Suhmang Dinga Umsa Nineveh Khopi: Hegin Haokip

SUHMANG DINGA UMSA NINEVEH KHOPI CHU AGAM MITEN ANNGOLA TAONA ANEI UVA KONIN PATHENIN ATAO NAU ASANGIN ASUMANG TAPOUVE. AHINLA KUKITEN GAMTUM MUNA DINGIN ANNGOL’IN KUM THUM VAL IHUNGTAO TAUVIN AHINLA IMU HIH LAI UVE. AHILE TAONA CHU IPI AKIKHEHNA UM AHIDEM ITILEH NINEVEH MITEN ATHILSE BOL HOU ADA LHAUVIN, KUKITEN VANG ATHILSE BOLHOU ADALHAPOUVE.

By Shonkhogin Hegin Haokip

Ahin mihem le ganchaho chun khaodip pon kikhu-u henlang, Pathen henga nasatah-in taovuhen. Ahi, amitin athilse bolna lampile akhut nuva pumhat thilbol ho-a konin hung kilekit nuhen. Chuin Pathen'in anatoh hou, athilse bolnao lampi ho-a kona ahung kilehei kitnu chu amun; chule Pathen'in achunguva kabol ding ahi tia asei thilse-a kon chun alung aheijin, aboltapon ahi.Jonah 3:8,10.

Sopideitah teho, Nineveh khopi mite chonsetna ho chu ipipi ham itia ahi leh alhangpia seidingin, hunama thisan sona, bol gentheina, joule nal dimsetna, michomna, kiletsah na,  milimdoi houna, doile kaova kichepna, hinkho thenlouna kitihohi ana dimset ahi. Bible in hitin aseiye, Hichu kihoisah-a jonthanhoi bol simjoulou noti ho, ajonthanhoi bolna-a namtin johmanga doichoi nu, chule adoichoi na-a a-insung johmangnu jeh ahi. Nahum 3:4.  

Sopiteho, Nineveh khopia ana um miteho chonset naho ivetna ahileh, tunia jong eihon ibol lou u khatcha aumtapoi kiti leh seival hibehseh ponte kati. Chutia hinkho chu iman tah uva ahileh eiho chunga jong Pathen thupi tanna ding chu gotsa ahitan, hijeh a chu, tunia ithil to hou hi atohdinga lom mong ihiuve kitileh mi abang khat chu lunghang maithei yintin, Pathen lama hinkho mangho jouse vang dapou hite. Pathen douna a ichonset dan u hi asang lheh tai. Pathen lam holsangin ama ama lunglam ihol gam tauve. Achom lam tah seidingin Pathen houte ihi uvin, ahivangin Pathen houte chondan in ichon tapouve. Aneo pena seidingin, itahsau ideidei uvin imang gam tauvin, apha le aphalou ihekhen tapouve.

Ikivahna dinguva isum holnau jong adih achangin ihol tapouve, sum chu akimu phot leh sumtheng sumboh aumtapoi. Imuchi tunauva jong muchipha muchise ihe khen tapou vin, muchiphalou ituna lamuvin, gam leiset jong isuboh deh taove. Gam leiset suhboh goh keo hilouvin, ichenkhompiu namtin vaipi hotle mat in ium gam tauvin, ichena ivana chanuva jong mi lungset ichang tapouve. mi hot le mah a ium phat uvin, chanpha chanhoi jong ichang jou tapouve. Chuleh ihinkho mandan hou jong koima ginthei jatheijin ium jou tapou ve. Hiche toh kilhona tulaitah a eiho chungthu in kisei tahen lang hileh, masanga Nineveh khopia ana chonsetna hou chu tulai eihotoh kitekah leh akikhehna umbehseh ponte. Achuti le eiho jong suhmang dinga lhingset ihimai theiyu ahitai. Hijeh chun, Nineveh te bangin kisih u hitin, ithilse bolna hou jouseu dalha leuhen, chutobang manthah na a kona ikihoi doh thei dingu ahi. Bible in hitin aseiye, Keimanmigilou khat thina chunga kakipah hih helle. Amavang agiloupa chu agitlouna a kona ahung kinungheiya hinna lampi-a acheding johchu kakipana hilouham? tin Pakai Pathen'in aseije. Ezekiel 18:23 

Tulaitah hi kigingjinga itao hat ding laitah u ahin, ahinla ataochu itaonauvin ahinla lunglut tahleh itaoding dolin itaopouve katinome. Tichu itaoding dol uvin, itao theipouve katilona pentah chu eiho Nineveh khopi mite tao bangin itao theipouve. Nineveh khopi mite chu anngola atao uva chu lungthim kisih puma athilse bol hou jouse dalha a tao ahiuve. Hitobanga chu eiho jong anngol a itaonauva hi lungthim kisihpuma ithilse bolna hou  jouse idalhah dingu ahi.  Nineveh te chu iti tau uva amanthah na dinguva kona hingdoh hiuvam itia a ahileh, amahon :

*ATHILSE ABOLNAUVA KONIN AKISIH UVIN NUNG BOL KIT TALOU DINGIN AKIPELHAUVE. Hijeh a chu SUHMANG DINGA KIKOISA NINEVEH MITE CHU AKISUHMANG NADINGUVA KONA SOHCHA AHIUVE.*  Amaho chu mohtao maimai ahipouve. Athilse bolho jouseu adalhah jeh uva sohcha ahiuve. Tunin jong eihon jong Nampia dinga Anngola itaotao jenguhi ipidinga tuni changeiya Ithil thumu abep bep hina lai ham? Ajehchu itaotao vanguvin isunglangu akikhel lou tamtah aumna laiye. Nampi boina kitihi mohso so ahipon, nampin dam mona anei kitihi namsung chonsetna um ahi tihi kinelna bei ahi. Hiche damna dinga chu Nampin Anngol a taona anei ding ahin, taona neiseh seh a chu lhing ahipoi, Nampi sunga *ITHILSE BOLNA HOU JOUSE KISIHPI A DALHAH  DING AHI. ITHILSE BOLNA HO DALHAH NA DINGA KISIHNA LE KISEM THAHNA AUMLOULEH ITAONA HO CHU PHACHOM LOU AHI.

Tun veuhite, Sopiteho, Gamle Nam dam ding ideiuva ahileh inamsung uva Pathen in adeilou THILSE NABOL HO NADALHAH ANGAIYE? NADALHAH TAH A ITHIL NGAICHAT HOU IMULOU LAI UVA AHILEH PATHEN KOMA IKIPHIN THEIYU AHI. ACHUTI LOU LEH IMACHA ISEI THEI LOU DINGU AHI. PAKAIYA DINGA SOPI DEITAH TEHO, IGAL DOUNAU KUMTHUM AVAL TAN, GAMTUM MUPHAT MONGMONG AHITAN, AHINLA AGAMLA CHEHCHEH E KITILEH KISEIKHEL BEHSEH PONTE. PATHENIN EIPEH NOM LOU U AHIPOI, PEHTHEINA DINGIN IMACHA IKIBOLDOH HIH LAI UVE. NATHILSE BOLHO JOUSE NADALHAH HITAM?

AMASA PENTAH IN, NAPENTHAH HITAM? HINKHO THENLOUNA HO JOUSE NEHPHALOU, DONPHALOU KHAM NA THEITOH KIMAT HO POUPOU NADALHAH HITAM? LUNGTHIM THENGLOU NAVOP HO JOUSE NADALHAH HITAM? JONTHANHOI NA LUNGTHIM KITI PHOTPHOT NADALHAH HITAM? SUMLE PAI ADIHLOU ATHENGLOUVA NAHOL NAHO NADALHAH HITAM? SUMLE PAI MUNA HIJONGLEH MIKHAT THINA THEIYA NAKIVEI NAHOJOUSE NADALHAH HITAM? SUMLEPAI HOLNA DINGA APHACHOM TAH HIJONGLEH MUCHIPHALOU KANI NANA TUNA HO NADALHAH HITAM? ADANGDANG JONG TAMPI UMNA LAIYIN TIN, HITIHO JOUSE JEH A HI PATHEN LUNGHAN NA KIBOL DOH AHITAH JEH CHUN, EIHON IDALHAH LOU ULEH PATHEN KOMA IMACHA KIPHINNA THEI AUMPOI. AMAN HICHEHO JOUSE HI KISIHPUMA, KISUH THENGA AMA DEIBANGA HINKHO IMANSAH NOMU AHI. AHINLA HICHE CHU EIHON ITHILSE BOLNA HOU IDALHA NOM POLAI UVE.

 Pathenin asimho jouse phatthei bohtahen.

~ W/A