Iran-Israel Ceasefire: Middle East Kimawlna Bu (Play Book)

Iran leh Israel kal a missile zang a kinawk tuahna a omlai in, U.S. in June 22, 2025 in Iran gamsung a Nuclear munpi  thum kapsak hi. Iran in thuchiam a neihsa dungzui in Qatar pansan US Military Base lianpen kapsak a, huai nung sawtlou in Donald Trump in gamnihte kal ah ceasefire puang thut hi.

Hiai apan a dotna piang theite ahihleh
1. Bangziak a Iran in Qatar pansan US munpi a kapma a theihsakna pe masa hihiam?
2. Bangziak a thakhat thu a kilemna om hihiam?
3. Middle East bial in koilam zuan dek ahia?

Tutung a Iran in Qatar pansan US sepaih munpi a kapsak pen Middle East bial a US operation Centre poimoh mahmah ahi a, tangtak a US a kapna ahi hi.

Himahleh, bangziak a huai Missile-te lohsam vek phial hihiam i chihleh, Iran in US Military Base a kap ma in US leh Qatar kiang ah theihsakna pe masa hi. Hiai in a gennop tuh Iran apan thukna pen a thuak bangbang thukna, galvan mah a tangkouna leh etsakna lahkhiakna hilel a, sihna leh liamna tuak a omlouhna dia theihsakna pemasa uh hilel hi.
> Hiaipen Donald Trump kampau apan thil omdan lakkhiak ahi.

A lamdang ahihleh, Iran in US sepaih munpi a kapzoh dakkal 2 nung in Donald Trump in gamnihte kal a Ceasefire omsak ding thu puang a, huai leng *Truth Social Media* a a post himahleh, ceasefire omsak hiau bang zawzen a, hou mahmah mai chihlouh ngal....!!

Ahihleh, Middle East bial a bang thiltung a, bangziak a Iran in siatna tawpkhawk pumpelhna dingtan lel a US munpi kap hihiam? chih mite theihnop khat suak hi.

Chetna leh thuguk bangmah theih hikeimahleh, thil omdan apan suangtuahna zang in *a ziak* muhdan taklang ni.
1. Bangziak a Qatar hi sese? Iran in tangtak a US gam leitang khoih ngamlou ahi a, himahleh khovel maikaih a maizumna a tuah louhna ding lel a Qatar pansan thukna bawl ahi diam.

2. Mualphouna, zahlaklouhna ding leh Middle East a thuneihna leh thahatna neilai uh ahihdan pahkhiakna lel ahi diam.

3. US leh Israel in thahatna sangzaw / khut sangzaw nei ahihdan haihlou ahihziak ahi diam.

4. Qatar kichi Iran toh kilawm hoih mahmah (Mediator in a pang chih thu) ahihziak a, theisiam pen ding chihna toh Qatar pansan US sepaih munpi kap se ahi diam. (Iran in Qatar a kapma dakkal khat in a sap a Qatar in Airspace khak khinta ahi. Matheih chihna ahi a, huai hunsung a US military Base a van tamtak hepkhiak a om chih ahi)

> A tung a i gente Iran Supreme Commander, Iran news, US President chihte kampau apan muhtheih omte ahi.

Thil paidan leh a kilepdan i etleh, *khovel mitmuh a lahkhiakna thupitak tungtawn a siatna neuchik omsakna dia vaiguan a bang hi.*

Huai tuh, Iran in US base kap sak ahihdan tangkou pihna leh siatna bangmah a omkei chi a US tangkouna ahilel a, huaiziak in buai sawnsawn nawn keini chihna toh kibang hi.

Tutung a Iran in tangtak a US a khoih pen a khatveina ahikei hi. Kum 2020 a US in Iran General Kasim Solmani a thahlai inleng, Iran in missile hunkhop zang in Iraq pansan US Military base nasatak in kap sak hi. Himahleh, huai hun aleng Iran in *theihsakna mapiak ahihna ah, tutung a Qatar a kapna paidan uh toh kibang toutou hi.*

Middle East
*US-Iran Kimawlna Bu V.2*
* Kap inla (missile zang in), himahleh that ken.
* Buaina bawl inla, himahleh a hunphet thei in.
* Kihoulemna ding in mun awn gige in.

A lamdang mahmah ahihleh, Iran in US leh Israel tung a Proxy War bawlna dia a khutzat Lebanon pansan Hezbollah, Gaza pansan Hamas, Yemen pansan Houthi, leh Iraq apan Islamic helte gamtang saklou in, Iran gam leitang mahmah apan tangtak in gamtang hi.
*Hiai apan muhtheih ahihleh, Iran gamtat dan pen Galpi piansakna ding hilou in, Middle East bial a Gal ana omsate beisakna ding hithei hi. A ziak tuh, Iran in galpi piansak sawm hileh Arab gam tuamtuam a Proxy War khutzat a neihte gamtang sak ding ahi.*

Hitamahleh, thilteng a kilat dandan ana hi khollou hi. Ni 11 paisa a Israel gamtatna i etchiang in chiamnuih ana hihetlou a, siatna thupitak a pian kia hilou in, Iran sepaih leh Scientist hunkhop in sihna ana tuah banah, Iran Military Site leh Nuckear site khenkhat kapsiat ana hi hi. A lehlam ah, Iran inleng hihtheihna lahkhiakna in Israel tung ah gamtatna ana nei a, Israel gamsung ah siatna hunkhop ana tun hi.

Tu in ahihleh Ceasefire om mahleh, liamna ma pen thak mahmah lai hi. Ceasefire kichi lemna ahikei a, kidouna khawlsak zualna leh kihouna a om theihna dia kong honna hizaw hi. Huai ziak in, dotna om sun tuh hiai Ceasefire pen kipden diam? Kikap khawlsakna in gah a suang diam? Chiamnuih in genle, Ceasefire Re-load (kisakkholh thakna) chihna lel ahi diam?

*Thukhitna*
Iran nuai chimit dia kisa Middle East a Trump in Ceasefire a puan phutna ziak hidia muhtheih tuh:
1. US in Middle East ah galpi dang a pian ding a deihkei.
2. Middle East a lauhuai pen Iran Nuclear Arsenal suksiat zoh ahihlouh ziak leh Uranium puahphat a omte bitlai.
3. Iran in Nuckear program a neihte phiat mang zoh hilou maithei.

Huaiziak in, US, Israel leh Europe in Kihouna dohkan tungtawn a Iran toh thathak la ut uh himaithei hi. Tutung a Trump Ceasefire leng a tawpna hituanlou ding a, tuitung dam dide mahleh, tuinuai a muhtheihlouh tui thahatna (water current) paipai lai ding ahihna ah, Middle East bial a Nuclear Galvan buaina tuh dam tuan ding in lamet huailou hi.

*Note*
News tuamtuam pansan a ngaihdan helhkhawm ahi a, diklou leh chetna omlou leng ahi maithei. Himahleh, thu tualleng dan a hong ki luikhia ahi.

©Gelhtu: Muamuan

25-06-2025 | Wednesday
©𝐙𝐨𝐠𝐚𝐦 𝐈𝐧𝐒𝐢𝐠𝐡𝐭

Share: