EIMAH HIZAW VE-HANG AW!

✍️ Pastor Thangdoulal Suantak 

Luke 9:23, Tuachiin aman (Jesu'n) ama'uhte kiang ah, "Mi khatpeuh in ka nung a zuih nuam leh amah ki-mangngilh in nisial a a Cross pua in hung zui hen.." 

Cross (Singlamteh) thu i ngaihsut khaak chiang un, sihna mun ahi, chih lungsim ah a kilang masa pen hi. Sih kichi sil nuamloutak leh thuakhaktak ahih ziak in, Cross a kilhden a om diing zong kuamah in a ut-huai diing sil hi diing in, ngaihsutna i neikei uh hi. Mi si or sihna ahihleh i ngaisiam maithei kha diing ua, hilezong sih diing mai-ngap kuamah ki-om tuamlou in, a kuamah peuh in ki-huphulh chiat a, sih diing ki-utlou chiat hi.

Hih leitung a Jesu a leenlai in zong, mipite'n Cross a kilhden a om diing in Jesu a deih ua, tuachiin Cross ah kilhden in, chi in, Jesu kilhden a a omtheihna diing in a kikou zuazua uh hi. Mihingte'n mi dangte kilhden a a om diing uh pen i nopsakna lam a na hih tuak hi. Tualeh kilhden diing leh kilhden a om diing in mi dangte i musiam mahmah uh hi.

Jesu pen tua bang ahihlouh ziak in, amah leh amah kilhden a om diing in a kipia a, sih dong a thumang in a om a, a sihna diing in Cross (Singlamteh) a teel hi. Tuachia i natnate pua in, i lungkham mangbat pua in, hua Cross (sihna) pen Amah a diing in a teelzaw hi.

Amah zuitute'n zong, mi dangte kilhden lou a, eimah leh eimah ki-kilhden diing in Toupa'n a hong deih hi. Tuachiin eima Singlamteh kipuka a, Amah zui diing in eite a hong sam hi. Hichibang in Amah i zui thei taktak na diing uh hiam?

Mite sihna diing a Pasian hong piak i Aw uh suahlou a, mi dangte kilhden sawm a phe-liplep lou diing leh eimah sih zawk a, hih leitung sihsan diing in Toupa'n nang leh kei a hong deih hi.

Ei si zaw lehang Toupa tawh i kilem diing a, si-a-i-sih nak ua ahihleh midangte tawh zong lemtheitak in a om mahmah diing uh hi.

Khris leh a gam a diing a, leitung sihsan ngamna hangsan thupha ngah diing in, Toupa hong ompih chiatta hen.

-o-

Share: