ZYO Delhi & NCR apa'n
Maestro Sye Lalboi Sunna Vai Update
Tuni Monday March 09, 2026 nitahlam dah 05:00 in igamsung ua music lam a siem leh madawh pente lah a khat a inei ban uah, ikiletsahpi mama uh Maestro Sye Lalboi in Safdarjung Hospital, New Delhi ah tahsa damlouna ziehin hing na muolliem santa hi.
Innsung mite deina bang in phamsa Pu Maestro Sye Lalboi luong damsa innlam a puoh hiding hi.
#Zing, 10/03/26 ah police NOC leh embalmment vaite saifel hiding a, aomna hattuom PCI Delhi (ZPCS) te inntehna toh sunna vaiguon zong om ding hi (Detail Programme hing kitahlang kia ding).
# Nawngkaina dang a omsihleh thai, 11/03/26 chieng in lenna tungtawn a innlam a puohsuh hiding.
Innlam atunjo chieng in a-upa Pa Lunhau inn, Suongsibawh, Lamka pansan in aluongdamsa hahkhietna vaiguon nukhia sai hiding.
Ama'n a damlai in, New Checkon Imphal ah Music Studio zong ana hong ngai a, 2023 apan gamsung buoina ziehin Delhi a hing pemtou in azi Nengtinhoi toh Munirka ah khosa uhi. Music lam a siemna nei leh lunglut gige mi ahi dungjui in Home Studio hon sunjom tou hi. Hun bangtan ahiei khat nua in, kal (kidney) lam damlouna nei ziehin hospital leh innmun pansan in ki-enkol tou hi. Dialysis peitou jel pen Saturday, 07/03/26 sunnung lam in atahsa gimsiet ziehin Safdarjung Hospital ah emergency in admit ana kibawl hi. A dinmun in hoilam manaw lou a doctor in athei ziehin Medical Ward apan tuni, 09/03/26 in ICU ah refer nanleh hing dampi jou nawnlou hi. Ama shi thu jah ahi in imi-isa ngaina tamtah in hospital kidellut a, medical paper saithei teng sai ahijo in tuni ading in hospital kinuasia photta hi. Tu'n aomna inn, Airport (Babulal Chowk) gei, Munirka ah anuasie innsung mite mipi in khawlpi uhi.
~ ZYO Delhi & NCR
No comments:
Post a Comment
Comments not related to the topic will be removed immediately.