Delhi Khalvontawi Meet 2013................KV News Special Issue 2013

Report:

Delhi Khalvontawi Meet 2013

Kumsial a Khalvontawite kimuhkhawmna, tukum adia 9-veina Khalvontawi Meet JNU, Committee Room SSS-I ah Dec 6, 2013 ni'n kinei. Programme pen Tg. Khaalnou (Bruce) conductor hihna nuai ah zak in om hi. Thupi in'The eye is the lamp of the body. If your eyes are good, your whole body will be full of light", - Matthew 6:22 kizang hi. Lia Hahat in Pasian kiangah thumna nei in hun pat in om hi. Tuakhit in Tg Kammuanmung, Chairman, KV Delhi in vaidawn thugenna nei hi. Kumbul lam a hung na mualliam san TSP Lapi phuaktu Pu T. Kapsuanthang zahtaak na'n minit khat dai dide in maimit dinpum in kisi'ng hi.

KV zaila awihsiam Lia Ruthi leh Kimboi te'n (L) ST Mang phuak "Sian Vontaw Lia leh Tangte" chih la Pasian phatna di'n sa uh a, mipite bil taisak mahmah mai uhi. Tuakhit in Rev. Dr. Langkhanthang Lianzaw, Founder & CEO, The New Beginning Gospel Ministry International, New Delhi in thu genna nei hi. Ama tanchin ngaihnuam huai takmai, Delhi ana tundan, gentheih-haksat ana palsan dan banah Jesu Krist ana muhdan genkawm in KV-te hanthawn hi. "Mihing in ngaplei, kipan peuhpeuh lei Pasian in hung mapui ding hi" chi hi. "Kuamah a siamsa a piang hi kei, hinanleh ginom leh kuhkaltak a tupguhna toh i pan peuhleh a lampi Pasian in hung guan zel hi" chi hi.

ZCF Pastor Rev. Jangkholun Mangte in hanthawnna a genna ah, "Ahun amun leh amual toh kituak a om di'ng" chi'n KV-te thumop hi. Mahni pumpi kepsiam ding, hun zakdan siam ding chi hi. "Sum paisa pen kizong a kiloh dok kik theih hi, hun paisa pen kiloh dok kik thei nawnlouh" chi lai dep hi. Pastor-te thugen in mipite lungsim bun mahmah hi. Ama thugen tawpna in ama ngetna bangin mpite'n TSP Lapi 'Nun Bang Nuam E' chih la kisa hi.

Paikhawm teng in kipulakna kinei chiat hi. Tuazohin 'Government leh Private Company a Sep' chih thupi ah mimal ngaihdan sunkhawmna kinei zaizai. Apatna dingin Tg. Mangneu Thangkhal in panna neilou (neutral) in houlimna nei hi. Ama'n "Private leh government pen debate thoh dingin zong ka koih kei a, government a ahoihzaw chih ahi mai hi. Ahi'n government sepna ahihhangin (ka gensiatna hilouin) sepaih leh nurse i chihte bang a utloute adi'n ni khat va sep ding zong ngap huailou zel hi. Tuaziakin i lunglutna lam toh kituak sepna zong ettheih poimoh hi. Government a sem a tate school/college fee toh buai touh den sangin private a loh tampi santheihnate bang adeihhuai zawkna om hi. Tuaziakin private lam ah zong opportunities om ahi ka chi hi" chi'n khin hi.

Government lam ah Tg. Zamin Thangkhal in "Government a pen sepna amuh hak banah a tawp zong haksa, office zong dak 6 tan kichi pen ka lawite dak 5 a kipai siang uh" chi'n ahoihna gen hi. Lia Haunu (Call Centre a sawtpi sem, senior mahmah) in private lam hoihna agenna ah, "Ei mite kum 4/5 government kham gelh a i buai bangin private a huachi buaipih lei hua hunsunga i 'life settle' man ding i hi uhi. Governmnet a i muh keileh kingaihsiatlouh ding private lam a zong lampi om ahi. A sanglam i va tunzoh chianga a nasep zong nuam semsem ahi" chi'n gen hi.

Tg. Hanglamthang in, "Government a ahoihna ahihleh nasep awl nounou a zong sep theih ahi" chi hi. Private Company lam Tg Lalpu @ Thanglianlal (Call Centre senior executive) in zong call center a process tuamtuam omdan leh laisim apoimoh dan gen hi. Student lam ah Tg. T. Kamdinglian "Kei pen nasep ka thadah ziakin private a sep ding pen ngaplou, zong sep sawmlou ka hi" chi a hih pen Lia Haunu in tangtakin "object" hi. (I touna mai a microphone ki 'on' in midang thugente i pom keilezong ki 'object' thei chidan ahi. Maimailou!). Tg. Khallal Phiamphu @ Kaplal in zong, "Government a sepna kimu kei taleh inlama solkal kham leizohna ding a private a sep di thu ah private lama semte'n bang ngaihdan a nei ua?" chih dokna bawl suk giapgiap mai hi. KV ex-chairman Pa Ginlun in "I gam uh socialist government ahihziak in ei te'n government khaam mah i deih tetaw uhi chi. Government a semte mi thadah tangpi, sum negu ahi ua i Bible toh zong kitualdou ahi" chi'n chiam nuih thutakin gen a mipite kinui zaizai hi. Hih point pen Tg. Zamin in 'object' kik leuleu hi. Ama'n a thukhitna ah "Private a te chu mifelte ahi uhi. Tuaziakin hauhsat na-ut uleh private a sem un" chi hi

Nu-le-pate'n hih houlimna pana apan ngaihdan anei ua chih dokna ah Dr LT Lianzaw in "US ah private company a sem 90% hi ding a (India toh kikhia e mataw!), leitung pumpi et in zong government a sem 20% bang hi giap ding hi" chi hi. "Tuaziakin private a zong asang talctak va tung zou lei government a sanga sum tamzaw muhtheih ahi" chi hi. JNU a PhD bawl Tg. Kammuanmung @Muan bro in ama experience a genna ah. "Private a kaseppih Kolte'n kum sawtlou sungin lakh 2/3 bank account ah kineihzoh ua, eimite'n amau apana i zil ding ahi" chi'n gen hi. Tualeh Lia Hahat in ei zong "Private hospital lak a i sep hang in Government a mah kideih vevaw a, miteng in a deih chiat uh i gingta hi" chi'n gen hi. Tutung discussion pen nuam mahmah mai a, maban ah zong thupi zawsem a sai din ki phur chiat zeizai mawk hi. Nuam ei!

KV-te lak ah lami mahmah Pa T. Henry Mungnou Thangkhal in a tangval lai a aphuak, kua a phuakna adiai vang gen sam kei, a la 'Khawksa Sese Tuan Khang E' gintat sang leh kinepzah sanga fuhzaw in ung awi hieuhiau a mipite'n huihui chi'n khut kipeng nainai hi. (KV News saite'n a numeinu pen JNU apan ahi chih ana thei kiukiau uh a, tu in ama'n Bank P.O. sem in pasal zong neita chi sawnsawn lai uhi. Aban full stop). Ama lawinu'n zong nui hiuhiau kawm in ala sak ana ngai ve sam hi.

Tua zoh in hunkem Tg.Khaalnou in "UZO H.Q. Election kichaita, Delhi Assembly Election zong kichaita, tu in KHALVONTAWI Election hun ahita" chi'n puang a mipite'n kinui zaizai kik hi. Khalvontawi Delhi 2013-Dec 2015 sung vaipua ding telna hun kinei hi. Election Commissioner a kiguat Rev Dr. LT. Lianzaw, Rev J. Mangte leh L/Upa T. Ginluntang te'n feltak in hung sai ngai ua, mipite'n ballot paper in vote kikhia chitchet mai hi. A saitute'n khauhtak a ung sai ziak uh adiai kuamah kiu-aw kau-aw ahihkeileh buaina bawl chi thu zak in om vetlou. Result simna om a, tuanah Mr Zamin Thangkhal (Khailianlal), Mr Khaalnou (Bruce K. Thangkhal) leh Mr Thangboi (Hanglamthang) te Chairman, Secretary leh Finance cum Treasurer in kitelching hi. Rev J. Mangte in namdetna leh vangbuakna neih sak hi. Tuachi'n chibai kibuk chiat ua, mipite'n khutbekna toh lamkai kitel khete zahtakna pia hi.

Government service muthakte KV Delhi in kipakpih na'n silpiak (gift) leh annkuang kisawk khawmpih zel hi. Tutung KV tangval sitset muanhuai bimbem Mr Khailianlal (CBDT nuai ah Tax Assistant a sem) leh Mr Ginmuanlal (DU nuai a Motilal Nehru College a Assistant Professor, Ad hoc a sem) ldangah KVD sik-le-ta'ng in Nu Chiin (Sianmuan'nu) leh Nu Ngaiching (KVMeet hung uaptu) te'n piakkhiatna ung neih sak uhi. Tg Khailianlal thugen hun a kipiakna ah "KV kuapeuh SSC exam nuam te'n kung panpih na poimoh uleh every Saturday & Sunday 24x7 ka free gige ding hi" chi a, khut kibeng nainai hi. Tualeh Tg. Muanneu in "Govt service (SSC/Banking) a din Mathematics siam poimoh a, private a sem din English siam poimoh" chih thu pansan in gen a "Khawllou a laisim ngap Ioute private ah sepmai ding" chi'n KV-te hanthawn hi.

Theihloukal in hun ana bei mawk a, zanlam dak 7 ahihtoh kiton in Tg. Hanglamthang in vote of thanks gen hi. Rev LT in KV Meet khakna leh annkuang thumna nei a, tuachi'n itna annkuang kiim khawm chiat hi. Annek khit in zong mi honkhatte JNU campus sunga North East Dhaba achihna uh zuanin a "pair-pair" chuh hilouh deuh in kipai suk nainaia singpite, coffee-te bangte kidawnkhawm hi. I theihsa mah bang un KV-te i kimuhkhawm chiang un dakkal khat kichite pen tuibuuk muamtam kaal (tulai ham hileh kuhva hai kaal) bang lei ahi a, baiblek hon mawng min ne mah kibang zuazua a gen di sak di zong tam thei mahmah sam ahihchiah zan dak 9 nunglamin naaknaaka kikhen thei hamham chih khat in ki om hi. Discussion a kigen khalou thu poimoh mahmah akinung theih khiat khat ahihleh, "Laisim ngapte'n simsim mai di, PhD zoh ding tua hileh khaam muhlouh pumpang chih om samlou hi. Tulaiin scholarship zong tampi a om ziakin kisik huailou ding hi. Tua chia sim peih vetloute'n 10+2 zoh chianga gelh theihtheih - clerk (LDC, Bank, Short­hand etc.)-te gelhsuk pai di, correspondence a BA bawl ding, tua hileh laisim a na zomtoute'n MA lak azoh chiang ua ei zong i suai ana hing manta ding" chih dan deuh ahi. Deihtelna nanga ahi!

Tutung pen gintat sa'ng in ahun- le-mun lemtang lou in om mahleh nuam tak leh lungkim tak in KV Meet kizang thei hi. Dam leh kum kik 2014 chiang kum Delhi KV Meet kum 10 chingta dinga, bang chi'n i zang ding uai chih KV-te kihoulimna thupitak ahita hi. Tua hun chiangin, KV chairman pu, secretary pu leh finance pu a 'single' lai na di uai? Chihte zong mipite kihoulimna zak guldn om panpanta hi. Bil nei khempeuh in za dekdek ta hi!

- By Bruce K. Khaalnou, Secy. KV Delhi.... with inputs/masalasfrom KVNews editor.

Share: