O... F... F... I... C... E... R.

By :- Thanglam Manlun, independent freelance writer

Tuni'n mi tampin akiletsahpi, officer chung changa, ikihou lim diu kadeiyin ahi. 

OFFICER HUNG KONDOH DAN :- Tulaiya iman'u officer kitihi govt. service ho seh seh'a dan-a gelloi aum'in, hichu dihlou ahi. Officer hung kondoh dan chu hiti ahi. Officer kiti thucheng hi  Late Latin tichu 3-6 century khang laiyin, officiarius tin ana kimang'in ahi. Chuban'in  medieval Latin tichu 6-15 century khang laiyin, officiarius chu officium tin ahung kikhel kittan, hiche Latin thucheng, officiarius ahilou leh officius a kon'a hi old French in ahin lahson a, official or officer tia hung kimangdoh ahi. Official or officer in alamdoh chu, govt. hetpehna a mopohna leh tohmun nei tina ahi.

ETIMOLOGY OF OFFICER :- Etimology of officer ivet'a ahileh, officer kiti thucheng hi kholgilna in, servant Or retainer tinjong aseiyin ahi. Servant or retainer in alamdoh chu, insung ahilou leh social organization sunga, phat sotpi tohmun leh mipohna neiho tina ahi. Hiche a kon mudoh thei chu officer kitihi govt. service ho seh seh a ahipon social organization, religious organization leh insunga mopohna nei minu mipa-te jong ahop'e ti akichen'in ahi. Hijeh chun Etimology of officer dungjuiya hitia hi lhekhen thei ahi. 

1) Govt. officers, 2) Religious officers, 3) social organizations officers, 4) Families officers. Hiche'a kiseiho sunga hin tohman sang pum'a officer hina jong aum'in, tohman umlouva officer hinajong aum'in ahi. Tohman sang louva officer hina chu insunga minu mipa ho ahi. 

AHILEH OFFICER HI KILETSAH PI THEIHAM :- Officer kitihi simlai ho tilou mijouse a ding ahi. Govt. tohmun neiho, houlamkai ho, nam lamkai, phung lamkai, Tribe lamkai, Haosa-upa, semang pachong, thutan vaihomho, chuleh minu mipa te, alam lam'a mopohna neijouse officer hisohkei ahi. Chuti chu ahi'a, officer chu mopohna leh tohmun neiho kiseina ahileh, hoilai tah chu kiletsahpi ding um'a ham? kei gellin vang kiletsahpi ding aumpon ahi. Henge, leiset chung ahijeh'in toman sang loi aum'in, asang loujong aum'in ahi. Ken tohman kasan jeh'a officer hina kakilet sahpi nading umlouhel ahi. Officer lah'a alenpen chu tohman sanglou minu mipa ho ahi. Leiset chunga officer jouse, tohman sanglou minu mipa semdoh ngen ahi. Officer hina ichan'u hi Pathen phatthei boh ichanna'u ahin, kiletsahpi ding ahipon ahi. Ajeh chu kiletsah kitihi Christian houdan toh kitohlou ahijeng seh hilouva, kiletsah hoitho bollou dinga Bible in asei ahi. Hijeh chun ipi tohmun nei hijong leuhen kiletsahpi louva, itohmun cheh'a kitahna pum'a tohding ahi, hichu officer hina eipepa'u Pathen deileh Bible thuhil ahi.

OFFICER NAHINA PAMLANG AH PODOH HIH'IN :- Officer tichu, mopohna neijousen area aneisoh kei ahi. Vetsahna'n kei Thanglam Manlun mopohna chu keima insung ahi. Hichu helouvin, insung danga jong gavaihom taleng dihlou ding ahi. Ajeh chu kamopohna kalval'a kikum kahitan ahi. Chutima chun tulai govt. officer tampin, officer ahina kiletsah pi pum'in, khosung le houbung sung'ah, ahin polutji'un ahi. Hitobang miho chu, amopohna kihetlouho ahiuvin ahi. Nang area chu DC office sung kah'a ding, SDO office sung kah, Bn. or unit sung kah, SP office sung kah, Bank sung kah le College sung kah'a ding bou ahi. Na area chu nahin khel teng, namopohna leh nathaneina chu um talou ahi. Chutima chun social organisation a lamkai hon jong, ahina lutot kiletsahna pum'in, khosung le houbung sunga, thunei ding gojong umda lou ahi. Hoilai mun'a mopohna chang nahim kihet'in lang, namopohna pamlang'ah, thanei ding gohih in, hichu miching natoh hilou ahi. Hijeh'a chu Bible in kiletsah hoitho bolhih'in tia khamgahna anei ahi. Amopohna kihet former Mizoram chief Minister, Pu Zoramthanga'n houbung kikhopna'a mehon'a panga, sijou ajut ahi. 

Achaina'n, kiletsah hoitho kitihi houdan le Bible thutoh kitoh ahipoi, ti hepum'a kiletsah ibollou diuvin ikitem'un ahi.

Share: