PASIAN NAIH TIINTEEN NI AW!

✍🏼 Pastor Thangdoulal Suantak 

Pasian naih pen mi zousiah a diing in a hoih mahmah hi. Toupa, i kiang uah om tawntung mahleh, eite'n i kihepsan ua, i gamlatsan zeel ua, Biak-inn sung a i omlai un zong, i lungsim uh gamlapi ah a na om daih thei zeel mawk hi.

Toupa, i kiang nai uah om gige mahleh eite'n i kikhinkhiatsan thei un, i gamlatsan thei ua a dahhuai mahmah hi.

Lungiltak leh i lungsim zousiah uh tawh Toupa naih lehang, i hinkhua uh a navaak mahmah diing hi.

 Thu-ngetna tawh Toupa i biak tam ua ahihleh i lungsim uh a chiim a, a navaak tuam mahmah a, tua in bangchi-chi hiam in nunnemna mizia a hung neisak a, tuachiin i hinkhua uh a tawldam-tuam a, mi dangte houpih dan zong, a hung siamsak-tuam mahmah hi.

Hih sil 4te, lungsim siangthouna, nunnemna, tawldamna, mite houpihdan siamnate, i hinkhua uah nei tawntung lehang, banglam peuh ah kimaa-vang mahmah diing in ginna ka nei hi. 

Pasian i naih ua ahihleh, eima hihna (personality) saang a hoihzaw Pasian in a hung pia zeel hi. Hua a i hihna uh (personality) a hoih a ahihleh banglam peuh ah i hoih lawhthei uh hi.

Pasian i naih ua ahihleh Aman sual douna lam ah a hung panpih a, tua in kheemna leh ze-etnate zong a hung douzousak thei hi.

Pasian naih a poimawhna pipen ahihleh, i Pasian uh ahihna ahi! Vaangam hung tuttheitu ahih ziak in, theihtawpsuah in Pasian i naih sawmchiat diing uh hi.

   🎍🎍🎍🎍🎍🎍🎍🎍🎍

Share: