KWS Hyderabad in Advent Christmas lolhing tah-a ana mang

Hyderabad, Dec 5: Pathen mapuina jal'in KWS Hyderabad in "Advent Christmas 2022" kinguon chu janhi December Nisim 4th (2:30 PM - 8:00 PM) sung chun Houbung mipi mi 200 val jaona in lolhing tah-in aki mang thei'in ahi.

Kinguon chu Phatbih ni(2) in aki homkhen in, Phatbih masa chun Praise & Worship Team ho mapui na jal'in Pathen vahchoi khom na aum in, chujouvin Pathen houkhomna phat chu Pa Letkholun Suantak, Chairman KWSH in ana makai in, Pate le Nute a kuon vahchoila ngainuom um tah-tah sahdohna phat aum-in ahi. Hopsom le Maicham ho lhandohna chu Pastor Thangjakhup, Pastor KWSH in anei in, chujouvin Ng.Mawite akuon Jaila ngainuom um tah ana kingailha thei in ahi.

Rt.Rev.Paothang Haokip in "God's Perfect Time - Matthew 1:18-25" ti thupi mangcha-in Pathen thu a houlimna phat amang in ahi. Christmas kin a Inn lam a kalsuong doh ding ho taopehna kin chu Pastor Seikhomang Haokip in anei in, chujouvin Pa Lalson Khongsai, Secretary KWSH in Kipathuseina phat amang in ahi. Mipi in la akisa khom-in, lasah khomna kichai chun Pa Lhunsei in taona in phatbih khatna chu khumkhana ana nei in ahi.

Phatbih Anina(2) chu Pa Paolen Misao in ana makai-in,  lenkhom lasah le lamkol vetnuom umtah Nu-le-Pa, Nungah-Gollhang ho a kuon vetlhahna ana um in,  nuom tah in kinguon chu ana challha in, "Phat chom khat kikhen jongleu hen, khat vei ikimutuo kit diu," la chu thanuom tah le kipahtah in mipi'n akisa khom in, lamkuol jong akibol in, chujouvin Pa Letkholun Suantak in phatkha taona le Ankuong taona amang in, ngailut ankuong sokhomna aum in, buoina ima umlouvin Advent Christmas kin chu khumkha ahitai.

✍️ Reported by: 

Mr. John Lalboi

Finance Secretary, KWSH

Share: