AMA HUNG OMSAK BANG IN AW!

✍️ Pastor Thangdoulal Suantak

PASIAN IN EITE A HONG OMSAK BANG A OMTHEI DIING IN PANLA THAK NI AW!

Eite kiang a Pasian hong kilakna Lai Siangthou bu, Ephesate 2:10 na ah, "Pasian in masanglai pek a i omna diing a a na guatkholh, Khrist Jesu a nna hoih sem diing a siam, ama khutsuak i hi uh hi," chi a Pasian in eite a hong houpih hi. 

Pasian in eite omna diing leh a hung guat-kholhsakna bang a i omkei ua ahihleh, i mabaan diing uh bang ahita diam? Pasian a kipan in bang tanvou i neita diing ua le? Jakob 4:17 na in, "…Mi'n, sil hoih bawl diing thei a bawl tuanlouh pen, amah a diing in khelhna ahi," chi in i Lai Siangthou un a na gen hi. Sil hoih bawl diing thei a bawlloute a diing in siamtan theih na diing a omkei a, tualeh i mabaan diing uh zong pen, a thupi kholkei maithei diing hi. Khelhna in a hung luahdim ziak a mi dangte tanchin hoihlou leh mite siatnate i ngaihsut ua, i gen chimmoh bang un, sil hoihte ngaihtuah pi-pen a nei in, sil hoihte gen chimmoh lehang a thupi mahmah kha-diing hi.

Hilezong khelhna kheemzoh a om in, i kipahna diing uh leh nopsakna diing uh khovel silte ah i zongzaw-ta mawk uh hi. 

Tuachiin sil hoih bawlthei diing mihing zong hilou khop a om in, i hinkhua uh i na zangzaw zeel uh hi.

Thumanlouhna ziak a hichibang hinkhua zang a i na omlai un, Pasian in a manthang mai diing in a hung phalkei a, tuachiin sil hoih i bawl theih na diing un, leh mi dik a sim i hihtheih na diing uh leh i thumanlouh gah ne diing kimlai pen, a Tapa tungtawn in Ama'n nna a hung semzaw-ta hi.

Tu in, kum tuul nih liamta hunlai a Khrist a tatna i na muhna uh tungtawn in, khelhna sila i hihna ua kipan a suahkhiat leh zaleenna piakte i hita uh hi. Jesu Khrist sihna leh thohkiikna tungtawn in Ama'n mi thak in a hung siamzaw-ta hi.

Tuachiin khelhna a si in, Khrist Jesu ah mi hingte i hizaw-ta uh hi.

Hichibang hi diing a siam i hihtaak ziak un, Amah gingtate'n Pasian lam ah sil hoih i bawltheita uh hi.

Gingloute'n sil hoih bawl uh henla hileh, hua pen mi hingte a diing a abawl uh ahi a, hilezong i siamtanna Khrist ginna tungtawn a, mi'n sil hoih bawldan a theih a, hu amah a bawl zeel a, Khrista min a khelhnate kihepkhiatsan a ahihleh, ama'n vaan ah gou a kholtheita chihna ahizaw hi.  

Pawngsan mi hoihna ziak a bawltheih hilezong, a tawntung a zoh diing chi a hikei a, tualeh 'Jesu Khrist min in,' chia a ki-bawl kei a ahihleh, bangchituk a sil hoih hinanleh Pasian a diing a pomtaak ahi theikei diing hi.

Mi khial sil bawlte'n Pasian a kipaksak theikei hi. 

Mi diktat i chih zousiah vaan-gam a lut diing hituanlou hi. Bangkim Jesu Khrist ginna tungtawn ahih a ngai a, hua pen ginna nna sep ahi hi.

Tualeh Jesu Khrist panglou a Pasian lungkimsak theih ahikei hi. Hihziaktak in Pasian in a Tapa gingta a, tua ginna tungtawn a leitung a sil bawl theih na eite a hung pia hi.

Jesu Khrist ginna panglou a sil hoih bawlna pen Pasian lak a siamtan theih na diing ahikei a, zong ahih ngailouh diing ziak in, Colnelius kichi gaalkaapbu, a khan tungtawn a sil hoih bawlpa kiang ah, Peter sawl in a om hi; tuachia a sil hoih bawlte Jesu Khrist ginna tungtawn a bawl ahih a, Pasian kipahpih ahihna diing in.

Langkai kawikawi hinkhua, 'Nun laklawh' kichi pen a omtheilou sil ahi; Pasian a diing a i hin kei ua ahihleh Setan a diing in ahih a ngai hi. Taangtawn gawtmun a om diing pen kuamah i utkei kha-diing ua, hilezong mi tamzaw in hua gawtmun lampi i zui zaw uh hileh kilawm mahmah hi. Gawt a i om nailouh ziak in kha-muangkei ni. Khrista lampi ah i paizaw diing uh hi. 

Kuamah in i sih hun diing uh i theihlouh ziak ua, i taangtawn mun diing uh i teel khial khaak diing uh a lauhuai mahmah hi.

1 KORINTH‬ ‮10‬:‮21‬-‮23‬‬‬‬

Toupa nou leh dawi nou na dawnkhawm thei kei diing uh, Toupa dohkaan ah leh dawite dohkaan ah na nekhawm thei kei diing uh hi. Ahihkeileh Toupa thangsia diing a hantawk sawm i hi uai leh? Eite amah sang a hatzaw i hi uh hiam?

"Sil zousiah kei diing in asiang a," hinanleh sil zousiah kei diing in ahoih kim kei hi. Sil zousiah kei diing in asiang a, hinanleh sil zousiah in mi a bawlhoih kei hi.

✝️ GOSPEL MESSENGER ✝️

Share: