HMAR HI MIZO HNAM HNAR KAITU AN NI | C.Hermana

HMAR HI MIZO HNAM HNAR KAITU AN NI. A PHATSANTU AN NIH A THIANG LO VANG.

~ C.Hermana
Dt 7.11.2025

Tun hnaiah Hmar People's Convention(HPC) President Lalrosiem thu sawi "Hmar hi Mizo kan ni lo" a tih chu social media ah pholan a ni a. Hei hian ngaihtuahna a ti kal thui hle mai. A sawi tak tak ni lovin thuthang satliah mai ni se ka va ti em!

Hmar hi Mizo satliah mai pawh ni lovin Mizo Hnam hnar kaitu dik tak an ni ka'n ti thung teh ang.

Kan rama Tlawmngai pawl ding hmasaber, Zosap hoin Kum 1935-a min din pui YOUNG LUSHAI ASSOCIATION (YLA) kha a tir lamah kha chuan Zosap ho khan min kaihhruai sak a. Kum 1940 atang kha chuan Mizote an kaihhruai tir ta a. Khatia YLA Mizote kuta dah a nih rual khan a hming pawh YOUNG MIZO ASSOCIATION(YMA) tia thlak a ni a. Ka hriat dan a sual loh chuan khatih hun laia Central YMA President kha Hmar Hnam Pastor Chhuahkhama a ni.

Mizo Union, kan rama political party ding hmasaber, kum 1946-a Pu R.Vanlawma hmalaknaa an dinah khan President hmasaber chu Hmar Hnam Pu Pachhunga (P+Sons) a ni ve leh bawk a.

Mizo lalte ban an nih hnua Assam Sorkar hnuaia rorelna khawl thar "District Council" pek kan lo nih a kan Chief Executive member(CEM) hmasaber pawh kha Hmar hnam Pu Lalsawia ala ni ta zel a.

Ram buai laia kan Mizo District Council CEM hming thang tak Pu HK Bawichhuaka pawh kha Hmar hnam a la ni ta cheu a.

Assam Sorkar hnuaia kan awm laia Mizo zingah Minister ni thei hmasaber Pu A.Thanglura pawh kha Hmar hnam ala ni ta deuh deuh bawk a sin!

Pu A Thanglura kha zawng Mizo pa ropui a ni a. A hming kan sawi ri ta sa sa, tlema i han sawi belh teh ang. Kum 1970 MDC Election ah khan Ratu bialah Congress ticket in a ding a. Mizo Union ticket a ding Pu Vaivenga nen an inkhing a. A buk zâng zawkah a tang ta si a.

Pu Lura lungawi lo chuan Ratu biala Hmar hote chu "Hmar Juda ho" tiin a va hau ta hrep mai a. Engatinge "Hmar Juda ho" min tih tia an han zawh lah chuan, "Juda hoin an lal an hai a, nangni pawhin min hai maw le!" Tiin a chhang a. An nui ta ṭhe ṭhaw a! Tuna kan thil sawi mek pawh hi Pu A Thanglura thlarauvin engtin lo ngai tak ang maw le?

Tunah chuan kan thupuiah lut leh tawh ila, "Mizo kan ni kan lawm e" tih hla phuahtu Pu Rokunga (Mizo Poet of the Century) ngei pawh kha Hmar hnam a ni a. Ani phei hi chu Mizo Hnam tana a 'Contribution' hi ava hlu em! Sawi thiam hleih theih pawh a ni lo. A ropui in a zahawm a ni ri tawp mai!

Zohnahthlak peng hrang hrangte kan lo inpumkhata hnam zahawm leh thiltithei kan lo nih ve theih nana theihtawp chhuaha Mizo nihna huanga min lo hruaikhawmtu leh sulsutu kan Hmar pasal tha fam chang tawh te kha Mizo Hnam hnar kaitu ah kan ngai a, an thlarau pawh chibai ka buk nawn leh e.

Heng kan Mizo Hnam hnar kaitu kan Hmar pasathate lo seng khawm tawh sa tidarh leh zawnga HPC leader Pu Lalrosiema'n "Hmar hi Mizo kan ni lo" ti a awka a rawn chhuah ta mai hi a mak a! A second thought hmang leh thei se ka ti ngawt mai.

Kan "hmai" leh "Mizo" tih hian inanna an nei a. Kan hmai hi a hranpa in a awm lova. Heng kan chal, kan biang, kan mit, kan hnar, kan hmui leh kan khabe te intawm tlan hming a ni mai a. Chuti ang bawkin "Mizo" tih pawh hi Zohnahthlak peng hrang hrangte fun khawmtu, an intawm tlan theih hming a ni ve leh mai a. A hranpa in Mizo Hnam a awm lo.

Tunah chuan kan thalai te hian politics ruih chilhna kalpel in an rual elna level a sang em em tawh mai a. Khawvel ram hrang hrang thalai te inelna leh an hmasawnna te TV atang te in an thlir a. An ruala kan hnam hi ke penpui ve an chak a. Chu chu kan inpumkhata hruikhat kan vawn loh chuan a thleng thei dawn si lova.

An sawi Rotekawla sepa inlak hranna politics hnawlin ṭhang lo la thar leh zel turte hmakhaw ngai in insuihkhawm leh zai I rel uar deuh deuh zawk teh ang u.

MIZO HNAM ROPUI ZEL RAWH SE

*via social media

Share: