Churachandpur College principal in a office luahta

Churachandpur Govt College (Autonomous) ah Regular Principal dinmun hun bangtan hiam a a awng nung in, Manipur Govt in interim Principal ding a a guan Ginzamang T Zomi in zan May 18, 2026 apan office luahta hi. 

CCpur College ah Principal (interim) dia guan a om Ginzamang T. Zomi s/o (late) Douzakham & (Late) Lamkhoneng & h/o H. Esther Gangte of Headquarter veng, Lamka in office a luah tawh kiton in, maban ah Churachandpur Govt College (autonomous) puahphatna ding in naktak in panlak sawm hi. 

News saite kiang ah a gendan in, Churachandpur Govt college ah New subject introduce na ding in panla ding ahihthu gen a, Psychology leh Social work banah Home Science koihbeh sawm in panlak sawm a, Post creation tamsem bawl ding a chih banah Manipur University South Campus ahihtheihna ding a panla ding ahihdan gen hi. Tulel a Churachandpur Govt college ah semtu kidaihlouh ziak a tualsuakmi laktawm (locally engage) tengteng teaching leh non teaching staff hitaleh bangchi leh regularisation bawl theihding hiam chih ngaihtuah sak ding ahihdan gen in, Master Degree pat ahihtheihna ding in leng panlak sawm chi hi. 

Ginzamang T Zomi ahihleh Manipur Govt nuai a Dept of University & higher Education nuai ah Asst Professor ding in 2002 in sempan a, 2002-2005 kikal in Imphal college ah posting in, 2006-2007 sung Tamenglong College ah posting nawn a, 2007 kum in kha 3 sung DM college ah sem in, 2007 kum tawplam in Churachandpur Govt College ah posting in, 2008 kum in Sociology Dept ah Head of Dept dinmun len in, tuni tan sem hi. 

2015 kum in Assistant Professor apan Associate Professor ding in kaisang a, 2021-2023 kikal in IGNOU ah Co-Ordinator dinmun len in, February 2029 in pension ding hi. Manipur govt in May 15, 2026 a thu a suahna ah CCpur Govt College ah Principal dinmun len ding, hun bangtan apan a awng lai in, College a semlelte lak ah huai dinmun lenthei dia chitna nei omlou uh a, huai ziak in Ginzamang T. Zomi of HQ Veng Lamka, Associate Professor (Sociology) pen Principal taktak omtheih nawn ma a dia interim Principal dia guan ahi chi'n puang hi. Govt in order a suahna ah DDO power leng neiding a, Regular Principal te’n financial power a neih dangdangte uh leng neiding ahihthu taklang hi.

~ Headlines Today 

Share: