May Kha-Gimneih Kha

Ei Zomite' kha simdan pen lunar calendar hi a, khalik, khade, khamang chih toh kizui a pai ahi a, tu a khovel in calendar i zuih (Gregorian calendar) toh kituak geihgeih hetlou in a kimlai lak ah tukha geihgeih zaw in kigen hi. 

I pu-i pate'n May kha pen ZIINGKHA a na chi ua, a khente'n GAMKHA a na chi un, huai bel May leh June kawmtuah lak hi deuh hi. 

I pipute'n May kha ahih chiang in dawi leh kaute laang deuh hi ua ngai in gam giak, luidung hoh chihte tang (chiinglou) uhi. Huai omzia bel huihpi-vuahpi, gialpi leng hiai hun a hat deuh a thei hi ding uhi. 

Hiai kha in huihpi leh gial chihte ban ah ganhingte kimu tam deuh a, tua in a gen ut bel a lauhuai kha ahi chi nuam dan uh ahi. Hiai kha a gampawt tuahsia a om ua lehleng "a gampawt a eive" chiin a mihing lam a na mohsa zaw uhi.

Luidung a suang kilep chihte kum khat a khatvei om sek pen May kha sung a thiltung ahi sek hi. Lou nasemmi himah le uh May kha a lougiak sianglou in ngai uhi. Hiai hunbi mah in inn lam ah leng Zo inntung khuhna *tuklop (maupum inn nah)* gakna/henna pen *bichiing* kichi bang leng a na kikhin/taang zel chi uhi.  

Gamkha sung in gamgiak, gamvak, luidung hoh chihte ana chiinlouhna ziak uh ahihleh hiai kha a gam giak luidung hoh mite'n tuahsia tuak nuam deuh uh chih a ngaihdan uh ahi.

Huaiziak in mihingte a di'a pilvanna kha a ngai in i pupate'n hiai hun sung a na gimneih uhi. 

Hiai pen gingtu i suah leh suahlouh a kinga khalou khohun paidan leng ahihman in singlam-tuilam ah kuapeuh pilvan mah poimoh gige hi.

@loggatelink17V25

WAP

Share: