KHEEMNA ZIAK A KHANNA/ VUALZAWLNA

 B. Mualhoih Pastornu Nenem Sermon Note at Lamka Church on 09/10/2022

TOPIC: KHEEMNA ZIAK A KHANNA/ VUALZAWLNA

TEXT: JAKOB 1:12

Introduction: 

“Kheem a ka omna peuhmah Pathian lam a dia ka heutu ahi” - Martin Luther 

Kheemna i chih Satan in nang hon hihsiatna dia a galvan bulpi ahihlai in, Pathian in na Khanna dia na zat di’n a hon deih hi. Chiklai peuh a khiallou a, thildik na hih chiang in, kei omdan bang a khang na hi, chih Pathian hon chih di dan hileh i chi ahi.

Christian numei hihna ah mawhpuakna tampi i nei chiat diing un ka gingta a, Saptuan tawh kisai bang, innsung tawh kisai bang, sepna tuamtuam tawh kisai bang in, mite hon muhna leh theihdan saang a lianzaw, i zohlouh diing khop a lianzaw nei zong a ki-om diing in ka gingta hi. Kei diakdiak bang leng, mawhpuakna zoulou pen ka hi. Kei lam hon gen zek leng, tuailai hun, nu-ngak/naupang hunte bang a kizatna ah, Saptuam lam ah a na kinei tawm mahmah in, thugenna chihte bang, thakhat thu a i tan chiang bang in, haksatna tampi kituak in, huchih hun chiang in setan kheemna tuamtuamte gintatlouh lam ngen ah a hong tung zel hi. Noute’n leng huchibang thilte na tuah hun uh om mahmah diing hi.

Kheemna tampi omte lak ah, tamlou kikum khawm leng i chi a;

1. TEHKAAKNA- Gal. 6:4

LST in eimah leh eimah ki enchain diing hong chi napi, eite pen mi dangte tawh kitehkak in, i kibulhtuah nak uh hi.

(a) Silh leh teen thu ah bang- Mi a bang nei zoulou chi a kikhop thadah pawl bang omthei hi.

(b) Nu-le-pa kaal thu ah bang- Mi zite/ pasalte huchi a nang huchi theilou.

(c) Innsung thu ah gen diing a tam mahmah a, buaina neite ngen leng i hi phial uh hi. Toupa a diing a na kipiak a, a nna na sep chiang in Setan kheemna innsung ah a hon glut pah diing hi. Na innsung leh mite innsung na tehkaak ut pah diing hi. Neih-le-lam thu ah bang, ahihkeh nu-le-pa, u leh naut hu ah bang…

Hia i gente pen leitung mit tawh et in a bei ngeikei diing hi. Leitung i damsung a om toutou diingte ahi hi. Huaiziak in, eite pen, Christian i hihna uh dungzui in, i mawhpuakna uh tuh, tunglam en a, mi dangte enlou diingte i hi (Kol. 3:2= Tunglam a sil omte ah na lungsim uh nga unla, leitung a sil omte ah ngakei un).

2. Itna:

Pathian in itna a hon hilh a, huchi ahih dungzui in, itna thu zui diing a pan na lak tak chiang in melmapa Setan in pan honla in, na kiim-le-kiang ah na it theih hetlouh diing hon omsak hi. Mi ithuaite leh nang hon itte na it thukna ah, i omdan hih khan in a om kei ahi. Pathian in lungkhamna lak ah kipahna taktak a hon hilh hi. Huai tuh amah lam i ngat chiang in ahi.

3. Hazatna: 

Pau. 14:30= Lungtang hoih sa a dia hinna ahi; himahleh hazatna tuh guhte muatna ahi.

Hazatna a kipan a eite’n i lungtang uh i kepbit diing uh hinapi’n kep haksa mahmah hi. I kepbit zohlouh chiang un ei mahmah a diing a guh-le-taang muatna a na hi daih hi. Hazatna tawh a omkhawm deuhte pen, lungmuanna, khamuanna tawh omkhawm theilou uh hi. Hazatna in i neihlouhte ngen en tawntung ahihman in, huaite pen Setan vanzat a na hizel hi.

Pathian in hiai a i genkhawm tuamtuamte a pan a ei panpih dia hon ngak a, bang dia eite’n amah naih ngeilou i diam? Eite pen, khatveivei bang panpih a om utlou in i om uh hi. A dikkei chih i theih zeenpi kheemna ah i lut uh hi. Khatveivei bawl/sep bang poikei chihna in i dim uh hi. Huchih hun chiang in ei leh ei ki-ngaihniamna diklou a lut in, Pathian kiang a panpihna nget bang i ki-zumsak mawk in i om uh hi. I Pathian inzaw ninhuai a hionsa kei a, Amah kiang i zoty diing hon ngaklah gige hi.

Pathian tung a i ki-ngak chiang in kheemna in hon buan hi. Himahleh huihpi’n singkung lianpi a nuai chiang in a zungte kip deuhdeuh in a khang deuh deuh uh hi. Huchi mahbang in, kheemna na tuah a na dou zoh chiang in Jesu na bang semsem diing hi. Na puk chiang in, na utthu a na hih hinapi’n a se tawpkhawk tunna a hizen kei hi. Kheemna na tuah chiang in Pathian entou inla, panpihna ngen in.

Atawpna pen in, kheemnate bangchi zoh diing, a zohna diing lampi pen Lai Siangthou sung ah om hi. Lai Siangthou sim gige inla, chang ½ ni teng or kaal khat a khat beek byheart sawm diing ahi. Hileh i Lai Siangthou thu theihte’n lungkham huai kheemna na tuah hun in a hon panpih diing hi.

***

Share: