Vaite'n mehpok a duhkei uh, mehmawl leh mehbai a ne nuamkei uh chih khong neulai in kiza a, tu'n zuau a suak hithet ta hi. Bangziak ahia? Kua'n amau kianga va theisak a, a limdan va hilh a hi laizang dia? Zo siktui i gengen a, eilak i kansak zohlouh lai un, i Zo ann vaite'n lunggulh in nei theita uhi. Kua ziak hi ding? Ei zosuante buh leh meh kia hilou a, Nagate' meh minthang Anishi l, Mizote' chow satui leih leh sanpiau, Manipur singju leh Erombah leh a dangdangte kuan India khopite potung hiding?
Kua dang hilou in, kum 26 lel a upa ahih lai a, Munirka, New Delhi a Rosang Cafe a na pan suahtu Pi Mary Lalboi ahi hi.
India khopi tuamtuam a North-East restro tuamtuam Nagaland Kitchen, Nek leh dawn, Mizo Diner, Zawlbuk leh adangdangte khong om ma tham in Paite kampau te'n restaurant lar leh minthangtak 'Rosang Cafe' a na kinei khin daihta! Laisiamna, sum sinna leh kitaitehna tuamtuamte ah leng Pathian in hon vualzawl a, nek leh dawn bawlna lam ah leng hon vualzawl sawnsawn hi, pi Mary tungtawn in!
Rosang cafe ahihleh 2001 in a Munirka, New Delhi ah Pi Mary Lalboi na pankhia a, a patkhiak hun in kum 26 ahi hi. Huai hunlai in Delhi khopi ah Paite kampau mi tam nai lawmlawm kei mahleh, tualsuak mite theihphak leh ngaihnat a hong suak hi. Munirka mun kochik ziak leh a restro a lut luat ziak in, a mun thoveng zaw ding ngimna in 2006 in Safdarjung Enclave, New Delhi ah khat behlap hi. Ngaina tu a tam ziak in, 2010 in Green park extension ah a thumna ding behlap non hi. Ngainatu a tamziak mah in, tuchiang in India a khopi mun tuamtuamte ah tuni chiang in 'Rosang Cafe' chih a gen mangmoh uh khat ahita!
Khovel hiipi hong leng a, covid ziak a dukan tamtak khak a ngaita, Rosang Cafe leng a hon hawisak tuak takei hi. Covid hiipi kia hileh hinsuah haksa lawmlawm kholkei ding, himahleh insung buaina neuhneuh ziak in leh Tate maban ding ngaihtuah a ngaita! A khak mai a tur hi. NE mi tamtakte ading a khiaklah huai, Tualsuak mite adia Rosang Cafe a nek kibawlte duh in zongzong mahle uh, a omta kei! Mi khenkhat ngial in a kikhak nung in, pi Mary Lalboi a na call kheukhou ua, Rosang Cafe hong non ding bangin a na genpih zel mahle uh amah a ding in tuh a tate poimoh masa pen ahita dih hi.
Hun leh kum hong kivei a, a restro kikhak mahleh mi tamtak in a nekbawl a limsa ahihman un, mi hausa taktakte khongin a na sam zel uh a, celebrity chef lar tak ahi hi. Hotel thupi taktak 5 star hotel Crown Plaza leh Westin Gurugram, Shangri-La Eros - New Delhi, Hyatt Residency - Pune, Marriott Mumbai & Bangaluru chihte ah Chef ding a ngaihnat leh chialtuam in a na om hi. Eilawi lak ngei ah leng Munirka a omkha masa peuhmah Rosang chih min theilou a om ding in a gintak huaikei!
A tate leng pichingta ahihman un, Mun tuamtuam a zin lehleh sangin chi in, tu'n pi Mary Lalboi in Humayunpur, Safdarjung enclave ah Rosang Cafe a 21 April 2026 in a na hong thak nonta, mi tamtakte kipahna leh nekna mun a suak nonta! Huchi komkal ah, market a a omlouh sung in a restro thak tamtak a na om ahihman in. Kitaitehna a na uangzaw ding ahihman in maban ah sangzaw sem a kal a hon suan a, a hong lohching semsem deihsakna sangpen i khak hi.
Pi Mary Lalboi ahihleh Rosang Cafe pankhetu ahih kia hilou in, business tuamtuamte ah leng North-East India mite tung et gige khat ahi. Gelzang khua ah piang in laisiam theitak ahihman in, mi tamtak in IAS ding a na chi hial manle uh, Pathian in a sapna nek bawlna lam ahi ngei dia, a pai na lam bun mahmah hi. Inkuan haksatak a kipan piang a, zirna leng nei tuamselou a hiai tan a tunna Paite kampaute adia kisaktheihpih tham ahihkia hilou in, suanhuai mahmah hi.
~ PaiteOSINT
.jpeg)
.png)
No comments:
Post a Comment
Comments not related to the topic will be removed immediately.