LAWMCHING FC ZOMI-COLONY A HING KIMAWL DING

LAMKA, MARCH 04, 2018: Eimi Numei naupang football lang a ana sang tung pen telawi a chiamte thamching ngahnou Lawmching khu tutung The 1st Churachandpur Women's Football Tournament Lamka Public Ground a FC ZOMI COLONY a hing kimawl ding in Imphal apat Lamka tung ta hi.

Ama ahileh Imphal a um Pa M Thawmzalam leh Nu Lydia te gil a ga goutan khat ahi. Ama khu masang in District Youth Affairs & Sports te saina nuai a 6 months course football training Khumanlampak Imphal ah April - September 2016 sung natel hi. February 20-24,2017 in zong Chennai (Tamil Nadu) ah KHELO INDIA 2017 under 14-Girls a Manipur State ai Oh in selection ngah in va kuan a, tuana team bangzat te tung ah GOAL tamtah vakhum a, tualeh 3rd place kituna a zoulou un 4th-na a pang uhi.

Tualeh May 1-10, 2017 in Prime Minister Talent Hunt Assam Rifles te saina in OORJA CAPF under 19 Football Tournament 2017 (Khumanlampak) ah Eastern Sporting Union (ESU) min in napang a tuana zong goal bangzat e khat vakhum kha in runners-up in pang uhi.

Tualeh 22-26 July 2017 in state Inter School Subroto Mukherjee Football Tournament Under 17-Girls Imphal East a Poireikhongjit High School min in Khumanlampak main stadium ah District 10 apat team 10 kidemna tel hi. Final kai ua Final ah CC Hr Sec School I/W toh kimawl ua Lawmching in gualzaw na goal khum in 2-0 in zou ua, Khatna la uhi. Tam Tournament a winner/champion ahi zia un September 3-15, 2017 sung in Manipur State ai Oh in Subroto Cup international football tournament 2017 Junior Girls (under 17) ah va kimawl a A team te QUATER FINAL tan tung uhi.

Tualeh 17-22 January 2018 in Pune a ama Captain na nuai ah 63rd National School Games a Manipur min in kuan a tuana Maharashtra te 2-0 a zou un 3rd place a valahpi hi.

Eimi naupang nou tutan a tam tan tung khu amaban zong limchi tou mama hi. Ama akimawl chiang in game spirit zong nei mama a tualeh akimawl dan zong et nuam huai mama in mipite mit zong tai sah mama hi. Pasal te kimawl dan toh kibang veve hi.

Tutung Ccpur a ahing kimawl masahna ding ahia koipou ama kimawl en utte'n zingchiang tarik 5 March ah The 1st Churachandpur Women's Football Tournament Lamka Public Ground a dah 1:30 pm a FC ZOMI-COLONY min a hing kimawl ding hi. Tualeh Club Manager-pi apat thu kimu dan in Lawmching in Captain in team te makaih pi ding chi hi.

Va en un kisia lou ding na hi, eimi ngahnou numei te zong mei mei tuan nawnlou hi.

~ Zolengthe

Share: