ZSF te'n IOCL te kiangah GAS taksapdan genpih

ZSF te'n IOCL heutu kimuhpih in annhuanna dia kizang Gas taksapna genpih

Manipur pumpi ah annhuanna dia kizang LPG taksapna pailel tawh kisai in, Zomi Students Federation (ZSF) Ghq apan President Nengzalian Tonsing makaih in ZSF Ghq makaite'n Guwahati ah H Thangzamuan Senior Manager (LPG-Ops.) Indian Oil Corporation Limited (IOCL) kimuhpih uh a, gas taksapna hihveng theih dan ding kikuppih uhi. 

Huai hun ah H THangzamuan in ZSF Ghq makaite a theihsak dan in, LPG supply tu Indian Oil Corporation in LPG pawtu garite NH-37 (Imphal-Jiribam highway) kia ah sawl lou in NH-2 (Imphal-Dimapur highway) ah leng sawl uh a, niteng in tua Highway nihte ah LPG pua gari honglut theihtak ziak in, ni tamlou chik chiang in Manipur ah LPG kitaksapna om nawnlou ding chi hi. 

Manipur ah gas puaklutna ding in LPG TTs kia zat hitangpi mahleh tu in IOCL in Manipur ah gas pawluttu ding in LPG bulk TTs leng zang uh a, huchih ziak in nikhat in LPG puaklut a om tampi phatouta a, gas kiningching hiaihiai in gas taksapna beipahta ding in chi hi. 

H Thangzamuan panlakna mah in Manipur ah tualgal sukpi om hun May 2023 apan Imphal tawn a Lamka ah LPG puaklut theihlouh hunlai in leng Assam apan Mizoram tawn in Lamka ah puaklut in om thei hi. 

President rule hong om nung buaina a zia om deuhta in, kikaptuahna leh thagum kisuah khumna chihte hong om nawnlouh ziak in, Lamka ah LPG Distributer-te hawmzak ding Gas peuhmah Imphal apan puaklut in om nawnta hi. 

Tu in LPG pawtu gari honglut hoih ziak in tulel in Manipur ah gas koihkhawmna mun Sekmai a Gas Bottling plant ah LPG kidaihtak a omta hi'n kigen a, LPG puaklutna ding in nidang in Metric tonnes 7 pawthei bullet TTs zat a om in, amaute'n NH-37 tawn uh a, himahleh tu in NH-2 tawn in bullet TT mah metric tonnes 9, Metric tonnes 12 leh Metric tonnes 14 pawthei zat a om ziak in Manipur ah gas kiningching panta hi'n gen uhi. Khaw hun hong hoih panta ahihziak in niteng in Manipur ah Metric tonnes 12 leh 14 pawthei Bullet TT banah TT neu zawdeuhte hong lut uh a, Sekmai gas bottling plant ah LPG kiningching om ziak in Sekmai bottling plant leng nikhat in dakkal 11 sung kihongta hi. 

Sekmai Gas Bottling plant ah gas laktheih hun dakkal 11 a kihon tawh kiton in, Manipur sung a gas hawmzaktu distributor tuamtuam a ding Truck load 45 in niteng in lakhe thei uh a, hunpaisa in leng nikhat in Truck load 25 in lakhe thei uh hi'n kigen hi. Tu in consumer tam nei deuh diak a kigen LPG distributor-te'n nikhat in Truck load 2 zel lakhe thei uh hi'n leng kigen hi.

Behind the Truth' BTT 

🔴🟡🟢

Share: