nuamman hung pia a, midik kahihman in Ama’n hung gualjawl hi chi hi. Tang 23 na hichi’n genlai hi, Adaan thupiakte ka jui kim sipsep a, athupiakte ka palsan kei hi chi lailai hi. David in ahihleh jahtak a Pasian thupiakte na limsak in na jui kim sipsep ahihman in Pasian in amah jiak in anam leh agam uh thupha pia in tawisang hi. Israel gam leh namte hung khangtou tou in kumpi Solomon hun in nakpi tak in hung thupi in mite theiphak hung hita uhi. India khangthu a Ashoka hun pen Sanakhang kichi hi. Tua mahbang in Israelte khangthu ah jong Solomon hun pen Sanakhang kichi hi. Solomon in kum khat sung in Sana sekel 666 muzou hi. Tua leh tualou jong goumanpha tampi neilai hi, tualeh hih hun in Israel gam leh mite pen leitung a midang nam dangte theiphak hung hita uhi. Akim apam a om, anai agamla a om, mite leh gamte’n israel gam thupidan, hauhsat dan leh akumpi pa uh thupi dan leh pildan hung thei khia uhi. Hih zahtaka Israel gam leh mite pen midangte theiphak leh gam hausa hung hih theihna pen bangmah dang hilou in kumpi David in diktat tak a Pasian ana biak man hilel tak hi. Mikhat hang in Pasian in gualzawl in agam uh thupha pia in amite jong tawisang hi. Hih ah kipan in DIKTATNA IN NAM A TOISANG Dan kimu thei hi. Ei Thangkhalte jong Pasian in igam inam hung tawisang in, mite tung a ilen na’ng in mi diktat tampi kisam lou hi. Mi diktat votvot khat mai mai om leh jong hithei ding hi,tualeh tua

mi diktat hiding in nang leh kei ikiman ta ama? chih jong ki en thak ni, aziak nang leh kei diktatna ziak in pasian in inam igam thupha pia in mite tung a hung domsang thei mahmah ding hi. Tuajiak in tuni in nang leh kei ana diktat som phot phot ni, aziak ih diktat nak leh hunasak chiang in Toupa’n hung lamsang in mite theiphak leh,i ki lam et sang ah thupi jaw in thupha hung pia ding hi.

DIKTATLOUHNA ALAUH HUAI DAN

Diktatna bang dia inam leh igam leh ipawlpi khantouhna di’a poimoh ahia ichih leh, diktatlouhna pen a lauhhuai man ahi. Khatna ah diktatlouhna pen mimal a ding in lauhuai a tuaban ah pawlpi leh minam tanpha a di’n jong lauhuai mahmah hi. Diktatlouhna alauhuai dan hiah anuai a bang in kimuthei hi.(Nasepte:5:1-11) sung a Annania leh Sapharia te nupa thu kimuthei hi. Ama’u nupa pen sum thu a adiktatlouh man un sih lawh uhi. Anupa un zuou thu in kithutuak uhi, ahihhang in bangmah phatuamlou hi. Tuamah bang in ei jong zuou thu ah iki thutuak leh phatuamlou veve ding hi. Gehazi, Elisha suakpa jong adiktatlouh man in Naaman phak natna teng amah leh akhak asuante tung ah tu hi(2king:5:26-27). Tuamah bang in idiktat kei leh maban a khangsawn hung momtou ding te’n jong eite diktatlouh man in thuak lawh thei ahihlam uh thei zing ni. Tuajiak in tuni apat in Thangkhal ka it hi ichi leh diktat sawm chiat ni.

THUKHITNA

Diktatna apoimoh dan, ahoih dan leh ahoihlouh dante tampi igenta uhi. I diktat uleh hung gualzawl ding a idiktat kei leh hung gawt thei lailai Pasian ahihman in, ahitheih liai leh tuni apat in diktat ding dan akua-kua in sawm chiat hamtang ni, ajiak Pasian in Amah bang a diktat ding a hung siam ahi, imelmapa bang a zuoutat ding hilou in. (Matthai:6:33)Pasian gam leh adiktatna jong masa photphot un, achih bang in, tuni akipan in ei THANGKHALte jong aneu-alian in Pasian gam leh adiktatna jong sawm chiat ding in hanchiam ni, tualeh Aman ideih leh ngaih teng hung piak behlap ding a, I gam inam thupha pia in hung tawisang ding hi. THANGKHAL ka it hi na chih leh sum-leh-pai tha-leh-jung in na pangjou kei in jong phamawh kei, apoimawh pen na omna mun khempeuh ah ana diktat tawntung ta in. Pasian in THANGKHAL te maban ah hihsang a diktat jou semsem ding in thupha hung pia in hung vangbuak tahen. Lungdam.

(Note: Hih Essay ahileh the 1st Khalvontawi Essay Writing Competition 2020 ah "1st Prize Winner" ahi. Admin te phalna louh leh hih khalvontawi media source credit pelou in mundang a suahsawn/piaksawn phal ahikei hi. - Admin, www.khalvontawi.com)

Share: