TATE LEH NU LEH PATE KAL ~ Nu Neiching

(Eph 6:1-4)

 Naupangte aw, Mangpa ah na nu leh na pate uh thu mang un, tami sil dih ahi. 

“Na nu leh na pa zatat in,” tua khu thupieh chiem nei masa pen ahi.

 “Tuachi’n nou a dingin ahoi dinga leitung ah na dam sawt ding uhi.”

 Tualeh nou pate aw, na tate uh, sulungthah sih unlen, Mangpa thununna leh thuhilna ah entup zaw un.

Tami Bible tang dungjui in innsung kikep dan enkhawm va ui chi ihi. 

Q. Koiten nu leh pate thu mang un a chi ei? 

= Naupangten nu leh pate thu man ding a chi hi

Nu leh Pa tampiten atate un zi leh ta anei zou chiengua zong amau thuthu aman ding uh, amoute uhleh atute tan uh zong amau thuthu a a omsah ding bang sa ua, thu nawngkai bai mama hi. 

Rev. Dr JM Paupu in atapa te kungah, noute zi nei na hitah ziehun, na zite uh toh thu nakikum ta ding ua, koute (nu leh pa) nang poimo na uh a om a, nang dawh uhleh kang ham ding ua, nang dawh lou uhleh kou hing kikum lou ding ka hi uh, chin in ka gen hi a chi a, biblical mama  hi. Tambanga tate tunga vaihawm nu leh pa bangjat a om de aw? 

Tapa ten zi leh ta ang nei zou chieng ua hakangdan theilou nu leh pate zieha innsung buai tampi ki om a, tate hinkhuo a tungihna guantu ki suoh thei hi. 

Theiding:

Naupangte aw na nute uhleh napate uh thu mang un (Eph 6:1) chi ahi banga......Pasal in anu leh apa anuasie dinga azi lam ah abeh ta ding hi, zong kichi ahi. (Eph 5:31) 

Nu leh pa thuman hun leh, zi lam a beh hun i khentheilou leh damna sangin buaina hing pieng bai zaw hi.

Nu leh pate pen a damsung pumpi uh zatat (honour) ding, it ding, apoimaw bang ua zong kep ding,  hinanleh amau  thu zong Pasian thu toh akituoh sih leh man ding hisamlou hi.

Gualzawlna tanna ding leh leitunga i damsawt na dingin nu leh pate thuman ding chi in, amauten  Pasian thu toh kituohlou pi in hing pui in, ei thumang talei, i thumanna in hing suhsiet law thei hi. 

Naupang hinonlou, Zinei tanei....Mi piching hita ten i thuman dan etchien poimaw ta hi.  Pasian dan kal zen a thumanna omthei tham ahiziehin. 

Nu leh pate dawh nonlou ding, athu uh man nonlou ding chi ihi sih a, Bible toh kituoh a thuman ding, Bible pulam a mihing ki gahna te topsan ding chi ihi zaw uhi. 

Nu leh paten zong tate  suhlungthah lou a, Mangpa danthu hinghilna banga  ettup ding chi ahi (Eph 6:4) 

Nu leh pa tampi ten Mangpa danthu toh kituoh lou zen a tate  thunun zong ki om veve hi. Mangpa danthu pulam a kithununna khu sil zauhua ahi zaw hi. Ga hoi suangthei lou hi. 

Atangpi a i buaina uh khu, Pasian thu in agenkhahlou, mihing thugousie i tudet chinten te uh ahi zaw hi. 

Nu leh paten zong i tate tunga i thuneina uh azi nei zou uapat hakangdan  i siemlou uhleh khat leh khat kisulungthah theina anai mama a, alang alang a dingin zong nawngkaina a tun lel hi. 

Innsung damna dingin Mangpan Athu theisiemna hing guanta uhen aw. 🙏🙏

~ W/A

Share: