UZO Fort Wayne in Indo-Burma Zo Seminar sponsor ding

USA ah Zo International Convention 2014 um ding

Fort Wayne (US), Sept 4:  August 31, 2013 ni’n UZO Fort Wayne meeting thupuasah khenkaht mipi thei di’a kilawm chi’n United Zo Organization of Fort Wayne in internet tungtawn in tahlang. UZO-USA in a na pat Indo-Burma Pu Zo suante seminar khat vei zop tou kia ding in kithukim a, 2014 kum bul lam a zop tou kia ding in thupuahna nei uhi. Indo-Burma seminar ah main topic ding in “Identity issue” hi ding a UZO Fort Wayne in sponsor bawl ding chi zong thukimna nei uhi.

UZO Fort Wayne in a tahlangna ah Zo International Convention 2014 kum sung a bawl teitei ding in kithu kim ua. Zo International Convention ah USA, India, Burma leh mun tuomtuom pan mi muonhuoite USA ah kimutuo sah ding chi ngimna ahi chi uhi. India lam pan mi muonhuoi-te toh kithuzah di’ng Thang Za Bawi leh Thian Biak Lun mawpuohna pie ua, Burma lam pan a mi muonhuoite toh kizom ding in Dr Pau Cin En leh Mang Lian Hau mawpuohna guon uhi. Tami Zo International Convention ah main topic identity issue leh pilna lam toh kisai, khantou theina ding thu dangdang zong hiding a, UZO Fort Wayne in sponsor bawl ding chi’n kithukimna nei uhi.

UZO Fort Wayne in lei tung mun tuomtuom Pu Zo suon sung pan PhD candidate khat poupou, a ki sap na dung zui in hi theina zaza toh panpi ding in kithukim lai uhi chi.

Thu dang khat ah, Burma zong democracy lam huilan dan hoitou zel in sil tampi kikheng hulhul in muh thei hi. Kawlgam lam UZO ta chi thu muonhuoi apat kiza hi. Khampat (1) UZO President Rev. Go Za Suum apat thu kimu dan in zaangdung lam a UZO pienni te: 29th Jan 2013 Kalay Block UZO President Dr Kai Hau Lian Pau, 8th June 2013 Tamu TZO to UZO [Tamu Zo Organisation apat United Zo Organisation], 9th June 2013 Khampat (1) UZO President Rev. Go Za Suum. Tuaban ah khamtung lamah zong Tedim Myo leh Tonzaang te ah UZO umzou ta ahimanin tukum beima in Village UZO umzaw nading leh aban ah Myanmar UZO pichingtah a idintou sah zaw nading in thungen chiet vai chi uhi. Tualeh koikoi UZO tatzie a tumpihui ikibat kim ding zong ngaisut lian mama khat in koi chiet vai chi uhi.

Tuaban ah tui akimkot (island) gam New Zealand a um Pu Zo suon teng in Zo ih hina kumpi te’n ei chiaptena (recognize) diing leh Zo suon teng ih khantouna diing ki vaipuohna diing in “New Zealand Zo Community” (NZZC) chi'n matpongten (Registration) ka siau uh pen Toupa hepina toh August 7, 2013 ni in hing kia ta hi chi uhi.

~ Joint Editor, Zogam Today

Share: