Mother’s Day Thupuak: TATE ADIA NU MANPHAT NA

✍🏻Nu Manthianvung

      SIMLEI ah Nu manpha tampite mualliamta mah leh, tuni in TUUNNU a damlai te’n khovel buaitak lakah Mother’s Day imuthei ua itung ua Toupa hoihna leh kepnate thupi isa petmah a thupina pia in amin iphat hi.

Adamlai Nute tengteng Nute Ni chibai konbuk masa hi..✋

Inkuan a mun poimohtak luah ding in Toupa’n Nu dinmun honpiakte ihi ua hamphat huai isa hi. Pasal leh tate kepna leh kithuah pihna ah Nu poimoh in manpha diak hi, ataksap apoimoh uh theihpih a ahun hun a panpih leh kithuahpihna pe dia ki om gige te leng ihi lai uhi, Pilna, Siamna neiloute leng  Nu ihihna leh iki zatnate amanphat dan kikim a Pathian in honkoih te ihi uhi.

Sam 127:3 ah Tate tuh Toupa lak ah igoutan ahi uh achih bang in, gou ineih tengteng lak ah manpha pen a, i it in ingai pen ua, mundang a hon pawtsan chiang un leng i itna ziak mah in lungsim in aomna peuh uh zuizui mai hi. Leitung a gou ineih tengteng lak a vangam ilut pih theih omsun ahi lai ua, salam leh khalam dinmun ah tate pi in kepngai petmah ua, honkep pihthei Toupa bel kawm in amah muanna toh kalsuan leng ichi hi.

Mihing kibang lou ihih na ah Pa khenkhat Zi leh Tate itna tasam deuh bang omkha zenzen leleng. Nu tuh tate itna ah kipden in pang tuntun leng ki om hi, thilteng ah Nu tuh tate adia kiluikhe masa pen leh tate toh kisai tampen leng ahi uhi.

NU HIHNA/ DINMUN BANG AHIA?

Inkuan a NU tuh Pasal leh tate adia Toupa’n a koihte ihi chi leng ikhial din igingta kei hi, Toupa mah belkawm in hiai mohpuak nate ngai poimoh semsem leng ichi hi, Nu septheih/bawltheih tampi aphatuam om mah leh ipasal leh tate taikan a Nu ibuai chiang in amaute ana khasia/thawmhau thei ua, tua hun in melmapa Setan mun neikha chance pekha isuak thei hi,  Nu sepding hau taktak te’n hun-awl, hun-val nei chih omlou ahih man in iseplai mah koihkhia/tawpsan phot a i Inkuante adia hun sehkhiak mai ngai hi, Nute aw i Pasal leh Tate buaipih ding mah a Toupa’n hon koih ahih dan phawkthak in amaute mah itpen awlmoh pen in neithak ni maw..! Toupa aw khovel thilte enlah a ka Pasal leh Tate uh adia ka manphatna uh mansuah lou ding in honpi in aw... Insung nasep ding tampi nei gige te, pawlam vaibang neih hun omlai buai pipi a tate kepna nawlkhin ngeiloute ahi ua, Nu hihna leh dinmun tuh thupi in poimoh mahmah hi.

NA TUUNNU ADIN HUN NA NEI HIA..?

Nu in Tate aneih apat in thildang tengteng ah ki awngsut in tate kep leh don tuh a nna pi pen in koih hi, thamlou in agilsung a om akipan in hoihlou dia atheihte peuhmah duhsim leleng ngawlzou mai hi, tuahun apan in Nu tuh tate itna in thuaksak pah in zouzel mai hi, ta tampi te’n Nu leh Pate hat nonlouh hun un, amaute adia hun nei ngeilou bang omthei hi,  ahatlou ten ahatlai atate uh ngailua a delhdelh mai chih bang leng omthei hi, tate pilvang ni..

Tuchiang in Pathian vualzawlna in khovel in khantouh dan chikhat ah hon tonpih ta a, atak gam sukha loupi ilim chin maimai uh atam lawta hi. Nute Ni a Nute present pia, Pate Ni a pate present pia, lim (photo) kilawm tak a kilakpih zual in status bang a update ziahziah chihte chindan leh paidan anei ibang phialta uhi. Tua bang a lim-et theih ding omlou/koihloute Nu itna, Pa itna neilou dia koih phial bang leng iom mai diam...? Tate asia ichihna hipah lou in, hiaite sang a poimoh leh Nanu lam-et amah adin hun napia zelsam hia.? mi khenkhat te Nu leh Pate adia hun nei ngeilou bang kiom thei hi, Nu in honkepna leh nang a dia akipiak nate sut le hang amaute adia hun neilou chih ngam ding hilou hi.

Bangteng hihleh Mother’s Day ahihna toh Nu dinmun leh hihna mun poimohtak luah ihih lai in leng theihtawp suah a pang a, bawlhoih ikisak hun in leng minhoih leh pahtak lohlou laileng ihih kha thei hi, izuih pa Toupa Jesu hongpiang ding in a Nu Mari in mun nuam ana tang hetlou a, Kros a athuak lai in leng bawlsiatna, enghouna teng thuak a muhsitna tawpkhawk ei ziak in thuak hi, izuih tuanglam haksa in tawlhuai mahleh ipuak gikte hon puakpih Jesu phawk kawm in i Inkuan ading in Nute pang teitei ni hang maw..!

Toupa’n simtute hon vualzawl chiat hen.. 🙏

📃KMT|BEACON

Share: