Zofate kara buaina chhuak ZORO-in pawi a ti

ZORO Press Release

8. 4. 2025

ZOFATE KARA BUAINA CHHUAK ZORO-IN PAWI A TI

Zo Re-unification Organisation (ZORO), General Headquarters chuan tun hnaia Manipura Zofate inkara buaina chhuak leh chumi kaihhnawiha nunna chân an lo awm hial chu pawi a ti takzet a. Hliam tuar engemawzat an awm leh hmun him lam pana mahni in leh lo chhuahsan an awm hialte chu ZORO chuan pawi a ti takzet a ni. Hetianga unau inkara buaina chhuak hi khawiah mah thleng nawn tawh lo se ZORO chuan a duh a, Zofa chi tin te hnenah a ngen nghal bawk.

Kan hriat theuh angin Manipur-ah hian Meitei râl neiin thih leh dam karah nunphung pangngai tak pawh zawh thei loin kan awm mek a, tanrual hun tak meuh meuh a nih laia keimahni leh keimahni kan lo intibuai hian kan tan rah tha engmah a thlen dawn loh bakah chânna nasa tak leh kan hmelmate tan lawmna a ni ang. Tin, Meitei awpbeha kan awmna ni khua a tisei ting mai dawn a ni.

Chuvangin ZORO chuan Zofa, chi tin te inzahtawn leh inngaichang tawn turin a ngen a, hnam kara buaina tichhuak thei thilah chuan tupawh fimkhur tur leh boruak tipunlun zawnga thil ti lo a, inhriatthiamna sang tak nen thu inbahsual palh châng a awm pawh a, a khirh zawng ni lo, a dam zawnga chin fel dan zawng thin turin a ngen a ni.

Sd-

( L. RAMDINLIANA RENTHLEI )

General Secretary

Share: