Hauhsakna: Thukhun Lui leh Thukhun Thak in ah Gendan ~ Dr Kammuanmung Thangniang, Pro Pastor, TBC (ABA) Delhi

THUKHUN Lui leh Thukhun Thak in hauhsakna a kibanglou deuh in gen uh hi. Athugen uh kikalh chihna chu hilou hi.Atangpi in Thukhun Lui in hauhsakna a hoih lam in gen a, Thukhun Thak in a hoihlouna lam zong hah gen sim hi.

Sam geltu in hichi'n ah gelh hi, “Toupa lau
te... suante inn ah sum leh hauhsakna a um a, a diktatna pen khantawn in a um ding hi (Sam 112:1-3)”. Abraham huahsakna banah kumpi Solomon hauhsakna zong Pasian thuman ziak a Pasian gualzawlna dan in kimu hi. A tom a gen in, hauhsakna pen Pasian in athu mangte a gualzawlna dan in Thukhun Lui in gen hi. Jesu hun lai in zong hibang ngaihsun na hat mahmah in, mi hausate pen Pasian thuhat, Pasian gualzawlna tangte danin ngaihsun uhi. 

Thukhun Thak hun a hauhsakna pen Pasian daltu hihtheih ahihdan zong genin um hi. Jesu khem a ah um lai in Setan in leitung hauhsaknate Pasian tupna suksiatna dingin zak sawm hi, lawhsam ta mahle.

Thukhun Lui leh Thukhun Thak in hausakna kibanglou deuh a agen na pen tangval hausapa tangthu ah kilang hoih mahmah hi. Jesu'n tangval hausapa kiang ah, “Hoihbukim a um na utleh, pai inla naneih zousia zuak inla mizawngte kianga pia in...” achi hi. Tangval hausa pa'n pe utlou in Jesu apaisan ta mai hi. Tuachi'n, Jesu'n hih thu nungzuite kiang ah gen hi: “... mihausa Pasian gam a alut sangin sangawngsau phimbil vang a alut paisuak abaihlam zaw ding hi.” Hih thu a zaktak un nungzuite'n lamdang sa uhi. Lamdang asak na pen uh ahihleh Thukhun Lui mite ngaihsunna a kikawppih ziak uh ahi: Tua ahihleh, hauhsakna pen Pasian gualzawlna ahi a, mi hausate pen Pasian thumangte ahi. Nungzuite ngaihdan pen mihausa, Pasian thumangte, bawn van gam a lut kei leh, kua vangam a kai ta diai chih ahi (Mathai 19: 21-25). Jesu thuhilhna apan mutheih ahihleh hih tangval hausapa pen Pasian toh kizawp lou hi. A huahsakna pen Jesu daltu in pang hi. Mi hausate pen Pasian thuhatte hisese lou hi chi'h nungzuite (Thukhun Lui mite) a dingin sil thak ahi. 

Hauhsakna pen Pasian lungtunna kilakna khat ahih theih a, Pasian lungtungna toh kisaikha sese lou zong ahithei hi. Thukhun Lui leh Thukhun Thak in hauhsakna a gen dante gawmkhawm siam poimoh hi. A hua chikeile Laisiangthou in hauhsakna a gendan diktak theihchian louh theih ding hi.

==02102022==

Share: