Pathian toh kinaih a om mite hinkhua (Gen.39:2; Dan.1:8-12; Lk.1:38) - Rev Thangdoulal Suantak

Thumapi

I khovel hinkhua ua mi lawhching hih ding utlou kuamah i om khol kei ding ua, i utdan uh leh i nopsakdan bang ua om ding bang leng i ut chiat diing un ka gingta a, hileleng i vek un, i utdan uh leh i nopsakdan bang ua lawhchingtak a hinkhua jang i tam kholkei ding hi. Huai ziakin Pathian toh kinaih a om mite hinkhua bang a chi a chih i en suk ding uh hi. 

1. Joseph Hinkhua

            Gen. 30:24 a i muhna uh tungtawn in Joseph ahihleh Jakob tapa sawm-le-khatna ahi a, Rachel dinga a tapa khatna ahihban ah a pa deihtuam leng ahi hi. Ama'n a pa Pathian a zahtat a huchiin zuau leng genlou in, a pa leh a Pathian mitmuh in diktattak in a om hi. Hiaibang a hinkhua a hong zatlai in ni khat a unaute tungtang a thudik, a unaute'n a pa theih ding a laau mahmah uh, a omdan hoihloute uh a pa Jakob kiang ah a genkhia hi. Huaitakin a uanute'n amah a hua ua, a mudah uh hi. Hichih hunlai in Joseph kum sawm-le-sagih a upa ahi (Gen. 37:2). Hiai hun a kipan in a unaute'n a hihsiat-theih na ding uh a ngaihsun ua, huchiin ni khat a belaam chinna uah, Ismaelmi sumsin a khualzin khat kiang ah a juakkhia uh hi. Huchiin in hiai Ismaelmi sumsinpa in Aigupta gam a tonpih in, sepaih heutu Potiphar kiangah a zuak a, huachiin Potiphar in a sila dingin a na lei hi. Joseph in Potiphar inn ah leng a Pathian zahtat kawm in nna a sem a, huchiin a pu deihsakna a tang hi; hileleng apu Potiphar' zi ziak in buaina a tuakkha a, huchiin suangkulh ah a omlawh hi. Huai ah leng Pathian zahtat kawm in a om a, huchiin heutute deihsakna a tang jel hi. Joseph in huai suangkulh sung ah kilangtak in lawmthak mi nih a mukha a, ama'uhte kiangah na pawtkhiat chiang un hon mangngilh kei un aw, chi in ngetna a bawl hi; hileleng ama'un a pawtkhiak nung un Joseph a theipha nawnkei uh hi. Huchiin huai jailsung pan a Joseph pawtkhiakna diing lampi omlou toh kibang ahihlai in Pathian in Aigupta kumpipa mang a mansak a, huai mang lehna leh a khiakna theijou, Aigupta gamsung ah mi kuamah a omkei hi. Huchiin Joseph mangleh siamna, Aigupta kumpipa uain pepa’n a hong theikhia a, huchiin kumpipa kiangah a hilhta hi; huchiin kumpipa mang a lehna leh a khiakna hilh dingin suangkulh a kipan in Joseph sapkhiak in a om a, huai kumpipa mang a lehna tungtawn in Joseph tawisan in a om a, Aigupta gamsung a mi lawhching pen chihtheih khop hial in a hong om hi.

 

2. Daniel Hinkhua

Daniel ahihleh kumpi Nebukanezzer in Jerusalem khopi pan a Babulon khopi a salmat a akaih, mipil teeltuamte lak a khat ahi a, huai hunlai pen amah a dingin a teenage hunlai ahi. Huchiin a saltanna kumpi nuai-ah Kaldaite pau leh laigelhdan ban ah pilna lam tuamtuamte sin in a om hi. Huchihlai in kumpipa an a nek ngeingei ding ua thupiak ahi a, himahleh huai ante a Pathian hoihsakte ahihlouh ziakin Daniel in a ne nuamkei hi; himahleh a siamsinna ah a lawhching thei mahmah a, huchiin mite engsiat a hong hita hi. Huchiin amah tungtang a heksiatna kumpipa kiangah a tunga, huai heksiatnate ziak in meikuang zuazua lak a pailut (Dan. 3:8) ua, himahleh amau a dingin huai meikuang pen meikuang abangkei a, neuchik in leng a kangkei uh hi; huai kia leng ahikei a, humpinelkai kulhsung ah leng khiak in a om uh hi; himahleh Daniel in Pathian a muan ziak in bangmah a chikei hi (Dan. 6:22-23).

 

3. Mari Hinkhua

Mari ahihleh sa-dan a Jesu nu ahi a, Nazareth khua nungak, Pathian kihta mahmah khat ahi; Huai kia leng ahikei a Nazareth khua tangval Joseph toh leng kiteng dingin a kikhaam uh hi (Hiai kikhaamna ahihleh, Jewish custom ah a kitengta toh kibang ahi). Hichih hunlai in aman Jesu a paai a, huai pen Kha Sianthou thilhihtheihna tungtawn a apaai ahi; hiai a Mari in nau a paaina ziak pen khelhna a neihlouh ziak ahikei a, himahleh Pathian a kihtat ziak leh Pathian toh kinaih a hinkhua a zat ziak ahizaw hi; himahleh kiteeng dinga a kikhaampih Joseph in a gingmawh a, huchiin a guk in tawpsan a tum hi; huchih hunlai in angel tungtawn in Joseph kiangah thudik theihsak in a om a, huchiin Joseph in a zikhaam Mari a pita hi; himah Laisiangthou in, Jesu a pian tan in Mari a virgin achi hi (Matt. 1:25).

Thukhitna

Pathian toh kinaih a om mite hinkhua zaw, gaal pan a et in haksatna toh kidim bang mahleh, Pathian toh omkhawm ahihziak un nuam asa ua, a haksatna tuahte uh leng baihlamtakin a zouzou uh hi.

Joseph, Pathian toh kinaih a om mi khat ahih jiakin a tuahkhak haksatnate pan a hong lawhching hi; Pathian toh kinaih a om mi na hilou hileh tuni’n amah tanchin i theipha nawnkei maithei ding uh hi; huaiban ah ama’n amah engsiat leh mudah a unaute leng ittak leh deihthohtakin a kileppih hi.

Daniel bangle Pathian toh omkhawm gige mi khat a nahih ziak in meikuang le bangmahlou suak in, humpinelkaite leng hatna neilou leh kam katheilou bangmai uh hi.

Mari leng Pathian toh kinaih a nungak hoih mahmah khat a nahih ziakin Pathian deihsakna tang hi.

Adiktak a genin, hiaite sanga thupizaw lawhchinna om dingin ka gingta kei hi; mi lawhching na hih utleh, Pathian toh kinaih in om tawntung in…

Pathian in hon vualzawl hen…!

Share: