KICHOL LOUVIN CHEJING UTE ~ Phaihel Joujam

Jingkah khat hi kabuhon pum chun ka mobile phone a sermon khat kangaiyin ahileh, sermom kangaipet chun kum 19 masanga ka thilto khat ka lungthim a ahung um in manghil ding kati jongleh amang theipon tuni chan ngeiyin ka lungthima abang komleh ahung um jin ahi. Pathen loupina ding in hin tahlang ing kate.

       Achesa 2007 kum chun tehse numei khat hi cancer natna nei ahin, lupna chunga lum jing lai chun ka testimony seina khat TV a ana jahkhah jeh chun mobile phone akon chun kataopeh angaichat jeh chun kataopeh tan ahi, kidang tah chun Pathen in tehse damlou nu chu anatna akon chun asudam in ama tehsepi jong chun tahmel a eimu nomjeh leh midang honjong ka taopeh ding anop jeh uchun ama henga che ding chun eitem uvin ahi. Keijong chun phatchom ngaitah leh tehse ahijeh chun kalungset in hiti chun jingkah khat chu Activa in kaga chevah tan ahi, lampi chu gojuh lai ahijeh chun munkhat lai chu bonlhoh anal lheh jeng in keijong taona mangcha pum chun kache galkai thei tan ahi, ahinla kahung kilelam chun hiche lampi nalna laitah chun kaki thollhu tan kajachat toh chun vetna ding jong kahetlou ahitai. Hitichun pasal khat chun eihung kaithou in olchan ka Activa chu ka hintol kit tan themkhat asetna aum jeh chun gari workshop a ka vetsah in hiti chun keichu lunglengvai tah in kalungthima kataotan ahi.

    "Hepa, nangma natong in kachapa vetkol ngai dalhan kache doh in, lampi phamo lheh jongleh neipanpi ding kaging chan ahinla nei panpi tapon melsetah in lampia kalhu kit in ipi tia hitia neibol ham? Ahilouleh kahou hi Pathen tahtah nahilou ham?" hiti chun kataotan ahi, ahinla Pathen O mong mong kaja pon athipchet jeng in ahi. Kagari jong chu asem jou kigo tauvin kasumnei sunsun chu kapeh ngaikit kakigel leh numei lunglhom kihi jeh chun kalha ase mama jeng in kingaise tah'a kaum lai chun O kichentah chun ei houpi ahung umtan ahi. Hiche ka O het chu ahileh "Kana natoh nom mong mong ninam?" tichu ahitai.

     Henge, kakigel in Pathen natoh hi nopsela kimoh vangphat jeng ahipon gentheina hahsatna tamtah um jongleh Pakai nung chu jui teitei dingjoh ahi tichu ka hetchen jeh in "Henge Hepa nangma na katong nom mong mong e" tin kalungthim pumpin Pakai Pathen henga kaki pedoh thah kittan ahi. Kagel leh tulang hinjong Pakai na kathei kham khama katohna ahin abang komleh hahsatna lampi kalhoyin kaki tollhuh nikho jong aumyin ahi, ahinla kei lhasam leh hatlou hijongleng Pakai Pathen henga katao jingin ama chun alungsetna khut chun eikai thou kityin ahi.

    Tukum 2026 jong hi natna hise phalou leh galthu jat chom chom itoh uvin mi tamtah chun hahsatna leh gentheina  thina chan jong itoh kit taovin lungthim ana ji lheh e. Taona jong ithei chan uva iman diu tahsan aum in, ahinla itaonao Pathen in isan pehlou ujong iti maitheiyu ahi. Ahinla Pathen in itaonao angai lhajing e. Bible a imu bang uvin Pakai Jesu hungkitna ding nikho anaitah jeh in hiche leiset gim gentheina hohi hung um ding mong chu ahi. Hijehchun ilampi lho u ananal in ana kipallhu kha jong leuhen Pakai hatna gingchan thoudoh kit jiu hitin Pathen dei bang tah'a hinkho mang cheh ding in Pakai min in iki tem kit uvin ahi.

      Rome 13:

11. Hiche phat hi itabang ahi naheuve, hiche nidan hi ihmut akon a khah phat ahitai; ajehchu itahsan tiillai uva sang in tuhin isochatna diu anaicheh tai.

12. Jaan asotjo achetan, khovah lhapai ding ahitai. Hichejeh chun muthim natoh pailhau hitin, khovah von in kivon uhite.

13. Juneh motchon leh jukham, huh leh jonthangho, kinah leh kithangset bol louvin, khovah noiya bang in chon u hite.

14. Hiti chun Pakai Jesu christa kivonjo unlang, tahsa lungna chimna ding in tahsa lunggul imacha suhbulhit ding got dauvin.

Asim jouse Pathen in phatthei boh tahen.  Amen !