TET exam form mantam se’ng

(Why TET exam form cost Rs 300?)

BOARD of Secondary Education Manipur (BSEM) in district headquarter teng ah Teacher Eligibility Test (TET) March 24 (Sunday) chieng nei ding hi. BSEM notification dungzui in February 6-14 sung in ZEO office teng ah TET exam form Rs 300 toh lahthei hiding. Exam form ahileh February 16 tan a BSEM, Imphal ah submit (pialut) ding chi. February 2 apat February 16 sung ah ni 14 (two weeks) chauh hun um hi. Tam hun khu gintat sa’ng in a tom deu hi. Them khat saau sah deu uleh chi a dei huoi nalai hi. Tua chauh hilou, TET exam form khat ah Rs 300 (for SC/ST/OBC/PH) hisah nalai uhi. Tami khu a tam seng hi. Bangzieh a TET exam form ahichi mantam sah uh adiei?

 

BSEM in tami form Rs 300 tah a man sah khu sil dihlou ahi. Exam form maimai a candidate te'n ta zaza a seng ding uh khu sil kilawm lou leh candidate (applicant)-te adia sil hamsa khat ahi. Ni khat thaman in TET form exam lei zoulou china ahi. Solkal in tambang a exam fee a tamsah ding hizaw lou in candidate te'n awlsam tah ahilouleh a huntaw khat a aleizaw theina ding uh a ngaisut ding uh ahi. Hinanleh a dahuoi mama a, i board nei sunsun un tambang a form man a tam sah khu nichin a neh-le-dawn suitawm te din a hasam dieh ding hi. Amaute khu ngaisut pha in a umsih uh chi a chieng mai hi. Azieh ahileh ni khat thaman sa'ng a TET exam form mantam zaw ahi maw chi’a.

 

BSEM in paulap ding a hau mama mai ding a. Hinanleh India pumpi ah tambang exam fee state dang solkal in bawl ngailou hi. Tua ahileh ei Manipur in bang chidan a abawl thei hita? BSEM in central/state apat in zong fund a nei ding hi. BSEM khu solkal hilou i bangdia mipite apat sum ta zaza a hailut sawm. Mipi te'n TET form kihawm masat tung lai apat in a fee i na ngaisah sih ua, a exam ding ahilou leh a service mu ding lampang i na ha et zieh uh zong hikha va'n, ahi’n tun khahlaw a hunta!

 

Tualeh TET Exam form ZEO office teng a kihawm (issued) thei mabang in ZEO office mah ah form submit thei ding a BSEM in abawl ding ahi zaw bawn. Tami form submit ding a Imphal kuon ngai gige zong mipite adia sil hasah khat ahi. Azieh district teng a candidate tampi a sa'ng a sim te'n a submit ding in BSEM office, Imphal ah va kisuh khawm ding ua, BSEM office khu kawchi sah maimai ding ua, hun-le-tha seng in a submit ding in kiguol phengphung ding uhi. Imphal khelkhel a submit ding chi khu suh tawp a hunta hi.  

 

BSEM Office, Imphal khelkhel a submit ngailou a manih district a ZEO Office mun ah submit theidia bawl hun ahita hi. ZEO in tambang a sai sihleh banglam a sai ding hita? Bangdia ZEO office a submit a bawl thei hilou? Tami mun a submit thei hi ngengngong leh mipite adin zong lungnop huoi ding hi. Tuni'n TET exam form fee chauh ahisih a a submitna mun zong ngaisut a tham a ching hi.

 

Tambang a BSEM in exam fee a tamsah leh Imphal a submit ngai sese a chi khu ngaisut tha kia vai. Mipi te’n mantam sah khalou i hiei uh ma, ahilou leh soisel ding umlou i hi uh ama? Tambang a exam fee mantam hei a um mawngmawng diei? India sung ah tambang lawmlawm a exam fee mantam a maw um zepzep sih. Tuazieh in Lamka khawpi a om civil society tuomtuom, adieh in student union (organisation) pawl in a soisel a hun hi. Tualou in maban ah tasa’ng in hing mantam zaw khalai ding hi. Tunia Rs 300 khu bangma lou in na koi maithei, Exam form fee Rs 300 man chi khu a mantam dan na theilou kha ding a puonat huoi.  Nichin a neh-le-dawn suitawmte din mantawm mama sih ei guai!

Editorial, Zogam Today

 

-:(05-02-2013):-

Share: