KEMTU NEI LOU KRISTIAN!

✍️Pastor Thangdoulal Suantak

Pasian a om hi chih ginna neilou, 'atheist' i chihte un, ama'uhte thu petu diing a nei tuamkei ua, a hinkhua uh lamkaihtu leh paisaktu pen ahihleh a sia-le-ph theihna uh ahi, kichi henla hileh kikhial lou maithei diing ahi. 

Tualeh hua a Sia leh Pha theihna uh pen kua hiam deihdan a ki-nga/ ki-pongsan-ngak a hikei a, ama'uhte kemtu pen ahihleh ama'uhte mah ahi hi.

Ama'uhte ahihleh, a khanletna uh zil in, a vantaangmi deuh leh mite nawngkaisak deuhte zong a omkha maithei diing ua, khovel a diing in zong, mi nawngkai leh genhak taktakte zong a na om tham uh hi.

Hichi ahihlai a eite ngaihtuah diing ahihleh hih ahi. Ei Khristian a kiphuang a si-ngamte'n ama'uhte mahbang a eite hung kemtu, kua hiam i neih tuamkei ua, i Sia leh Pha theihna bek un a hung kep a ahihleh, i gen uh ginglou mite tawh i kilamdanna uh bang a omta diing a le?

Ahihkeileh, Pasian a om taktak hi chih gingta khinlou zaw i hi uh maw?

Ahihkeileh, i gin uh Pasian pen gingta zou taktak lou?

Bangziak a i gamsung, i bialsung uh 'politics' hichituk a a thanghuai ahia?

Bangziak a, tuni dong a i gamsung, i khopi sung ua nekgukna a ki-gengen e?

Bangziak a i social media zakte uh, mi dangte diing a lungsim dam theihlouhna gam abak e?

Bangchidan a tu dong a khantouhna lam a i haatlouh uh ahia? 

Bangchidan a thu hoih gen saang a thu hoihlou gen i haat zawk uh ahia? 

Hichibang hi kawmkawm a Biak-inn hoih taktakte a na lamthei i hih ua ahihleh, i gam uh leh i innsung uh baan ah i khua ua zong Kha gahte a pun sam diing hilou maw? ….! Tualeh i Khristianna ua diklou bang om kha a ta leeee?

Khelhna kichi khelhna ahihna ziak ahihleh, a tehtu deihlouhte ahihziak ahi.

 

Nu-le-pa in a tapa uh kiang ah, "Sual na lawmlawm chia!" a chih chiang un, a tapa uh a deihlouh lamtak un a khosa chihna ahi.

Hichibang mah in, gingtute'n zong kemtu i nei ua, hua ahihleh Pasian deihlam silte kigelhna laibu BIBLE ahi hi. Sia leh Pha theihna bek hi nawnlou in, Pasian deihlam theihna in eite a hung kemzaw hi. Awleh, Pasian deihlam na theihna in nang a hung keptheih lou mi khat na hikha maw leh?

Pasian deihlam silte thei kawmkawm a, a deihlouh silte i bawl veve ua ahihleh hua pen khelhna/ sual ahi a, Sual nna i sem uh chihna ahi.

I gensa uh bang a, Pasian deihlam theihna a keplouh, mahni or mimal Sia leh Pha theihna siangthoutak in zong a keplouh, utna leh lunggulhna in a chihna lamlam a apaipih leh a lamkaih theih mi khat na hihleh, gingtu na hi taktak na diam? Hichibang mite gingtu a kichi thei diam?

Tualeh dokna omthei dangkhat ahihleh: "Pasian deihlam silte theilouzaw i hi uh maw le?" chih ahi.

Ahi'n hih dokna pen a dawn hak diing in ka gingta kei hi. Jesu tawh kimaituah taktakna i neikha naikei uh, chih pen a dawnna ahi maithei diing hi. Hichibang a kemtu neilou, i khetot uh i totkhial chiang ua zong khawksakna neilou Khristian i hih khaak ua ahihleh, Khrist i hinkhua uah a hung lutkei chihna leh Amah Khrist Jesu i na muchian kei uh chihna ahi thei mai diing in a gintat-huai hi. Khristian i hihna uh a manphatna i lungsung uah a lut naikei chihna ahi mai diing in ka gingta hi.

Jesu Khrist in, John 14:15 ah, "Kei n'ung it uh leh ka thupiakte na zui diing uh hi," a chih pen etthak ngai diing abang hi.

"Thupiak zuihna tungtawn a i itna uh suklat / taklat sawm diingte i hi uh" chihna pen ahi tuamkei a, i itna uh suklat / taklat a a omna ahihleh Ama deihlamte deihna ziak a, a thupiakte zuihna ahizaw hi. 

Hih pen, i itna ziak un, a thupiakte zuih i ut uh chihna ahizaw hi.

Thupiak theihna pen kiletsakna in a phungvuk zeel a, Pasian itna in, gingte hinkhua ah Pasian thupina a taklang zeelzaw hi.

Hichibang ahihziak in, i bawlkhial uh hi diing a kilang thei pen ahihleh, Pasian itna hinkhua neilou in, Pasian deihlamte i thei ua, mihing a om itna dengdeltak suanlam a nei in, Amah (Pasian) it zong i sawmkha kei ua, tualeh i hinkhua uh hung kepbitsak diing in sil hoih theihna pen a haat zou taktak kei hi.  

Jesu Khrist teekteek in, John 14:24a na a, a na gen, "Kei hung it loute'n ka thu a zuikei uh" a chih in i hihna uh a genchian in ka thei hi.

I chitlouhna leh fel louhnate uh kimu in, huachibang mi i hihlai ua zong Aman eite a hung it masakna pen, i lungsung uah kiphumlut henla hileh, Ama deihlamte bawl diing utna i nei ngei diing uh hi.

Ama'n eite a hung it masak himawk lou in, mi khial leh meelma i hihlai ua, taangtawn hinna i neitheih na diing ua, eite a diing a Singlamteh tung ah a hung itna taklang a, hua a a itna luangkhia pen mahmah tawh Amah kimaituahpih thei lehang, eite'n zong Amah i it thei sam diing uh hi.

Hih itna ziak in, hotdamna tanchinpha a muanglahlou mite'n Amah a itlou theikei ua, Ama deihlamte bawl diing utna in ama'uhte luahdim zeelzaw hi. 

Khrist a ka lawm deihtak aw, hua it masakna lampi zui inla, kemtu a nei Khristian muanhuai hita in. Toupa'n thupha hung pia hen.

✝️ GOSPEL MESSENGER✝️

Share: