Aizawl 2nd March, 2026
PRESS RELEASE
Siamsinpawlpi (Paite Students Welfare Association), Headquarters, Aizawl chuan 9th Mizoram Legislative Assembly-a 6th session (February 23, 2026)-a Sialkal Range Development Council (SRDC) Bill sawihona chungchang uluk takin kan ngaihtuah a; opposition-te duhdan anga ngaih theih tura thutlukna a awm ta hlauh leh chumi atana hmalakna a awm hi kan nihna ai maha Paite hnam dahsanna leh huphurhna vang niin kan hria.
SRDC hi Paite hnam bil ta a ni lo va, Paite hnamte hmalaknaa din pawh a ni hek lo. Sorkarin Sialkaltlanga cheng, khawsakna kawnga hnufual zawkten midang nena hmasawnna kawnga midangte ruala ke an pen ve theih nana a din a ni a, a huam chhunga chengte hi Paite an lo ni mai zawk a ni. Hetih lai hian kan legislative assembly member ṭhenkhat chuan thisen chhuak leh nunna chan em pawh awm lo va SRDC Act neih hi awm leh dik lova hriain he bill hi an hnial a ni. Keini lo hriatthiam dan chuan SRDC Bill hi council thar siamna tur ni lovin sorkar notification awm mek act-a thlakna tur mai a ni. Hemi thlak nana thisen leh nunna hlan ngai tur a ngaih tlat hi pawi kan ti a; chu aimah chuan Paite-ho hi tharum nena che a, Mizoram tibuai tura fuihpawrh nana rorelna insang meuh hman a ni hi a pawi mai ni lovin a zia lo kan ti hle. Law and order tihbuai tuma legislative assembly hman bawrhban tumnate pawh a ang deuhin kan hria a ni. Paite hi chuan tharum thawhna hi eng tik laimahin ṭha kan ti ngai lo a ni.
Mizoramah hian Mizo hnam hrang hrang ten mahni puala inrelbawlna neih theih nia ngaiiin 1947-48 lai khan Paite Federation chuan regional council a lo dil tawh a, 1964-ah Paite National Council (PNC)-in a lo dil ve leh a, khatih laia Mizo District Deputy Commissioner K Saigal pawhin a huamchin tur enin Sialkaltlang dung hi a tlawh nghe nghe a ni. Mahse, Mizo National Front (MNF) movement-in a rawn nangching a, Paite tamtak pawhin he movement an zawm ve a. Chutih laiin, PNC hruaitu ṭhenkhat thah an ni a, a ṭhen chu man an nih hnuah Mizoramah awm ngam loin an tlanchhia a,Regional Council dilna pawh a zuzi ta a ni.
Mizoram buai a reh a, hnam bil inrelbawlna neih ve duhna boruak a lo thar ve leh a, Paite zingah Hmar People Convention (HPC) movement kut tuarte an lo awm tan bawk avangin PNC chu thar thawh leh a ni a, Sixth Schedule hnuaia Autonomous District Council an ngen a ni. Chuvangin SRDC hi Paite ta bil ni hran lo mah se Paite-in autonomy nei tura hma la lo emaw tawrh pawh tuar miah lo ang a ngaih hi chu a dik lo a ni. Kan hruaitu hmasaten nunna an chan bakah man, vau, sawisak, sum leh pai chhuh luihsak te hi an lo tuar ve a ni. Tin, hetiang hi lo tuar lo pawh lo ni tehreng se tharum thawhna phut leh beisei ang hrima Legislative Assembly meuha sawi a ni hi keini Paite zirlaite chuan a ṭha lo kan tiin Mizoram ralmuanna hi tihderthawnin awm lo se kan ti hle a ni.
(SUANMUANKIMA)
President
Contact: 9615058078
Copy To:
All Members of 9th Mizoram Legislative Assembly
No comments:
Post a Comment
Comments not related to the topic will be removed immediately.