DUTHUSAM KISIA DILDEL ~ Rev. Dr. Dongza Thawng

 Fellowship of Thirsty Souls and Hungry Hearts Devotional # 44( Vol 4)

 Thirsty Soul Ngaina a simtute Mangpa’n hing umpi in hing gualzawl ta hen!

Tunin Mangpa na lam-et lou, na gin tat lou thil hoi Tampi na lampi ah hingna koisah ta hen!

TUNI TOPIC: DREAM SHATTERED - DUTHUSAM KISIA DILDEL

OR

THE LORD GAVE AND THE LORD HAS TAKEN AWAY BLESSED BE HIS NAME

A Christmas Message:

Introduction:

Ahing thumpi te kung ah kipah thu ka gen hi. 

 1.     Ka tate’n exam jou khial khial ta uh.

 2.  Inlam ka Khual zinna ding jong nai hiai hiai ta.

 3.  Tutung ka iPhone mansah in ka puah siam sawm vang in hing jawi sah veve hi. Iphone mansah mai hilou in thil dang dang jong abanban in ka flop hi. Setan in hing du gaw mama. Hibang kal ah Luke 22: 31 a agen dan in I Mangpa’n ahing thum pi chi ka thei a ka lung muang hi. Tualeh Job confession (thu puan) “My redeemer lives” chila in zong hing panpi hi. “Though he saly me I will yet hope in Him” kichiten zong hing houpi hi.

 4.  Ka van gil khat aman vang in a gil jaw - te thei lou ka family bit tah in Pasian in hing kep sah nalai hi. Kipah thu gen ding a gen a gen seng lou sim seng lou um hi. Ahiin Setan in hing khoih chi chuh ka thei hi. Pasian in bawl ut khat nei chi zong ka thei veve hi. Ahiin ka buai thou hi. Jannin Mobile hing um chiil lai a kijang te Nokia khat ka va la hi.

Ahiin Hibang ka theisiam lou leh ka thajawi lai in

Job 1: 21 “The LORD gave and the LORD has taken away, may the name of the LORD be praised” ka lungah hing ki lou, hing ha muan a, avel vel in ka gen hi. Himi Pansan a message ka gel som lai in, ka na gel sa Ana um a, tuami hing thot sawn mai vang e!

Ka laibu “Tuihum Apat Tuikha” apat ahibang a kang lah sawn ahi. A ut ten Hattuam Magazine te a sua sawn thei ahi.

 Mangpa’n na sim chiang hing hou pi in, kei bang ana tha neem na khu hing suh hat sah ta hen!

 KIPAN TA AW LE: “TUIKHA APAT TUIHUM-AS IT IS” 

DUTHUSAM KISIE (DREAM SHATTERED)

(Himi article khu Christmas tun kimni chiang a ka sermon gige khat ahi. Gospel Tangkou ah 1998 in kasua masapen hi. Khum in Ruth Messenger ah tuachiin ka belap a Khristian Thukizakna, Lungdamna aw, Gospel Tangkou, Hinna Thah, Muanna Aksi te ah Christmas message dan in 2012 in ka pia hi.Ka lawipa Dr. S. Thangboy Zou in tami kasim in mittui naptui toh ka kiteh hi achi jieh in midangte hinkhua zong sukha tei va chiin ka hing tuang sah hi.)

Oct 26, 2012 nia Lamka tung ding chia kinem tah a ka ngah lai un sil ni hing tung hi. Ka flight uh kingfisher leng nonlou hi. Aban ah ka tapa Levi 25th Oct. nitah in ICU tung hi. Khujiehin flight ticket mun dang dang ading teng zong ka cancel ngai ta hi. Hih article ka gel lai a Lamka a nop deu a um ding hina pi Shillong a children hospital apat ahi daih hi. Sil I plan bang ang pai lou chiang theisiam hamsa thou hi. Hinanleh Pasian min phat in um hen! Ka flight ticket refund man teng ka hospital um man in kajang thei uhi. Ka jilkhiah thupi uh ahileh I hinna leh I lampi khu eikhut a kinga ahilou dan leh Pasian khut a um ahidan ka mu khe deu deu uhi. Mihing in bang plan neinanlei Pasian khut a kinga ahidan leh ginna ma a paijel ding ihi dan kithei tha jel hi.

 Tangval duthusam kisia tanchin

Tuama bang in nidang lai in singtang khua khat ah tangval khat a duthusam kisia dildel khat tangthu houlim vai. Ama pen anu leh apan ana beisana sawt sim ta hi. School kai jou lou in khut na sep toh neh leh tah sui hi. Mi chi tah leh taima ahijieh in a a khutna sep ah pai hoi mama hi. Mi nei lou leh taga himah leh ahausatna mama pen Pasian nei a, Pasian a ki ngam mi ahi. Nidang lai Egypt a Joseph ma bang in nihoi lou leh ni hoi ah zong Pasian ma bel vevaw hi. Ama uh tawn dan ngeina bang in a khua ua nungah nou Pasian thei mama khat ama a ding in a nu leh apa ten naupang nou apat ana khamsah uhi. Tu in pen khum tangval zong teirol hun khel in piching lam ma naw ta hi. Khujiah in maban inkuan bawl ding dan angai tua pan pan tahi. A ji khaam pen toh ki it in ki ngaiin hun tampi mang khawm uhi hinanleh tahsa a ki suhkhah ki pawl chite a ngaidan uh hi him him lou hi. Khujiahin akiten ni ding ngah chan chan uhi.

 Tualeh agam dinmun entalei ama uh pen namneu kumpi lian nuai a um ahi uhi. Thakhat thu in a kim apam a namdangte leh a gam sung opkhum ten a khua uh hing bulu in hing soisah jel uhi. Tuachiang numei naupang dawm lou in sugenthei uhi. Nungah noute bang en la mama uhi. Tualeh tangvalte zong bawl gen thei jel uhi. Hibang kal ah ama gel zong akin a kiteng kin a, insung bawl a maban ding ngai tua ngai ta hi. Hi tangval pa zong hibang a a sen ngainou a ji kham toh kiteng ding hun nai ta in ana sep ha bawl mama hi. Khawvel a ait pen toh kiteng ding chi angai tua chiang a nasep gimna te zong bei jel in a thanopna in jou in matal mama hi. Hibang a thanuam leh kineem tah a Pasian kung a athum lai in amang a zong mat phah lou, a ngai tuana zong um kha lou a ji kham a lawmnu in nau ana pai ta mai jen hi. Tuapen juau thuthang mai mai chia angaisah lou ham ham vang in a tah tah ana hi ta hi.

 Hibang tung ta chi athei jaan in pen ama ih mut dan um louhi. Jaan khua vah in ki ngai tua a Pasian mai ah naungeh ka in kap hi. Hibang tangval lungkhau leh pasal tulaiham a paa mama hinapi ngaungeh bang in kap ta mai hi. “Aw ka mang lam hijaw mai leh maw! Kum hijat ka kinepna tunin pape tual puang lah a tolchil bang ahita hi. Maban a hun nop ding ka lam et mai jen toh maw tu in guntui bang leluan ta hi. Hibang mai ahi maw hinkhua kichi. Aw Ka Pasian hite bang na gen na e? Na min a kikem siang a na min ging a siangthouna ding a aman pe te hibang a kinepna a beisah mai ding na hi maw? Na min siangthou gingta te nang midangte mai a hibang a mualphou sah mai ding maw!” chi in hase tahin thum ta hi. Ama uh custom dan tah in pen khum tangval pan hita hen achichi ni apat tua a nungah gai nu pen suang a denlup ding ahita hi. A ana juausan a tangval tung ah ahinna kinga ta hi.

 Hibang a lawmnu hinna jauhuai tah a umlaiin jaan khawvah in kingaitua a thumna nei tahi. “Aw, ka it pen jing a nang suang a hing kisep lum ding hita hia maw. Ka bang chi etngam ta diai? Bang in ahing bawl lawm lawm a hitan ana tung na hiai?..ken kang bang chi etngam ding lah?..aw ka sil tuah te ka jalmang himai le maw..?” Chi in hase tah in kap kap ta hi. Atawp in alawmnu pen asi lou na ding in pan lah sawm ta hi. Bang chi bawl leng si lou ding bang chi leh ka hun khe thei diai chia akingai tua lai tah in Pasian Angel siang akung ah hing kilah hi. Tua tangval khu Joseph ahi a anungah gai pen nungah siangthou Mary ahi a. Tami a pat in Christmas hing kipan hi. Tungnungpen ah Amin loupi tahen Lei a itte tungah lemna lengta hen!

Joseph hinkhua apat jil ding

 Na duthusam a kisia ngai ei?

Tukum bul apat duthusam bang bang na nei ei? Duthusam kisia bangjat nang tuah tou ei? Mikhen khat kumbul a duthusam hoitah nei nanleh Christmas tungman lou a duthusamteng tualpuang lah a pape kichilthaang bang hita hi.Tate maban kinep mama lai a tapa muang mama khamthei in ana ne lum deh deh ta chi zong um dinghi. Akal chiang I duthusam tung ma lah a ase lam ngen ase lam ngen in hing vuh khum hi. Ahoi I lam et lai in ase hing tung a, kipahna I ngah lai in kaana hing tung hi. Aw, nang gingtu lung lel leh liangvai na mittuiteng, na mualphounateng, na lungnatna teng, na lawsapna teng, na mansahteng abawn in Pasian record bu ah khat zong mang lou ahi chi thei in aw. Tunia hibang duthusam kisia leh kehgawp na tuah khah leh nang mai nahi sih chi thei in misiangthou pai masate leh na kim na pam a na khualjin pi ten zong tuah uhi chi ka hing gen sah ut hi. Na mittui luanpi ding lawm na hau hi. Pasian in Ama inaisem nading leh ama mai Iki pum ngah thei nading in I muanteng ineiteng I kinepna teng hing lahmang sah jel hi. I plan teng zong hing tawhkehsah hi. 

Ang bawlsete hoibawl apat gualjawlna thuguh um hi chi na thei tai?

Joseph a lawmnu ama ading a gin umlou chi athei in a lungtang nat ding dan chuh… Ei hileh suanga deng lum masa pen kihiding a, a lungkim nai lou ding hi. Aman ahileh ama lungtang natna thutuam hitaleh a lawmnu (agalnu) ading in sil hoithei tawp bawl sawm nalai hi.Pu Ironside in “itna umjia ahileh I itte adinga ahoipen pen bawlsah” chi ahi. Joseph itna khu itna tah tah ahidan kilang hi. Eite itna ahileh mani makhual itna ahi jiehin mite I itna bang a ahing lethuh lou chiang ki it jounonlou hi. Pasian in ahileh eite gilou sasa in zong hing it veve a ei ading a hoipen hing bawl sahsah nalai hi. Hibang a ma lungtang nasah pen pen zong hunkhiah sawm teitei mi pha Joseph tung ah Pasian in bang gualjawlna zong it lou ding ahichi I mu hi. OT a Joseph in zong a unaute tung ah sil hoi theitawp bawlsah hi. Hibang lungsim lian paw ahijieh in Pasian in mun sangpi ah tawisang hi. Tunia I gen pa Joseph zong Pa Pasian in leitung tahsa atapa pa hiding in muang ngam ta mai jen hi. I galte ading a silhoi I bawl leh Pa Pasian in mialnate hing vah sah in, I kaanate laamnan hei a, avaigei ta akichaita ichite zong Aman a bawl dan khat thei ve ve hi.

Pasian in apiahsa alakia hi

Pasisan in Joseph ading a Mary apia sa tawmkhat ading a alakia in Joseph ading in hamsa mama ding hi. Hinanleh Pasian testing hoitah in pass hi. Pasianin job hausahna, tanu tapa te toh gualjawl hi. Hinanleh Pasian in pe tam ut sem ahijieh in tawm khat ading in lahkhiat sah phot hi. Job Pasian in a test nateng ang pass jou a Pasian in nuamman ang pia kia ni chu thupi hita lou maw! Na hinnkhua a Pasianin ang pia sa bangjat vei ang lahsah kia tai? Ang piah lai a ikipah maimai jen toh thakhat thu in aban ban in hing mang mang tamai jen hi. Unau aw Pasian in ang piasa ang lasah kia leh phun lou in ngah jaw in Aman atam sem hing pe kia ut leh hing suhpung sah ding hi jaw hi. Pasian Abraham ateh nung avuai nung in tapa Isaac pia hi. Tuapen kum tampi a athuchiam amual suahna ahi. Abraham in nikhatni chiang ka tapa hing ngen kia va chi mawng mawng a lungsim ah um kha lou ding hi. Hinanleh manglam bang hial in Pasian in “na tapa Isaac in hing bia in” chi hitamai hi. Abraham ading in theisiam hamsa ding hi.”Tua a nang nget kia ding bang dia nang piah e” chi thei khop in lungnat huai ding hi. Hinanleh Ginna pa in vang a amu dan ana tuam hi. Pasian a muanna lianseng ahi jiehin ana laan ngamla lou hi.

Tualeh Alahsa pia kia a, a tuang aval in pia hi

Pasian in koima leiba balou hi. Pasian in eima deibang sang in Ama deibang tangtung sah ut jaw hi. Eima deibang ichi na lam in Pasian program ki vaigei sah jel hi. Pasian alahsah te apia kia chiang in atuang aval ahi dan thupi hii. Tutung October leh November ha sung mai a ka khual jinna ding Siliguri, Delhi, Gwahati, Imphal kal flight ticket cancel man mai in Rs 15,000/- val ka seng hi. Mawt huai kaki sa mama a ka pawsiam thei sih hi. Pammai kasa ta lua hi. Hinanleh Pasian mai ah bang chi dan e chi ka thum thum hi. Judah kumpi kei bang ana tuah ngei khat ka lungsim ah hing kilang jel hi. Kumpi Amaziah in Temple a sum jat louna ding ana jang kha hinan leh kisia a Pasian kung a bang chi ta ding chia a thum            lai in jawlnei in “Mangpa’n in hisang a tamjaw ahing pia thei hi”(2 Chronicle 25: 9) chiin va hamuan hi. 

Pasian min thpina ding in November ha zong bei nai lou in mun tuam tuam apat in lamet lou in double phial in ka mu kia ta uhi. Tualeh Job a tate leh anei agouteng Pasian in laahsah bei a hinanleh aman “Mangpa’n in ahing pia a Mangpa’n alamang kia hi. Mangpa min phat in um hen” chiin in Pasian min phat veve hi. Tuachiin Pasian in bekia mai hilou in a double ngen in pe kia hi. Belam 700 mang khu tu in 1400 neita ahi. Sangawngsau 3000 shi khu tuin 6000 hita hi. Bongtal kop 500 shi khu tu in kop 1000 chingta. Sangan 500 khu tu in 1000 in kibelap ta hi. Ta pasal 7 leh numei 3 ana shi a hinanleh tu in Pasian in amaute ganhingte bangin double a pelou in ta pasal 7 leh numei 3 ma pia hi. Ajieh pen ana sisa te khu ashi hilou ua thawkiana ah kimu kia ding uhi. Tuajieh in angeijat ma pie hi. Hinanleh ata numei te khu gamsung a melhoipen tulai ham hileh miss ngen ahi uhi. 

Pasian in alahmang sa te a double a double ngen in pekia jung jung hi. Thupi e maw! Pasian in Abraham apia kia ni in tangtawn daiding thuhun pia mai jen hi. Pasian in tuniin Joseph apat in Mary lamang jaw lou in aki itna uh detsah sem sem ahi jaw hi. Pasian in alah mang ichite alamang hijaw lou in a supung sem sem hi jaw hi. Unau, na ta gammang vahvaite zong hing kilia kia ding a, na pasal gammang in zong inn lam hing juan kia ding hi, na sum na pai na mangsahte zong alem tampi toh hing kia ding a, na jatatna, na thupina te zong hing pai kia ding hi. Ajiehpen Jaleenna dah ging in, Suatahna kawlni suah ta hi.

 Thukhahna

Unau tukum paisa a Pasian in ang lahmangsahte jiaha na lung ngai ngai a, na suun suun te khu Ama’n atam jaw leh a hoijaw in hing pia kia ding hi. Bethelem a naungeh hundampa lam juan in kile kia le chin na hinnkhua hing ki panthah kia thei ding hi. Aman hinkhua ki sesa, gopsa, thaangsa, muatsa te bawl phat theina power nei hi. Ju ngol vei, khamthei bawl, nochi, tualthat te leh siatna a saltang, bat a saltang, jawnkhalna saltang, natna saltang leh buaina tuam tuam asaltang tampi jalen na pia ta hi. Panpitu nei lou, gumtu nei lou, belding nei lou,kinepna nei lou, maban nei lou, hinkhua mumal nei lou, hinsan thei lou a mial nuai a tou nang leh kei ading in Bethelem ah khua hing vah ta hi.

 Courtesy: Dongza Thawng, Tuikha apat Tuihum Khualjinna (Churachandpur: Door Of Hope Publication,2013), 39-44.

Share: