SPECIAL Intensive Revision (SIR) kiti hi Election Commission of India (ECI) in mi jouse ama mimal cheh voter list a dinga lhenchilna tohgon hoitah anei chu ahin, hiche a hi peidoh dinga kilomho (athi, gamdang mi) tiho kipeidoh (delete) a India mi dihtah akum 18 val ho amin kikhumlut louho khumlut hidiu ahi. I-chennau Manipur ah hin achesa 2004 kum a ana kibol jou kal kum 20 jouva tukum a kibol kit ding ahiye.
IPI BOL A SIR BOL NGAI HAM? - 2004 kum a voter list lhenchilna le kholchilna akibol jou kalse kum 20 sunga athi, munchom chom a kichou, voter list ading a akum lhing a amin kikhumlut nailou tiho jouse avel a lhenchil a athi hole India mi dihtah hilou jouse voter list akon amin u lahdoh a chule akum lhinga voter list a jaolou jouse khumlut theina dinga India danpi (Constitution) Article 324 le section 21 of Representation of the people Act, 1950 noija thaneina dungjuiya Election Commission in Manipur a SIR chelha dinga thupeh ahin nei ahi.
MANIPUR A ITIH LE KIBOL DING HAM? - Manipur sunga hiche SIR hi 30th May a kipan a 28th June, 2026 chan a chelha ding chule 28th June, 2026 nikho leh Polling station ho suhtupna tichu gopkhom thei gopkhom ding, voter tamna jep ho suhkhen ding tiho hung challha ding ahiye. Chujou 5th July, 2026 nikho le Draft Electoral Roll hung kiphong doh intin 5th July a kipan a 4th August, 2026 sunga adihlou ho ki suhdih theina le ajao dinga lom jaolouho khumlut theina phat hung kihong ding 6th Sept. 2026 le Final Electoral Roll hung kiphong doh ding ahiye.
SIR HI KOIJIN ABOL DING HAM? - Manipur sunga SIR mopo ding in Booth Level Officer (BLO) 2956 mopohna achang uvin amaho hin 30th May - 28th June, 2026 sunga ama mopohna muncheh a inson ahin chut uva Special Intensive Revision ahin challhah pidiu ahiye.
SIR HI KICHAT DING HAM? - SIR hi kichat ding ahipon ahinla BLO ho ahung teng angaichat dungjui a eima pan nading dol a phatea panlah angaiye. 2005 kum a eima umna le polling station a i-nu, i-pa insung mi khatpen pen toh eima voter chu link bolding ahin hiche a dinga voter card nei jouse'n eima passport (recent) khat cheh chule identity card khat (Aadhaar/Driving license/School certificate/VA akon residence certificate) Xerox bolsa a kikoi ngai ahiye. 2005 SIR a jaolou ho dinga anu/apa 2005 masang a voter card neiho khat toh link thei nading a i-nu/i-pa EPIC (Electors Photo Identity Card) Number holdoh sa a kikoi ngai ahiye.
I-BOL A SIR GELKHOH NGAI HAM? - SIR jeh in Bihar ah voter 40 lakh val, West Bengal ah 80 lakh val, Tamil Nadu ah 15 lakh val chule Rajasthan ah 30 lakh val peidoh (delete) ahiye. Hijeh achu eihon jong voter card kanei tai tia i-moh lungmon louding u eima cheh in i-kigel khoh uva update i-kibol cheh u ngai ahiye. Tunia nagelkhoh louva namin na ki khumlut louleh khonung le voter list a namin khumlut nading hung hahsa ding ahi. Adeh in eimi hohi munchom chom a chou jing i-hijeh uleh tulai gal le tol i-nei laitah u ahijeh a hiche hi i-ki gelkhoh cheh diu pha ahi. Voter card hi India mi hina dihtah photchetna ahin Aadhaar le adang hohi eima hina (Identity Card) ahin hijeh achu voter list a kamin ajao louleh chidang namdang hon gampam mi ati lah uva jaothei kahi ti hechen pum'a SIR hi i-gelkhoh cheh diu ahiye.
SIR JEH A I-KHO A UMTEI NGAI HAM? - Themjil jeh le natoh jeh a munchom a umho dinga SIR jeh a i-chenna khomun a ga um tei ding tina aum deh poi. Ahinla online a jong BLO hotoh kitho le kihoutoh a boltoh thei ahijeh in eima BLO toh phatea kihoumat phapen ahi.
EIMI HO DINGA SEINOM: - Eimi hohi penna gam dalha a chate themjilna jeh, natoh jeh le thildang jeh a munpi, khopi a chenglut jing te chule kho le veng thah sem jing te i-hiuve. Tunia eiho'n i-gel diuchu Polling station i-nei jouseu va voter list akhehsuh nalou dinga pan hatah a i-lah u angaiye. Acheng le achouva i-ki thangset, engset uva aphachom ding aum pon hijeh achu voter list a phatea i-min u aum cheh nading joh a lamkai ho, Haosa hon Polling station ho a BLO ho min le contact no. ho joh i-holdoh uva mitin SIR a kidalha louding a pan lahkhom phat joh ahitai. Hiche lungput hi muntin eimi chenna jouse a i-nei lou uleh ehsan gal jeh le ukeng neho gal jeh a galjam tamtah dalhah a hung um kha diu khonung a nampi dinmun hatah a ahin tohkhah ding ahiye. Hijeh chun i-bon chauvin SIR hi gelkhoh cheh uhitin miten kholjin, khopem le gamdang mi banga eigel nauva kon onthol nading joh in panla uhitin kithokhom tauhite.
.JPG)
No comments:
Post a Comment
Comments not related to the topic will be removed immediately.