LAMDANG KASAK-THEIHDAN!

✍️ Pastor Thangdoulal Suantak 

"Nang zaw, kisih leteh na innkuante tawldamzaw diing ua, a puakgik uh zong a zaanghuai diing hi" chi a hong houpih diing mi ka maituah kha gige sim taangpi a, khenkhatte'n lah, "Hoih lah sawm ngellou, hichibang mawngmawng in, koi hiam ah na puuklum ngei-ngei diing a, mite kawmkaal ah na mangthang ngei-ngei diing hi" hong chih zong, mi a om hi.

Himah e, huachih hunlai a diing in, a ngaihdan uh a diklou tuamkei a, innkuante leh khotaang a diing in ka na nawngkai mahmah hi. Hoih utlou pen ka hi tuamkei a, hilezong ka hoih utbang in ka om theikei a ahizaw hi. Hoihtak leh lamzangtak a hinkhua zangte, lunggiltak in ka eng nguut-nguut a, tuachiin hoih utna ziak in Saptuam in a bawl Camp leh Centre tuamtuam ah ka lut zeel a, hilezong Suangtung a tui kisung mahbang in phattuamna a omkei a, hinkhua ngai mah ah kileh in a omkha nak hi; hichibang silte ziak a, hoih theih nawnlou diing a, aii kaih a gawtmun a lut diing a ki-ngaihsutna in a hung luahdim hi.

Hilezong Toua'n beidong lou a hung na thuumpihtute kikouna aw thudon lou in a omkei a, mite'n uih in namsia gawpta in teh a hung chih nung un, Lazaras bang mai a kaihthawh a, hinkhua thak a om in, i omzaw ua, hoih kiik-thei diing a ki-tuatloute'n, Amah Khrist ah, sil hitheilou a omkei chih, eimah ah a taktak in a langsak a, tuachiin mihing lam a kinepna a beimang nung a, kinepna meikuang mitsaklou a hung na thuumpihte thu-ngetna Toupa'n a dawnna a kilangsakta hi.

Ka gen ut pen ahihleh, i u-naute, i nu-le-pate, i lawm-le-gualte, i zi leh pasalte a diing a, i thu-ngetnate uh bangmahlou in a omkei hi; eite'n i thuumpih ni uh zing chiang in hoih pai le-uh i deih ua, hilezong hua pen Toupa lemguatna a na hilou ahi; aziak pen Ama'n (Toupa'n) kinepna neiloute tung a kinepna omzing ahihna a langsak utzaw hi.

Lazaras damlou a damsak sawmkei a, mihing lam a kinep diing mawngmawng a om nawnlouh nung a, amah pen kinepna hingzing ahihna a sulangzaw hi. Mihing mihinziate gaal ah, hinkhua thak a hung piak diing Toupa tupna leh sil deih ana hizaw hi.

Hichibang ahihziak in, i thuumpihte uh lam ah kineppih diing omkei lezong, a hun diktak ah Toupa'n nna khat a hung bawl na diing hi, chih kinemtak a om in, i thuumna uh i khawlsan mawkkei diing uh hi. I lunggulh hun leh deih hun a Toupa'n banghiam a bawllouh ziak in, i thuumnate uh bangmahlou a suakta, chihna ahi pai mawkkei, Amah pen ahun diktak a gamtaang zeel mawng ahizaw hi.

I nu-le-pate'n ei lam ah lam-et diing mu nawnkei le-uh zong, Toupa a a lam-etna uh koih a, lungkia lou a, a thu-ngetna uh gah pen, sisa hingthak bang mai a, muh diing in a omzaw zeel hi. 

Mihing lam a kineppih diing a omlai a thuumpih pen a haksa kei a, Abraham bang a kinepna diing bangmah a om nawnlouh nung a, Toupa a kinepna koih a thuumna ahihleh ginna a thuumna diktak ahi hi.

Hichibang a thuumnate dawnna a hung tun chiang, lamdang na e, chiin Toupa kiang ah kipahthu i gen zeel uh hi. Hichih hun chiang in Toupa gin-omna a taktak in i muchian ua, kinepna hing omzia i theitel zeel zaw uh hi; tuachiang in thuumsaktute leh a thuumna neite kipahna pen Toupa ah ahizaw-ta hi.

Tuni a tanchipha phuangzak thei a i omna uh pen, bangdang ziak hilou in, Toupa leh kinepna hing neikawm a, mi dangte hung na thuumpihna ziak ahizaw hi; i hun masate uh i nung et chiang un, Toupa aw, ka tung a na silbawlte, na hoihnate lamdang na e, chih louh gen diing i neikei uh hi.

Share: