Polio drop khat zong mulou

“Tutunga IPPI (Polio Drop)-2013, naupang kum 0-5 te dawnsah ahina toh kisaia kou khuo bang chih chieng in a hing tung diei chia kana ngahlai un ahing kinelsia tamawh a ka naupangte uh Polio Drop dawnlou in aum uo nopmo kasa mama uhi”, chia Zogam Today (Feb 6 issue) Mangkhanlien, secretary, New Zoveng Village Authority in lai a ha khu a kisaipi department ten a ngaihven piah ding uh a dei huoi. New Zoveng khuo kiphuna bang kum 20 chingtou ding ahita a hinanleh tutan khatvei majong PDS itemte katang khanai sih uhi chi'n zong gen nalai hi. Tamte khu solkal nasem te’n bildaw theilei hoi va.

 

Mihing khu Polio Virus pawtu (carrier/reservoir) pen khat chi'n doctor ten gen. Polio ahileh chii thum type 1, 2, 3 a khen in um hi. Type 2 ahileh amasapen suhbei (eradicate) maspen ding a kigen khat ahi. Tuazaw chia type 3 leh type 1 polio virus khu mihing tenna (human environment) a pat suhbei ding chih India in buoipi mama mai hi. Tami type 2 virus suhbei theina din area-wise (mun) a huop in nasepna pibawl hi. India hapanna zal in type-2 khu kum 13 beisa in suhbei zou in um. Tua dungzui in Manipur a Directorate of Family Welfare Services (Health & Family Welfare) in zong i gam ua polio virus suhbei sawm in tukum bul January ha in panla hi. Tami tupna ah naupang kum 5 nuoilam khu polio piah ding chi ahi. Tuni'n i naupangte uh polio kipia sihleh bangma chiin polio virus khu i gam ua pat suhbei in um ngailou ding hi. Tami lawchinna ding in khotang (public) leh government agencies (govt nasem, etc) te’n dihtat tah a nna i sep ding uh a poimaw hi. Khentuom paituom nei a langbawlna in maban ah naupangte tungah sil hoilou tun thei ahi chi thei chiet vai.

 

Ei gamsung chauh a tambang peipi ahisih a India sung mun tuomtuom ah public leh solkal nasemtute pangkhawm zen in napi’n polio vaccination khu khochin ah naupangte dawnsah in um hi. Tuabang ahilai a ei Lamka khawpi sung a atang nailou ahilouleh manghil kha, manghil khem...chite a um thei pen sil lamdang ahisih hi. I khotaang hinkhuo uh hoisemna ding leh i naupangte uh damna toh kisai ahizieh in polio damdawi khu naupang chin teng, a kum in a huom khat teng khu pellou a pieh ding ahi.

 

Manipur ah Intensified Pulse Polio Immunisation (IPPI) campaign January 20, 2013 nin pat in um a, tam khu i tenna gam ua hoihtah a bawl din zong Solkal in ana gen hi. House-to-house bawlzaw ahisih leh zong aveng aveng a bawl a khaw tuonsih hi. Hinanleh naupang kum 0-5 kikalte immunized bawl ding chi khu zui theilei naupang tampi’n damna nga ding uhi. Family/Health lam toh kisai a solkal nasem te’n polio vaccination poimaw dan zong mipi/khotaang a theisah deihuoi hi.  I gamsung ua Pulse Polio Immunization Campaign khu bawl ding kilawm bang in bawl lei, khangsawn ah tami zieh a naupangte tungah hasatna tunglou ding chi a gintat huoi. Tunia tami campaign poimaw dan theisiem khalou ding khu a vangsiet huoi mama mai ding hi. India solkal in tambang a ngai poimaw a, ei district khat sung lel a teeng, semtu te’n mipite khuol khalou ding uh a vangsiet huoi hi.

 

Polio natna zieh a ‘zeng” (paralyse) tung chi i thei chiet ua, polio vaccination tungtang United States (USA) leh gam khangtoute ah nasah tah in bawl in um a, tam gamte ah sawtpi apat polio suhbei phiel in ana um chilei i genkhiel sih ding hi. Tami natna khu a taangpi in naupang (children)-te lah ah tung nuom hi.  Tami natna khu kive’ng thei ana hi a, kivenna khu a hun bang a bawl ahi pouleh kivenbit thei ahi. Tami natna venbit ahilouleh suhbei ahitheina din khovel pumpi ah World Health Organisation (WHO) in zong buaipi pha hi. Tuabang kal ah, tunia New Zoveng khuo a naupangte polio drop piah lou a um khu a kintheih pen asaitu te’n a ngaihven ding uh a poimaw hi. Family Welfare Department ahilouleh Health Department lam te’n tami khuo a din Intensified Pulse Polio Immunisation (IPPI) campaign hing ngai poimaw deu uleh hoiva ei.

Editorial, Zogam Today 

-:(06-02-2013):-

Share: